ኢትዮጵያ ውስጥ አሁን ድረስ በቀጠለ በትጥቅ ግጭት የታገዘ የእርስ በርስ ጦርነት ፣ በኃይል ማፈናቀል እንዲሁም በድርቅ፣ በቅርቡ ደግሞ በከባድ ጎርፍ ምክንያት ከመኖሪያ ቀያቸው ተፈናቅለው የዕለት ጉርስ እርዳታ ጠባቂ የሆኑ ሰዎች እርዳታ ማግኘት ፈተና እየሆነባቸው መምጣቱን ነዋሪዎች ይገልፃሉ።

በሀገሪቱ እየተባባሰ የመጣው የፀጥታ ችግር ከፍተኛ ሰብዓዊ እና ቁሳዊ ጉዳት ከማድረስ አልፎ ኢኮኖሚያዊ እና ማህበራዊ ቀውስም ማስከተሉን የመብት ተቆርቋሪው የኢትዮጵያ ሰብዓዊ መብቶች ኮሚሽን በቅርቡ ማስታወቁ ይታወሳል።

በአማራ ክልል ከ50 በላይ ተፈናቃዮች ከርሀብ ጋር ሕይወታቸው ማለፉ

"ከቤት ንብረታቸው ተፈናቅለው የሰብዓዊ እርዳታ የሚፈልጉ ሰዎች ቁጥር ከጊዜ ወደ ጊዜ እየጨመረ በመምጣቱ በቂ የምግብ ድጋፍ፣ የንፁሕ መጠጥ ውኃ ፣ የህክምና አገልግሎት ፣እየቀረበ አለመሆኑን" ባደረገው ክትትል መገንዘቡን አስታውቋል።

የብሔራዊ አደጋ ሥጋት አመራር ኮሚሽን ዋና ኮሚሽነር አምባሳደር ሽፈራው ተክለማርያም ኢትዮጵያ ውስጥ የእርዳታ ፈላጊ ሰዎች ቁጥጥ መቀነሱን የዚህ ምክንያቱም አንድም ጊዜው የመኸር ወቅት መሆኑ ፣ በሌላ በኩል እርዳታ የሚሰጣቸው ዜጎች ላይ ጥብቅ ልየታ መጀመሩ መሆኑን ዛሬ ገልፀዋል።

ከአጠቃላይ አስቸኳይ የሰብአዊ ድጋፉ አቅርቦት ሃያ በመቶውን የሚይዘው እና ከውጪ ረጂ ድርጅቶች የሚገኘው የሰብዓዊ አቅርቦት ከአምስት ወራት መቋረጥ በኋላ ከአንድ ወር በፊት መጀመሩን የገለፁት ኃላፊው ይሁንና የሚቀርበው ድጋፍ ቀድሞ ከነበረው በ ሃያ በመቶ ዝቅ የተደረገ ከመሆኑ በላይ ለ አንድ አመት ለሙከራ በሚል መጀመሩ ሊታወቅ ይገባል ሲሉም ተናግረዋል።

የአሜሪካ የተራድኦ ድርጅት ( USAID ) እና የዓለም ምግብ ፕሮግራም ( WFP ) በትግራይ ክልል እርዳታ ተዘርፎ ላልተገባ ዓላማ ውሏል በሚል የሚያደርጉትን ድጋፍ አቋርጠው መቆየታቸው ይታወሳል። 

እነዚህ ድርጅቶች አሁን የጀመሩት እርዳታ ዳግም የመዘረፍ፣ ላልተገባ ጥቅም የማዋል እና ለግብይት ውሎ የሚገኝ ከሆነ ዳግም ድጋፉን ለማቋረጥ እንደሚገደዱ በብርቱ ማስጠንቀቃቸው ተሰምቷል።

ተፈናቃዮች በርዳታ እጦት እየተሰቃዩ ነዉ

ከዚሁ የእርዳታ ሥራ ጋር በተያያዘ በእርዳታ እህል ብክነትና ባልተገባ ጥቅም የተጠረጠሩ 375 ሰዎች በቁጥጥር ሥር መዋላቸውንም ኃላፊው ገልፀዋል።

የተረጂነት አዝማሚያ እና የተረጂ ቁጥር መብዛት ፣ ተጨማሪ ምርት አለመኖር፣ የሀገር ውስጥ ሀብትን ለዚህ አላማ በስፋት ማሰባሰብ አለመቻል ዋና ዋና ችግሮች መሆናቸውን የገለፁት የአምሳ ዓመት ታሪክ ያለውን ተቋም የሚመሩት አምባሳደር ሽፈራው ሰብዓዊ ድጋፍን በራስ አቅም ለመፍታት የሚያግዝ የ 250 ሺህ ሄክታር የሚታረስ መሬት ስለመገኘቱም ገልፀዋል።

አስቸኳይ ድጋፍ የሚሹት የዳሰነች ተፈናቃዮች

ከምክር ቤቱ የሠላምና የውጭ ግንኙነት ጉዳዮች ቋሚ ኮሚቴ የእርዳታ ፍትሐዊ አቅርቦት እና ዘላቂ መፍትሔ አማራጮች በትኩረት እንዲሰራባቸው ተጠይቋል። የራስ የእሳት አደጋ ተከላካይ ሄሊኮፍተሮች ጭምር የነበረትና ጠንካራ ነበር የተባለው ይህ መንግሥታዊ ተቋማ በዘመን ሂደት ቁልቁል የወረደ መሆኑ ተገልጾ ማንኛውም ቅጽበታዊ አደጋ ሲከሰት በብቃት ምላሽ መስጠት የሚችል ሆኖ ዳግም እንዲዋቀርም ምክር ቤቱ እገዛ እንዲያደርግ ተጠይቋል።

ሰለሞን ሙጬ 

እሸቴ በቀለ

ሸዋዬ ለገሠ