በደቡብ ክልል ጉራጌ ዞን በማረቆ እና በመስቃን መካከል ካለፈው ሳምንት ጀምሮ በተቀሰቀሰ ግጭት በርካታ ሰዎች መገደላቸውን የአካባቢው ነዋሪዎች እና አንድ የጉራጌ ዞን ባለሥልጣን ተናገሩ። ግጭቱ የተቀሰቀሰው የቀድሞው መስቃን እና ማረቆ ወረዳ ለሁለት ሲከፈል የዘጠኝ ቀበሌዎች ይገባኛል በፈጠረው ውዝግብ ነው ተብሏል።

በደቡብ ክልል ጉራጌ ዞን በማረቆ እና በመስቃን መካከል ካለፈው ሳምንት ጀምሮ በተቀሰቀሰ ግጭት በርካታ ሰዎች መገደላቸውን የአካባቢው ነዋሪዎች እና አንድ የጉራጌ ዞን ባለሥልጣን ተናገሩ። ግጭቱ የተቀሰቀሰው የቀድሞው መስቃን እና ማረቆ ወረዳ ለሁለት ሲከፈል የዘጠኝ ቀበሌዎች ይገባኛል በፈጠረው ውዝግብ መሆኑን የሀዋሳው የዶይቼ ቬለ ወኪል ሸዋንግዛው ወጋየሁ ዘግቧል። 
የአሁኑ ግጭት የተቀሰቀሰው በዞኑ የማረቆ እና የመስቃን ቤተ ጉራጌ ማህበረሰብ አባላት ተቀላቅለው በሚኖሩበት ምስራቅ መስቃን ወረዳ ባቴ ሌጃኖ በተባለ የገጠር ቀበሌ ውስጥ ነው። 
አንድ የአካባቢው ነዋሪ ግጭቱ በወሰን ይገባኛል ጥያቄ መቀስቀሱን ለዶይቼ ቬለ ገልጸዋል። ግለሰቡ እንዳሉት እስከአሁን ከሁለቱም የማህበረሰብ አባላት አስር ሰዎች ሲሞቱ ለጊዜው ቁጥራቸው ያልታወቁ የመኖሪያ ቤቶችና ንብረቶች ወድመዋል።  ዶይቼ ቬለ ያነጋገራቸው የጉራጌ ዞን መንግስት ኮሚኒኬሽን ጉዳዮች ኃላፊ አቶ ፈለቀ አባተ ግጭቱ መቀስቀሱን አረጋግጠዋል። የግጭቱ መነሾ በግለሰቦች መካከል እንጂ በሁለት ማኅበረሰቦች አይደለም ያሉት አቶ ፈለቀ የሟቾች ቁጥር ስድስት ብቻ ነው ብለዋል። 
በደቡብ ክልል ጉራጌ ዞን በማረቆና በመስቃን ወረዳ አዋሳኝ ቀበሌዎች ከሁለት ዓመታት በፊት ተመሳሳይ ግጭት ተቀስቅሶ ነበር። በወቅቱ እስካሁን ቁጥራቸው በውል ያልታወቀ ሲሞቱ በርካቶች ከቀያቸው ተፈናቅለው ነበር። 

ሸዋንግዛው ወጋየሁ

እሸቴ በቀለ