በኮንጎው ምርጫ አሸንፈው ካለፈው ጥር አንስቶ ሃገሪቱን በፕሬዝዳንትነት የሚመሩት ፌሊክስ ሽስኬዲ ባለፈው ሰኞ የካቢኔያቸውን አባላት ይፋ አድርገዋል።ከ7 ወራት በኋላ ይፋ ከተደረገው የአዲሱ ካቢኔ ዝርዝር ውስጥ አብዛኛዎቹ የቀድሞው ፕሬዝዳንት የጆሴፍ ካቢላ «የጋራ ግንባር ለኮንጎ» በእንግሊዘኛው ምህጻር FCC  ፓርቲ አባላት ናቸው። የሽስኬዲ «የለውጥ አቅጣጫ» ፓርቲ የተረፈውን ቦታ ወስዷል።

የ56 ዓመቱ ሽሴኬዲ ሥልጣን እንደያዙ ፈጣን ለውጥ ለማካሄድ እና ሙስናን ከስሩ ለመመንገል ቃል ገብተው ነበር ይሁን እና ከ7 ወራት በላይ የወሰደው የመንግሥት ምሥረታ፣እቅዳቸውን አጓቶባቸዋል ተብሏል። በጎርጎሮሳዊው ታህሳስ 30 የተካሄደውን ምርጫ አሸንፈው ሥልጣን የያዙት ሽስኬዲ ከተጣማሪያቸው ከካቢላ ፓርቲ ጋር በደረሱበት ስምምነት ከ66 የሚኒስቴር ሃላፊነት ቦታዎች ፓርቲያቸው የወሰደው 24ቱን ነው። 42ቱ ደግሞ ለካቢላ ፓርቲ ተሰጥቷል። ባለፈው ዓመቱ የኮንጎ አወዛጋቢ ምርጫ የካቢላ ፓርቲ FCC ከኮንጎ ምክር ቤት 485 መቀመጫዎች 342 ቱን ነው ያሸነፈው።

በመንግሥት ምሥረታው ዜና የኮንጎ ዋና ከተማ የኪንሻሳ ነዋሪዎች የረኩ ይመስላል። አዎንታዊ አስተያየቶቻቸው ያመዝናሉ። «13 ሴቶች በአዲሱ መንግሥታችን ተካተዋል። ከሁሉም በላይ ብዙ አዳዲስ ሰዎች አሉበት።ለሁሉም አዳዲስ ሚኒስትሮች መልካሙን እንመኛለን» ብላለች አንዲት ሴት ለዶቼቬለ ኪስዋህሊ ክፍል በሰጠችው አስተያየት። ሌላዋ ደግሞ «አዲሱን መንግሥት ተቀብለናል፤ምክንያቱም አብዛኛዎቹ የበፊተኞቹ ባለሥልጣናት ተነስተው ያልተነካ ጉልበት ባላቸው ተተክተዋል። ለኮንጎ ህዝብ መልካሙን እያደረጉ መሆን አለመሆኑን ግን በቅርበት እንከታተላለን።»ብለዋል።

ፕሬዝዳንት ሽስኬዲ እና ጠቅላይ ሚኒስትር ሲልቬስትሬ ኡሉንጋ በርካታ ቁጥር ካለው አዲሱ ካቢኔ ጋር ቃል የገቧቸውን ተግባራዊ ያደርጋሉ ተብሎ ይጠበቃል።በአሁኑ ጊዜ ህዝቡ ተስፋ የጣለው በካቢላ ተከታዮች ላይ ሳይሆን አዳዲስ ሃሳቦች ያፈልቃሉ ተብለው በሚጠበቁት በአዳዲሶቹ ሚኒስትሮች ላይ ነው።ሆኖም የሲቪክ ማህበራት በአዲሱ ካቢኔ የቀድሞው መንግሥት ካድሬዎች አሉበት ሲሉ እያማረሩ ነው። «የአፍሪቃ ማህበራት ለሰብዓዊ መብቶች»የተባለው የኮንጎ የሰብዓዊ መብት ተሟጋች ድርጅት ሊቀመንበር ክሎድ ካቴንዴ እነዚህ ተሿሚዎች የሹመቱን መስፈርት አያሟሉም ይላሉ።

«በአዲሱ መንግሥት በጠቅላይ ሚኒስትሩ የወጡ የምርጫውን መስፈርቶች የማያሟሉ አንዳንድ የቀድሞ ሃላፊዎች እንደገና ተሹመዋል። እኛ የኮንጎ የሲቪል ማህበረሰብ ፣መንግሥት በሕገ መንግሥቱ መሠረት ሃላፊነቱን እንዲወጣ እና የኮንጎ ህዝቦችን ጥቅሞች እንዲያስከብር ጥሪ እናቀርባለን።»

ከሃገር ውስጥ እነዚህን የመሳሰሉ ቅሬታዎች የቀረቡበት የአዲሱ መንግሥት ካቢኔ ምሥረታ ከጀርመን እና ከአውሮጳ ህብረት አዎንታዊ አስተያየት ተሰጥቶታል።በኪንሻሳ የጀርመኑ ኮንራድ አደናወር የተባለው ድርጅት ተወካይ ቤኖ ሙሽለር ለዶቼቬለ በሰጡት ቃለ ምልልስ በዴምክራሲያዊት ሪፐብሊክ ኮንጎ መንግሥት መመሥረቱ እንደ ጥሩ ምልክት የሚወሰድ ነው ብለዋል።በተለይም በአዲሱ መንግሥት የአውሮጳ ህብረት ማዕቀብ ከጣለባቸው 14 ከፍተኛ ባለሥልጣናት አንዱንም አለማካተቱን መገንዘብም ይገባልም ብለዋል።

በጎርጎሮሳዊው 2017 የአውሮጳ ህብረት የኮንጎን የምርጫ ሂደት አስተጓጉለዋልና ከርሱ ጋር ተያይዞ በተከሰተው የሰብዓዊ መብት ጥሰትም ተካፍለዋል የተባሉ አንዳንድ የኮንጎ ፖለቲከኞች ላይ ማዕቀብ ጥሎ ነበር።አዲሱ መንግሥት ከጀርመን እና ከአውሮጳ ጋር አዲስ የግንኙነት ምዕራፍ ለመክፈት ፍላጎት እንዳለው እያሳየም መሆኑን ተናግረዋል።የጀርመን መንግሥትም እንዲሁ ከኮንጎ ጋር የነበረውን ግንኙነት ለማዳስ ይፈልጋል።። «የጀርመን የልማት ተራድኦ ሚኒስትር ጌርድ ሙለር በቅርቡ ኪንሻሳን በጎበኙበት ወቅት አዲሱ መንግሥት እንደተመሰረተ በጎርጎሮሳዊው 2017 ካቢላ ሥልጣናቸው ከሕገ ውጭ ካራዘሙ በኋላ የተቋረጠውን የጀርመን ኮንጎን ውይይት ለመቀጠል እንደሚፈልጉ አስታውቀዋል።»

የሲቪል ማህበራት በአዲሱ ካቢኔ ሴቶች ከሹመቶቹ  17 በመቶ ብቻ ማግኘታቸውን ተቃውመዋል።ቢያንስ 30ው የሚኒስትርነት ሃላፊነት ለሴቶች እንዲሆን ጠይቀው ነበር። ከዚህ ሌላ የካቢላ ፓርቲ የመከላከያ እና የፍትህ ሚኒስቴር መስሪያ ቤቶችን መያዙ ካቢላ ወደፊትም በሃገሪቱ ፖለቲካ ዋነኛ ሚና እንደሚኖራቸው አያጠያይቅም እየተባለም ነው። ሙሽለር እንዳሉት ካቢላ በፓርላማው አብላጫ መቀመጫ ያለው የፓርቲያቸው የFCC ሊቀ መንበር ናቸው። በሌላ በኩል ደግሞ የቀድሞ ፕሬዝዳንት በመሆናቸው የእድሜ ልክ ሴናተር ናቸው። በሕገ መንግሥቱ መሠረት በጎርጎሮሳዊው 2023 እንደገና ለፕሬዝዳንትነት መወዳደር ይችላሉ። ከዚህ በመነሳትም ካቢላ ሥልጣኑን መልሰው እጃቸው ለማስገባት የመፈለጋቸው ምልክት ይታያል ብለዋል። እናም እንደ ሙሽለር፣ ሽስኬዲ ከከባሊ እና ከርሳቸው ቡድን ገዝፈው መውጣት መቻል አለመቻላቸው ወደፊት የሚታይ ይሆናል።    

አንቶንዮ ካስካይስ

ኂሩት መለሰ