በማሊ 1300 ያህል ወታደሮችን ለተልዕኮ ያሰማራችው ጀርመን ከ 2020 እና 2021 መፈንቅለ መንግስት  ሰላምን የማስፈን እና ማሊንን የማረጋጋት ተልዕኮ እና ግብ ማሳካት ትችላለች ወይ ?የሚለው ጥርጣሬ እየጨመረ መጥቷል። 
በሞዕራብ አፍሪቃዊቷ ሀገር ማሊ ላለፉት ዘጠኝ ዓመታት የቆየው የጀርመን ጦር ከሰሞኑ አዲስ ፖለቲካዊ ክርክሮችን አስነስቷል።የጀርመን ወታደሮች ምንም እንኳ ሽብርተኝነትን ለመዋጋት ወደ ማሊ ቢያቀኑም የተመዘገቡት ውጤቶች ግን መጠነኛ መሆናቸው ይነገራል።ከዚያ ይልቅ በወታደሮቹ ላይ  የተደቀነው የደህንነት አደጋና ስጋት ከፍተኛ ነው። ሲሉ  ወታደራዊ ተልዕኮው እንዲያበቃ  የጀርመን ፖለቲከኞችን ይከራከራሉ።
በሌላ በኩል በማሌ ከነሀሴ  2020 ዓ/ም ጀምሮ በመፈንቅለ መንግስት ስልጣን የያዘው ወታደራዊ ሀይል በቅርቡ ይፋ ባደረገው መረጃ በሀገሪቱ ከምርጫ ይልቅ  ተቋማትን ለመገንባት እንዲሁም ተገቢ የፖለቲካና የተቋማት ማሻሻያ ለማድረግ አምስት የሽግግር  አመታት እንደሚያስፈልጉ አስታውቋል።ይህንን ተከትሎ የሀገሪቱ የፖለቲካ ፓርቲዎችም ይሁን ዓለም አቀፍ አጋሮች  ተቃውሞ እያሰሙ ነው። 
በጀርመን የውጭ ጉዳይ ሚኒስቴር የግዛት ሚንስትር  የሆኑት ካትጃ ኬል ከማሊ ከተመለሱ በኋላ ያለፈው ሰኞ በሰጡት መግለጫ፤ ሀገሪቱ ወደ ዲሞክራሲ እንድትመለስ ጥሪ አቅርበዋል።ያ ካልሆነ  ጀርመን ድጋፏን እንደማትቀጥል ተናግረዋል።  የውጭ ጉዳይ ሚንስቴር  አናሌና ባርቦክ በበኩላቸው የማሊ ወታደራዊ ሀይል ያቀረበው  ሀሳብ   በሀገሪቱ ሊካሄድ የታቀደውን ምርጫ  ለሌላ አምስት ዓመታት የማራዘም ግልፅ ምልክት በመሆኑ ኮንነውታል።
አንዳንዶችም  በማሊ የጀርመን  ወታደራዊ ተልዕኮ እንዲያበቃ  እያሳሰቡ ነው።  
ጀርመኖች ሊወጡ ስለሚችሉበት ሁኔታ በማሊም እየተነጋገረ ነው። ነገር ግን በሀገሪቱ ከሚገኙ  ሌሎች ወታደራዊ ክፍሎች ጋር ሲነጻጸር የጀርመን ወታደሮች ጥሩ እየሰሩ ነው። ይላሉ ማሊያውያኑ ወጣቶች  አቡባካር እና ቡባ። አቡባካር  እንደሚለው  በአሁኑ ወቅት ማሊውያን በአጠቃላይ የጠየቁት የፈረንሳይን መውጣት ነው። 
«በአሁኑ ጊዜ፣  ማሊያዊዉያን የሚጠይቁት የፈረንሳይን መውጣት ነው። ቀሪው በኋላ ይደርሳል። ጀርመኖች የመቆየት መብት አላቸው። ነገር ግን ከፈረንሳይ ጋር መሄድ ከፈለጉ መሄድ ይችላሉ።» 
ቡባ እንደሚለው ጀርመኖች ለመልቀቅ ቢወስኑ እንኳ እንደ ጓደኛ ይመለከታቸዋል። ጀርመን ከብዙ ዓመታት በፊት ነፃ እና ሉዓላዊት ማሊን የተቀበለች የመጀመሪያዋ ሀገር መሆኗን በማስታወስ። 
«ጀርመን ያን ውሳኔ ከወሰደች ከአሁን በፊት ማን እንደነበረች ትረሳዋለች ብዬ አምናለሁ። ዛሬ ካሉን ወዳጆች ውስጥ ከሩሲያ ቀድማ  ነፃ እና ሉዓላዊት ማሊን የተቀበለች የመጀመሪያዋ ሀገር ጀርመን ነች ማለት እችላለሁ ። ነገር ግን ጀርመኖች መልቀቅ ከፈለጉ ወይም ይህ ውሳኔ ትክክል ነው ብለው ካሰቡ፤ ያ ችግር አይደለም። አሁንም እንደ ጓደኛ እንቆጥራቸዋለን»" 
ማሊያውያን ይህን ይበሉ እንጅ በጀርመን ፖለቲከኞች ዘንድ ግን ወታደሮችን በማሊ ተሰማርተው እንዲቆዩ  የማድረጉ ነገር አጠራጣሪ ነው። ጀርመን  በአውሮፓ ህብረት ተልዕኮ ስር 300 ወታደሮችን ፤ በተባበሩት መንግስታት ተልዕኮ ስር ደግሞ 1000 የሚሆኑ ወታደሮችን በማሊ አሰማርታለች። የሁለቱም ተተልዕኮ  በመጭው  ግንቦት መጨረሻ ላይ ያበቃል። ከ 2020 እና 2021 መፈንቅለ መንግስት በኋላ  ሰላምን የማስፈን እና ማሊንን የማረጋጋት ተልዕኮ እና ግባቸውን ማሳካት ይችላሉ ወይ የሚለው ጥርጣሬው ግን እየጨመረ መጥቷል። 
በሌላ በኩል በማሊ ወታደራዊ ሀይል እና በቀድሞ ቅኝ ገዥዋ ፈረንሳይ መካከል ያለው የፖለቲካ ውጥረት እንዲሁም  የማሊ ወታደራዊ መሪዎች  በሀገሪቱ በተሰማሩ ዓለም አቀፍ  የውጭ ሀይሎች ላይ ያለው አጠቃላይ አሉታዊ አመለካከት በሀገሪቱ ውጥረት እንዲነግስ አድርጓል።የማሊ ወታደራዊ አመራር በቅርቡ የፈረንሳይ አምባሳደርን ከማሊ ያስወጣ ሲሆን፤ የዴንማርክ ወታደሮች በጥር ወር ባስቸኳይ እንዲወጡ ጠይቋል።  ለጀርመን ወታደራዊ ሀይሎች ደግሞ  ጊዜያዊ የበረራ እገዳ አውጥቷል። ይህንን ተከትሎ የጀርመን የመከላከያ ሚንስትር ክርስቲን ላምበሬች  ጀርመን በማሊ ስላላት  ተሳትፎ ጥርጣሬያቸውን ገልፀዋል። 
በባማኮ የሚገኘው የኮንራድ አድናወር ፋውንዴሽን (KAS) የሳህል ክልላዊ መርሃ ግብር ኃላፊ ኡልፍ ላሲንግ  ችግሩ የአውሮፓ ህብረት በተልዕኮው ምን እንደሚያሳካ  አለማወቁ ነው ይላሉ።
«ችግሩ የሚጀምረው የአውሮፓ ህብረት በተልዕኮው ምን እንደሚያሳካ  ስለማያውቅ ነው።ምክንያቱም በስልጠናው ምን አይነት ተፅዕኖ እና ውጤት እንደተገኘ ለመገምገም እና ወቅታዊ ምክርና ሂስ ለመስጠት ስልቶቹ  ጎድለዋል ።ምክንያቱም እዚህ  እየተሰራ ያለው በተስፋ መርህ ብቻ ነው።» 
በዚህ መሠረት የስልጠናው ተልዕኮ ውጤቶች በጣም መጠነኛ ናቸው።በአንድ በኩል የማሊ ጦር የሚሰለጥነው በተወሰነ መጠን ብቻ ሲሆን፤ በሌላ በኩል ውጤቱ ለማሊውያን ያን ያህል አስደሳች አይደለም።ይላሉ ላሲንግ።  
ከዚህ በተጨማሪ ላሲንግ እንደሚሉት በአጠቃላይ በአውሮፓ ህብረት አባል ሀገራት መካከል ያለው ትብብርም አነስተኛ ነው። 
ለሳህል አካባቢ ተመራማሪው ለዴኒስ ቱል፣ ከ2013 ዓ/ም ጀምሮ የዓለም አቀፉ ማህበረሰብ የጣልቃገብነት አካሄድ በጣም ደካማ ውጤት የነበረው ሲሆን፤ በአፍጋኒስታን ያጋጠመው ሁኔታም  በጀርመን እና በዓለም ላይ የተለዬ መልክ አምጥቷል። በዚህ የተነሳ የውጪ ተልዕኮዎች ውጤታማነት በአሁኑ ጊዜ የበለጠ ጥያቄ  ውስጥ እንደገቡ ተናግረዋል።
በወታደራዊ ጣልቃ ገብነት ብቻ ሚሊን ማረጋጋት አይቻልም የሚሉት ቱል፤ ያም ሆኖ ማሊ የተገለለች እና ጥገኛ ሀገር እንዳትሆን  ወደ ድርድር መምጣት አለባት ይላሉ።

ፀሀይ ጫኔ
አዜብ ታደሰ