በሱዳን ምዕራብ ዳርፉር በሁለት ጎሳዎች መካከል ካለፈው ዓርብ ጀምሮ በተቀሰቀሰ ግጭት የተገደሉ ሰዎች ቁጥር ወደ 83 ማሻቀቡን የአገሪቱ ሕክምና ዶክተሮች ማሕበር እና የዕርዳታ ሠራተኞች ተናገሩ። በግጭቱ ከ160 በላይ ሰዎች ተጎድተዋል። ትናንት ማታ አስቸኳይ ስብሰባ ያደረገው የሱዳን የጸጥታ እና መከላከያ ምክር ቤት ተጨማሪ ኃይል በአካባቢው እንዲሰማራ ውሳኔ ማሳለፉን የሱዳን መከላከያ ምኒስትር ሉቴናንት ጄኔራል ያሲን ኢብራሒም ተናግረዋል። 
በምዕራብ ዳርፉር ግዛት ዋና ከተማ ጌኔና በሚገኝ የተፈናቃዮች መጠለያ የተቀሰቀሰ የግለሰቦች ጠብ ወደ ጎሳ ግጭት ማደጉን አሶሼትድ ፕሬስ ዘግቧል። በጌኔና ከተማ በሚገኝ ሆስፒታል የሕክምና ዶክተር የሆኑት ሳላሕ ሳሌሕ ትናንት እሁድ ዛር በተባለ የተፈናቃዮች መጠለያ ጭምር ግጭት ተቀስቅሶ እንደነበር አረጋግጠዋል። ዶክተሩ እንዳሉት የግጭቱ ተጠቂዎች በጥይት ተገድለዋል፤ አሊያም ቆስለዋል። 
የተባበሩት መንግሥታት ድርጅት ዋና ጸሐፊ አንቶኒዮ ጉቴሬዝ በምዕራብ ዳርፉር የበረታው ግጭት እጅግ እንዳሳሰባቸው ሥጋታቸውን በቃል አቀባያቸው ስቴፈን ዱጃሪች በኩል ገልጸዋል። ዱጃሪች በቃል አቀባዩ ስም ባወጡት መግለጫ የሱዳን ባለሥልጣናት ኹኔታውን ለማረጋጋት እና ውጊያውን ለማብቃት ሁሉንም ጥረት እንዲያደርጉ አሳስበዋል። 
 

እሸቴ በቀለ 

አዜብ ታደሰ