ኢትዮጵያ ሰነደ ሙዓለ ነዋዮች ገበያ ዛሬ አዲስ አበባ ውስጥ ለመገናኛ ብዙሃን በሰጠው ጋዜጣዊ መግለጫ ከሀገር ውስጥና ከውጪ ባለሀብቶች 1, 5 ቢሊዮን ብር ካፒታል ማሰባሰቡን ነው ያስታወቀው። የኢትዮጵያ ሰነደ ሙዓለ ነዋይ ገበያ ዋና ሥራ አስፈፃሚ ዶ/ር ጥላሁን እስማኤል የካፒታል ማሰባሰቢያውን ማጠቃለያና የገበያውን ደንብ አስመልክተው በጋዜጣዊ መግለጫው ወቅት እንደተናገሩት፤ ገበያው ለመሰብሰብ ያቀደው 631 ሚሊዮን ብር ብሆንም የተሰበሰበው ካፒታል 1,5 ቢሊዮን ብር ነው ብለዋል።

የኢትዮጵያ ሰነደ ሙዓለ ነዋይ ገበያ ዋና ሥራ አስፈፃሚ ዶ/ር ጥላሁን ይህም ከዕቅዱ በ240 በመቶ ብልጫ እንዳለው ገልጸው 48 በፋይናንስና ከፋይናንስ ዘርፍ ውጪ ባሉ መስኮች የተሰማሩ የሀገር ውስጥና የውጪ ባለሀብቶች መሳተፋቸውን ተናግረዋል። «ከአገር ውስጥ 16 የሚደርሱ ባንኮች ተሳትፎ አድርገዋል» ያሉት ሥራ አስፈጻሚው በተለይም ከውጭ ባለ ወረቶች የናይጄሪያ ኤክስቼንጅ ግሩፕ፣ የኮሜሳው የንግድ እና ልማት ባንክ እና ኤፍ ኤስ ዲ አፍሪካ 250 ሚሊዮን ብር ገደማ ከኢትዮጵያ ሴኪዩሪቲስ ኤክስቼንጅ ድርሻ መግዛቱ በስኬታማነት የሚነሳ ነው ብለዋል።

ገበያው ጥቅምት 2016 ዓ.ም የመንግሥትና የግል አጋርነትን መሰረት በማድረግ የተቋቋመ መሆኑንም አንስተው፤ ካፒታል በማሰባሰብ ሂደቱ የታየው ከፍተኛ ፍላጎትና ርብርብ ኢትዮጵያ እያካሄደች ላለው የፋይናንስ ዘርፍ ልማትና የኢኮኖሚ ለውጥ አዲስ የስኬት ጉዞ ነው ብለዋል።

ገበያው አዲስ የኢንቨስትመንት አማራጮችን የሚፈጥር፣ የሥራ ፈጣሪነትን የሚያበረታታና በተለያዩ የኢኮኖሚ ዘርፎች ዘላቂ ልማትን የማስፋት አላማን ያነገበ መሆኑንም አንስተዋል። «ከባንክ እና ኢንሹራንስ ውጪ ያሉ የአገር ውስጥ ባለሃብቶች ገበያው ላይ ሲሳተፉ በዋናነት ትኩረት አድርገን ስንሰራበት የነበረው ወደፊት አብረውን ሊሰሩ ይችላሉ ብለን በማሰብ ነው« ብለዋልም፡፡ ወደፊት ከኢንቨስትመንቱ ባለድርሻነት ባለፈም እነሱን የማገዝ ሥራ ይሰራል ነው ያሉት፡፡

አክለውም ገበያውን ወደ ሥራ ለማስገባት ወሳኝ ተግባራት እየተከናወኑ መሆናቸውን ዋና ሥራ አስፈፃሚው አመልክተዋል። በአሁኑ ወቅት የሰነደ ሙዓለ ነዋይ ገበያ ሕገ-ደንብ ለህዝብ የማሳወቅና የቴክኖሎጂ መሰረተ ልማቶችን የማጠናቀቅ ሥራዎች እየተካሔዱ መሆኑን ገልጸዋል።

 ሥዩም ጌቱ ጌቱ 

ሸዋዬ ለገሠ

እሸቴ በቀለ