ሰሜን አፍሪቃዊቷ አልጄሪያ ሐሙስ ታኅሣስ 2 ቀን፣ 2012 ዓም ፕሬዚደንታዊ ምርጫ አከናውናለች። የ74 ዓመቱ አዛውንት የቀድሞው ጠቅላይ ሚንሥትር አብደልማጂድ ቴቡኔ ምርጫውን ማሸነፋቸውን የሀገሪቱ የምርጫ ኮሚሽን ዐርብ ዕለት ይፋ አድርጓል። ታዲያ ምርጫው በተከናወነበት እለትም ኾነ ውጤቱ በተነገረበት ቀን ምርጫውን በመቃወም በመዲናዪቱ አልጀርስ እና ካቢላይ በተሰኘችው ከተማ በዐሥር ሺህዎች የሚቆጠሩ ሰዎች አደባባይ ወጥተዋል። ተቃዋሚዎች አብደልማጂድ በአልጄሪያውያን በተጠሉት የቀድሞው ፕሬዚደንት እና አስተዳደራቸው የነበሩ በመኾናቸው በእሳቸው ላይ እምነት እንደሌላቸው ነው የሚናገሩት። የተቃውሞ ሰልፈኞች «ምርጫ አንሻም! ፍላጎታችን ነጻነት ነው!» በማለት መፈክር ማሰማታቸውን የፈረንሳይ ዜና አገልግሎት ዘግቧል።

ከሰባት ወራት በፊት በሕዝብ ግፊት ሥልጣን የለቀቁትን ፕሬዚደንት አብደልአዚዝ ቡተፍሊቃን ለመተካት በተደረገው ምርጫ ያሸነፉት አብደልማጂድ ቴቡኔ እንደ ጎርጎሪዮስ አቆጣጠር በ2017 ዓም አልጀሪያን ለሦስት ወራት በጠቅላይ ሚንሥትርነት አገልግለዋል። ኃይለኛ የሚባሉት የሀገሪቱ የናጠጡ ሐብታም ነጋዴዎችን መቆጣጠር ስላልቻሉ ግን በወቅቱ ሥልጣናቸው ከሦስት ወራት በላይ መዝለቅ አልቻለም ነበር። በግላቸው የተወዳደሩት አብደልማጂድ ከአጠቃላይ መራጮች 58 በመቶ ድምጽ አግኝተው ነው ያሸነፉት። ከቀድሞው የአልጄሪያ መንግሥት ባለሥልጣናት መካከል ጠቅላይ ሚንሥትር የነበሩት የ75 ዓመቱ ዓሊ ቤንፍሊስ እና ሌላኛው ሚንሥትር አዜዲነ ሚኹቢ በመራጮች ዘንድ ዝቅተኛ ድምፅ የተሰጣቸው ናቸው። ተቃዋሚዎች እነዚህን ተፎካካሪዎች፦«የቀድሞው መንግሥት ልጆች» ሲሉ አጣጥለዋል።  

አልጄሪያ ነጻነቷን እንደ ጎርጎሪዮስ አቆጣጠር በ1962 ከፈረንሣይ ከተቀዳጀችበት ጊዜ አንስቶ በታሪኳ እንደ ሐሙስ ዕለቱ ምርጫ እጅግ ዝቅተኛ መራጮች የተሳተፉበት ጊዜ የለም። ከዐሥሩ አልጄሪያውያን ስድስቱ የሐሙሱ ምርጫ ላይ ድምጽ አልሰጡም። ለምርጫ ከተመዘገበውም በአጠቃላይ ድምጽ የሰጠው 40 በመቶው ብቻ መኾኑ ተገልጧል። ባለፈው የአልጄሪያ ፕሬዚደንት የመጨረሻው ምርጫ የዛሬ አምስት ዓመት ሲከናወን የወጣው መራጭ እንኳን ከዘንድሮው በዐሥር ከመቶ የተሻለ ነበር።  

ምርጫውንም ኾነ ውጤቱን በመቃወም አደባባይ የወጡ ሰልፈኞች ከፖሊስ ጋር መጋጨታቸው ተሰምቷል። በመዲናዪቱ አልጀርስም ኾነ በተለያዩ የሀገሪቱ ከተሞች ዐርብ ዕለት በርካታ ሰዎች ለተቃውሞ አደባባይ ወጥተዋል። ዓለም አቀፉ የሰብአዊ መብቶች ተቆርቋሪ ድርጅቱ አምነስቲ ኢንተርናሽናል፦ ከ12 በላይ የለውጥ አራማጆች አልጄሪያ ውስጥ ለእስር መዳረጋቸው ገልጧል።

በተለይ የትናንቱ ተቃውሞ የሒራቅ ንቅናቄ የተሰኘው ቡድን በየሳምንቱ ዐርብ አልጄሪያ ውስጥ የሚያስተባብረው 43ኛው የዐርብ ተቃውሞ ኾኖ ተመዝግቧል። ካለፈው የካቲት አንስቶ በተጠናከረ መልኩ ተቃውሞ በማስተባበር የሚታወቁት የንቅናቄው አራማጆች ምርጫውን ውድቅ አድርገውታል። የንቅናቄው አባላት አልጄሪያ የሚያስፈልጋት የቀድሞው ፕሬዚደንት መንግሥት አጋፋሪዎችን ሙሉ ለሙሉ የሚቀይር ሥር ነቀል የኾነ ለውጥ ነው የሚል እምነት አላቸው። 

አልጀሪያን ለኹለት ዐሥርተ-ዓመታት በፕሬዚደንትነት የመሩት አብደልአዚዝ ቡተፍሊቃ አራተኛ የሥልጣን ዘመናቸው ሊጠናቀቅ ጥቂት ሳምንታት ሲቀሩት ነበር ሥልጣን መልቀቃቸውን ያሳወቁት። 

ማንተጋፍቶት ስለሺ

ነጋሽ መሐመድ