አዲስ አበባ ፒያሳ አካባቢ የሚገኘዉ አንበሳ ፋርማሲ ይፈርሳል መባሉ እንዳሳሰባቸዉ ብሎም እንዳሳዘናቸዉ የመድሐኒት ቤቱ ባለቤቶች ተናገሩ። በጀርመናዉያን ሁለተኛ እና በሦስተኛ ትዉልድ እየተንቀሳቀሰ ያለዉ ይህ ታሪካዊ የመድሐኒት ቤት መድሐኒት ከመቀመም አልፎ ፤ የሕክምና መገልገያ አስመጭ ድርጅት  ከፍቶ መንቀሳቀስ ከጀመረ ዓመታቶችን አስቆጥሮአል። በግልጋሎት ከ 75 ዓመት በላይ የሆነዉ አንበሳ መድሐኒት ቤት ከ 50 በላይ ሰራተኞች ያሉት እና ለተለያዩ ሆስፒታሎች መገልገያ ከባድ ቀዶ ጥገና የሚዉል እንደ ማደንዘዣ ያሉ የተለያዩ  መድሐኒቶችን የሚያቀርብ ድርጅት ነዉ።

ፒያሳ የሚገኘዉ እና በቅርስነት የተመዘገበዉ የአንበሳ መድሐኒት ቤት ባለቤት ጀርመናዊዉ ካርል ሂልደብራንት በንጉሱ ዘመን አባታቸዉ ኩርት ሂልደብራንድት የመሰረቱትን መድሐኒት ቤት በማስቀጠል ከልጆቻቸዉ ጋር ስራን  ከጀመሩ ከ 50 ዓመታት በላይ እንደሆናቸዉ ይናገራሉ። ካርል አንጋፋዉን መድሐኒት ቤት ልቀቁ መባላቸዉ ብቻ ሳይሆን ለሚያገለግሉት  ሕዝብ ብሎም  በስራቸዉ ያሉ ከ 50 በላይ  የሰራተኞቻቸዉ ጉዳይ እንደሚያሳስባቸዉ ተናግረዋል።   
 « አባቴ በ 1980 ዓ.ም ዉስጥ ከዚህ ዓለም በሞት ከተለየ በኋላ ነዉ ድርጅቱን ተረክቤ በማገልገል ላይ ነኝ ። አሁን  ከፋርማሲ ባለሞያዋ ከወ/ሮ ፋሲካ ከበደ ጋር እየሰራሁ እገኛለሁ።  መድሐኒት ቤቱ መድሐኒት ሽያጭ እና ቅመማ ብቻ ሳይሆን  «ፋርማ ሼር ካምፓኒ» የሚል ድርጅት ከፍተን ፤ የሕክምና መገልገያ መሳርያ እያስመጣን ለመላ ኢትዮጵያ አካባቢዎች ግልጋሎት እንሰጣለን።» 

ፋርማሲዉ መድሃኒት ሽያች ቅመማ እና ሕክምና ቁሳቁስ እንደሚያስመጣ የነገሩን የ81 ዓመቱ ጀርመናዊ  የአንበሳ ፋርማሲ ባለቤት ካርል የድርጅታዉ ሕንጻ ይፈርሳል መባሉ ከልብ እንዳሳዘናቸዉ ተናግረዋል። በጀርመን ሃገር የፋርማሲ ሞያን ያጠናቀቁት የአንበሳ ፋርማሲ ስራ አስኪያጅ ወ/ሮ ፋሲካ ከበደ በበኩላቸዉ  በ 3 ቀን ውስጥ እቃችሁን የማታወጡ ከሆነ እርምጃ እንወስዳለን የሚሉ ሰዎች መምጣታቸዉን አስረድተዋል።    
የከተማ አስተዳደሩ የቅርስ ቤቶች እንደማይፈርሱ በሃገር ዉስጥ የተለያዩ ሚዲያዎች ቢያሳዉቅም አዲስ አበባን ለማስዋብ በሚካሄደዉ ሥራ ቅርሶች እየፈረሱ መሆናቸዉ የከተማዉን ነዋሪ እያሳዘነም፤ እያሳሰበም፤ እያነጋገረም መሆኑን በርካቶች ይናገራሉ።  የአንበሳ መድሐኒት ቤት ይፈርሳል መባልን ለማጣራት የአንበሳ ፋርማሲ ስራ አስኪያጅ ወ/ሮ ፋሲካ ከበደ ወደ ቅርስ ጥናትና ጥበቃ ባለሥልጣን ሄደዉ እንደነበር ተናግረዋል። ቤቱን ከ 75 ዓመት ጀምሮ የተከራየነዉ ነዉ ዉሉን የፈፀምነዉ ከፌዴራል ኪራይ ቤቶች አስተዳደርዳር ነዉ ያሉት ወሮ ፋሲካ ኪራይ ቤቶች ጉዳዩን ለጊዜዉ አሳግዶልናል ቢሆንም አሁንም ዋስትና የለንም ሲሉ ስጋታቸዉን ገልፀዋል።

በአዲስ አበባ የሚገኘዉ የጀርመን ኤምባሲ የአንበሳ መድሐኒት ቤትን ድጋፍ መስጠትን ይመለከታል በሚል ለአዲስ አበባ ከተማ ምክትል ከቲባ ኢንጂኔር ታከለ ኡማ በፃፈዉ ደብዳቤ አዲስ አበባን ብሎም ኢትዮጵያን የጀርመን የመዋለ ንዋይ ፍሰት መዳረሻ ለማድረግ እንደሚያበራተታ አንድ ኤምባሲ፤ ጉዳዩ ሕጋዊ መንገድን መከተል አለበት ብለን እናምናለን። ምክንያቱም በእድሜ ጠገቡ የአንበሳ መድሐኒት ቤት ላይ አስተዳደሩ ይወስዳል የተባለዉ ርምጃ ሌሎች የጀርመን ባለ ኃብቶችን ሊያሸሽ ይችላል ሲል ደብዳቤዉን ለአዲስ አበባ ምክትል ከቲባ ልኮአል። ኤንባሲዉ በደብዳቤዉ አያይዞም ኮቪድ 19 እየተዛመተ ባለበት በዚህ ወቅት ደረጃቸዉን የጠበቁ መድሐኒት ቤቶች በጣም አስፈላጊ መሆናቸዉን ግምት ዉስጥ ማስገባት ያስፈልጋልም ብሎአል።

አዜብ ታደሰ

ታምራት ዲንሳ

እሸቴ በቀለ