አዲስ አበባ ከተማ ዛሬ የተጀመረውን የአፍሪቃ ኅብረት አባል ሀገራት ሚኒስትሮች የሚሳተፉበት 40ኛው የስራ አስፈጻሚዎች ምክር ቤት ጉባኤ እና የፊታችን ቅዳሜ እና እሁድ የሚካሄደውን 35ኛ የመሪዎች ጉባኤን ለማስተናገድ እየተሰናዳች ነው። የአፍሪቃ መዲናዋ ዋና ዋና ጎዳናዎቿን አሳምራ ለጉባኤው ካደረገችው መሰናዶ በተጨማሪ፤ ልዩ የፀጥታ ጥበቃ ዝግጅት መደረጉንም ባለስልጣናት ገልጸዋል። የኅብረቱ ጉባኤ በአሁኑ ወቅት አዲስ አበባ ውስጥ መካሄዱ ፖለቲካዊ፣ የዲፕሎማሲ እና ኢኮኖሚያዊ ፋይዳው ቀላል እንዳልሆነ ደግሞ አንድ የፖለቲካ እና ዓለማቀፍ ግንኙነት ባለሙያ ለዶይቼ ቬለ ተናግረዋል። ሥዩም ጌቱ ከአዲስ አበባ ዘገባውን ልኮልናል።

ዛሬ እና ነገ አዲስ አበባ በሚገኘው የህብረቱ መቀመጫ የሚካሄደውን የሕብረቱ አባል ሀገራት ሚኒስትሮች የሚሳተፉበት 40ኛው የስራ አስፈጻሚዎች ምክር ቤት ጉባኤ እና የፊታችን ቅዳሜ እና እሁድ የሚካሄደውን 35ኛ የመሪዎች ጉባኤን ለማስተናገድ እየተሰናዳች የሚትገኘው አዲስ አበባ ዋና ዋና ጎዳናዎቿን በአባል አገራቱ ሰንደቃላማ እንዲሁም ከወትሮም ለየት ባለው የማብራትና ጽዳት ስራዎችም በማሸብረቅ ነው፡፡ አስተያየታቸውን ለዶይቼ ቬለ የሰጡት የአዲስ አበባ ፖሊስ ኮሚሽን የህ/ግ/ኃላፊ ኮማንደር ፋሲካ ፋንታው ግን የህብረቱን ስብሰባ በስኬት ለማጠናቀቅ የተደረገው ዝግጅት ከተማዋን ከማስዋብና ሳቢ ከማድረግም በላይ ነው ይላሉ፡፡ 
በአዲስ አበባ ዩኒቨርሲቲ የፖለቲካል ሳይንስ እና ዓለማቀፍ ግንኙነት ምሁር ዶ/ር አስናቀ ከፋለ እንደሚሉት በዓለማቀፉ ወረርሽኝ ከዚህ ቀደም የህብረቱ መሪዎች በአካል ወደ አዲስ አበባ ሳይመጡ መካሄዱንና አሁን ላይ ጉባኤው እዚህ እንዳይካሄድ ብርቱ ጥረት ከተደረገ በኋላ የሚከወን በመሆኑ ላቅ ያለ አንድምታ እንዳለው ገልጸዋል፡፡ 
ዶ/ር አስናቀ ኢትዮጵያ በቅርቡ ከነበረችበት የፀጥታ ውጥረትና አሁንም ሙሉ በሙሉ ካልተላቀቀችው ስጋት ጋር ሆና የምታስተናግደው የህብረቱ ጉባኤ በጸጥታው ረገድ ልዩ ትኩረት ሊሰጠው እንደሚገባም ነው ያመለከቱት፡፡ 
የአዲስ አበባ ፖሊስ ኮሚሽን የህዝብ ግንኙነት ኃላፊ ኮማንደር ፋሲካ ፋንታው በበኩላቸው በጸጥታው ረገድ የተደረገው ዝግጅት ውጤታማ እንዲሆን የተሰራ ስራ ሰፊ ነው ባይ ናቸው፡፡ 
ጠቅላይ ሚኒስትር ዐቢይ አህመድ ከሳምንታት በፊት የህብረቱ የዘንድሮ ጉባኤ አዲስ አበባ እንደሚካሄድ ውሳኔ ባገኘ ጊዜ የውሳኔው አንድምታ የላቀ መሆኑን ገልጸው የህብረቱ መሪዎችን ውሳኔ ማወደሳቸው አይዘነጋም፡፡

ሥዩም ጌቱ
ማንተጋፍቶት ስለሺ
ኂሩት መለሰ