የእሥራኤል ጦር የሐማስ አዲሱ መሪ ያህያ ሲንዋርን የጋዛ ሠርጥ ውስጥ ባደረሰው ጥቃት ትናንት መግደሉን ዐሳውቋል ። የመሪው መገደል በአካባቢው ሰላም ለማስፈን «መልካም አጋጣሚ ነው» ሲሉ የዩናይትድ ስቴትስ ፕሬዚደንት ጆ ባይደን  ዛሬ ተናግረዋል ። ጀርመን ቤርሊን ውስጥ ከአውሮጳ መሪዎች ጋር የተወያዩት ፕሬዚደንቱ፦ እሥራኤል የሐማሱ መሪን መግደሏ «ፍትሕ የተፈጸመበት ቅጽበት ነው» ብለዋል ። ያህያ ሲንዋር «የአሜሪካኖች፤ የእሥራኤሎች እና የጀርመኖች ብሎም የሌሎች በርካቶች ደም እጁ ላይ ነበር» ሲሉም አክለዋል ።

ስቱዲዮ ከመግባቴ በፊት የዋሽንግተን ወኪላችን አበበ ፈለቀን በስልክ አነጋግሬዋለሁ ። ምዕራባውያን የሐማስ መሪ መገደል ሰላም ለማምጣት መልካም መንገድ ነው ቢሉም፥ የሐማስ ወታደራዊ ክንፍ ግን «ፍልስጥኤም ነጻ እስክትወጣ ድረስ» እንፋለማለን ሲል ዛሬ ዝቷል ። የሐማስ መሪ ያህያ ሲንዋር በእሥራኤል ጥቃት መገደል በምን መልኩ ነው በአካባቢው ሰላም ሊያመጣ ይችላል ተብሎ በዩናይትድ ስቴትስ እና አጋሮቿ የታሰበው የሚለውን ጥያቄ በማብራራት ይጀምራል ።

ከዩናይትድ ስቴትስ ፕሬዚደንት ጋር የተወያዩት የጀርመን ርእሰ-ብሔር ዖላፍ ሾልትስ በበኩላቸው፦ የሐማሱ መሪ መገደል በጋዛ ሠርጥ የተኩስ አቁም ተፈጻሚ እንዲሆን ያስችላል የሚል ተስፋ እንደሰነቁ ገልጠዋል ። የሐማስ መሪ ያህያ ኢብራሒም ሀሰን ሲንዋር መገደል ከተኩስ አቁሙ ባሻገርም ታጋቾችን ነጻ ለማድረግ ስምምነት ላይ ለመድረስ ያግዛልም ብለዋል ። በዚህ ረገድ የአሜሪካኖቹ ዕይታ ምን ይመስላል?

ያህያ ሲንዋር፦ ሐማስ መስከረም 26 ቀን፣ 2016 ዓ.ም ደቡባዊ እስራኤል ላይ በከፈተዉና በርካቶች በተገደሉበት ጥቃት ዋነኛ አቀናባሪ ነበሩ ተብሏል ። እስራኤል፣ ዩናይትድ ስቴትስ፣ የአዉሮጳ ኅብረት፣ ብሪታንያና ተከታዮቻቸዉ በአሸባሪነት የፈረጁት የፍልስጤሙ ታጣቂ ቡድን ሐማስ ፖለቲካዊ መሪ እስማኤል ሀኒዬህ ኢራን ቴህራን ከተማ ውስጥ ባለፈው ሐምሌ ወር ሲገደሉ እሳቸውን የተኩ መሪም ነበሩ ። በሁለት ወራት ከዐሥራ አምስት ቀናት ግድም ልዩነት ብቻ እሥራኤል የሐማስ ወታደራዊ መሪ እሥማኤል ሐኒዬን  እና አዲሱ የፖለቲካዊም የወታደራዊ መሪም የነበሩት ያህያ ሲንዋርን መግደሏ ምን አንደምታ አለው በተኩስ አቁሙ ሒደት ላይ?

አበበ ፈለቀ

ማንተጋፍቶት ስለሺ

ሸዋዬ ለገሠ