በአማራ ክልል እየተካሄደ ያለው ግጭት እና ጦርነት በመስኖ ልማት ሥራዎች ላይ ከፍተኛ ጫና መፍጠሩን የአማራ ክልል መስኖና ቆላማ አካባቢዎች ልማት ቢሮ አስታወቀ። በዓመቱ መገንባት ከነበረባቸው 214 ፕሮጀክቶች 30ዎቹ ብቻ ስራቸው መጠናቀቁን ቢሮው አመልክቷል፡፡

ዉጥረት በአማራ ክልል

የአማራ ክልል መስኖና ቆላማ አካባቢዎች ልማት ቢሮ ኃላፊ ዶ/ር ዳኝነት ፈንታው ለጋዜጠኞች እንደተናገሩት በዓመቱ ለማከናወን ከታቀዱ 214 የመስኖ ፕሮጀክቶች መካከል የተጀመሩት 92 ብቻ ናቸው። ባለው የፀጥታ ችግር ምክንያት መጠናቀቅ የቻሉት ደግሞ 30 ፕሮጀክቶች ብቻ ናቸው ነው ያሉት፡፡

በአማራ ክልል የቀጠለዉ ዉግያ

ከጥናትና ዲዛይን አኳያም ቢሆን 78 ፕሮጀክቶች ለማጠናቀቅ እቅድ ቢያዝም ማከናወን የተቻለው 6ቱን ብቻ እንደሆነ ነው ቢሮ ኃላፊው ያስረዱት፡፡
ከፌደራል መንግስት መስኖና ቆላማ አካባቢዎች ልማት ሚኒስቴር ጋር በጋራ ከሚሰሩ 5 ግዙፍ ፕሮጀክቶች (Mega Projects) መካከልም ስራቸውን መጀመር የተቻለው የሁለቱን ብቻ እንደሆነ ዶ/ር ዳኝነት ገልጠዋል፡፡

በተፈጠረው የሰላም መደፍረስ ምክንያት ተሸከርካሪዎችን፣ ለመስኖ ስራ የሚሆኑ መሳሪያዎችን፣ ግብዐቶችን፣ ነዳጅና ሌሎች አስፈላጊ መሳሪያዎችን እንደልብ ማንቀሳቀስ ባለመቻሉ የመስኖ ስራዎችን መስራት እንዳልተቻለ ነው ያብራሩት፡፡

አማራ ክልል በረሀብ ሰዎች መሞታቸውን ተፈናቃዮች ተናገሩ

ጦርነቱና ግጭቱ በክልሉ ከፍተኛ ሰብአዊ ቀውስ ያስከተለ መሆኑን የሰብአዊ መብት ተቋማት የገለፁ ሲሆን፣ የአማራ ክልል ሰላምና ፀጥታ ቢሮ ትናንት በሰጠው መግለጫ ደግሞ እስከ 15 ቢሊዮን ብር የሚገመት ንብረት በጦርነቱ ምክንያት ወድሟል፡፡

ዓለምነው መኮንን
እሸቴ በቀለ