አፍሪቃ ዉስጥ  በኮሮና ተሕዋሲ የተጠቁ ሰዎች ቁጥር ከ5000 በለጠ። የአፍሪቃ በሽታ መከላከያ እና መቆጣጠሪያ ማዕከል እንዳስታወቀው ተሕዋሲው እስካሁን በ47 ሃገራትን ተሰራጭቷል። በተሕዋሲው የተጠቁ ሰዎች ቁጥርም 5,255 መድረሱን ነው ማዕከሉ ያስታወቀው።በየሃገራቱ የተሕዋሲውን ወረርሽኝ በአግባቡ ለመመርመር በቂ ቁሳቁስ አለመኖሩ በወረርሽኙ የተጠቁትን ሰዎች ቁጥር በትክክል መለየት እንዳልተቻለ እና ቁጥሩ ከዚህም ሊሻቅብ እንደሚችል የአሶሽየትድ ፕረስ ዘገባ ያሳያል።ይህ በእንዲህ እያለ ደቡብ አፍሪካ ቤት ለቤት የተሕዋሲው ምርመራ ልትጀምር መሆኑን የሀገሪቱ  ፕሬዚዳንት ሲሪል ራማፎሳ ትናንት ሰኞ ምሽት አስታውቀዋል። ደቡብ አፍሪካ ለነደፈችው የቤት ለቤት የምርመራ ዘመቻ አስር ሺ ያህል የመስክ ሰራተኞችን እንደሚሰማሩ ራማፎሳ ገልጸዋል። ሃገሪቱ በአፍሪካ ከፍተኛውን የኮሮና ተጠቂዎች ቁጥር የተመዘገበባት ሃገር ስትሆን ይህ ዘገባ እስከተጠናከረበት ሰዓት ድረስ 1,326 ሰዎች በተሕዋሲው ተለክፈዋል።ዑጋንዳ እና ቦትሰዋና ደግሞ የወረርሽኙን ስርጭት ለመከላከል በየሀገራቱ እንቅስቃሴ መከልከሉን ዘግይተው አስታውቀዋል።

 

ታምራት ዲንሳ 

አዜብ ታደሰ