ደቡብ አፍሪቃዉያኑ ሃገራት ሌሴቶ እና ዚምባቤ ከዛሬ ጀምሮ ለ 21 ቀናት የሚፀና የዝዉዉር እገዳ  ደንግገዋል። ሌሴቶና ዞምባቤ በአኅጉሩ ጥቂት በተኅዋሲ የተያዘ ሰዉ የሚገኝባቸዉ ሃገራት ናቸዉ። እንድያም ሆኖ የሁለቱም ሃገራት አዋሳኝ የሆነችዉ ደቡብ አፍሪቃ በአህጉሪቱ ከፍተኛ ቁጥር የኮሮና ተኅዋሲ ሕመምተኛ የተመዘገበባባት ሃገር ናት። በደቡብ አፍሪቃ እስካሁን በኮሮና ተኅዋሲ ሁለት ሰዎች ሞተዋል። 1280 ሰዎች ደግሞ በኮሮና ተይዘዋል። በሌሴቶ እና በዚምባቤ  መንግሥት የደነገገዉን ሕግ ለማስከበር ፖሊሶች እና የፀጥታ አስስከባሪዎች በተሽከርካሪ እየተዘዋወሩ በመቆጣጠር ላይ ይገኛሉ። 

ይህ በእንዲህ እንዳለ የናይጀርያ መንግሥት የኮሮና ተኅዋሲ ስርጭትን ለመግታት፤ በሃገሪቱ የሚሊዮኖች መኖርያ በሆነዉ ሌጎስን እና በዋና መዲና አቡጃን ከተማ የዝዉዉር እገዳን አሳረፈ። የናይጀርያ ፕሬዚዳንት በቴሌቭዝን በሰጡት መግለጫ የዝዉዉር እገዳዉ ከዛሬ ጀምሮ ለሚቀጥሉት 14 ቀናት ይፀናል። ፕሬዚደንቱ እንዳሉት በሌጎስ እና አቡጃ ከተሞች የሚገኙ ነዋሪዎች ሁሉ ከቤታቸዉ መዉጣት የለባቸዉም። እስካሁን ይፋ እንደሆነዉ፤በናይጀርያ  አንድ ሰዉ በ covid 19 በሽታ ሞትዋል።  በአጠቃላይ 111 በኮሮና ተኅዋሲ የተያዙ ሰዎች የሕክምና ክትትል እየተደረገላቸዉ ነዉ። 

አዜብ ታደሰ 

ነጋሽ መሐመድ