የአድዋ ድል 127ኛ ዓመት መታሰቢያ ዛሬ የካቲት 23 ቀን 2015 በአዲስ አበባ ከተማ በሁለት የተለያዩ ስሜቶች ተከብሯል። በመሀል አዲስ አበባ በሚገኘው የምኒሊክ ሐውልት አጠገብ በዓሉን ለማክበር የተሰበበሰቡ ታዳሚያንን የጸጥታ አስከባሪዎች በኃይል በትነዋል።

የኢትዮጵያ መከላከያ ሠራዊት በመስቀል አደባባይ ያዘጋጀው ሁለተኛ ዝክር ከባድ የጦር መሣሪያዎች በሰልፍ የታዩበት ነው። ማለዳ ከምኒሊክ ሐውልት ሥር ጉንጉን አበባ ያኖሩት ርዕሠ-ብሔር ሣህለ ወርቅ ዘውዴ በመስቀል አደባባይ በነበረው መርሐ-ግብር ታድመዋል። የኢትዮጵያ መከላከያ ሠራዊት አዛዦች እና የክልል መንግሥታት ፕሬዝደንቶች የተገኙበት ሁለተኛው የአድዋ ዝክር በወታደራዊ ሰልፍ የታጀበ ነበር።

ሁለቱም መርሐ ግብሮች ለነጻነታቸው ቀናዒ የነበሩ ኢትዮጵያውያን ባሕር ተሻግሮ፤ ድንበር አቋርጦ የመጣባቸውን የጣልያን ወራሪ ጦር ድል የነሱበትን 127ኛ ዓመት ለመዘከር የተዘጋጁ ናቸው። አድዋ ሲዘከር በታሪክ ስማቸው የሚነሳ የቀድሞ የአገሪቱ መሪዎች እና የጦር አበጋዞች ተክለ ስብዕናዎች የሚሰጣቸው ትኩረት የመወዛገቢያ ማዕከል ሆኖ ይታያል። ለመሆኑ አድዋ እንዴት ይዘከር? በዚህ መሰናዶ በአዲስ አበባ ዩኒቨርሲቲ የፖለቲካ ንድፈ ሐሳብ፣ የመንግሥት እና ሕብረተሰብ ግንኙነት ተመራማሪው ዶክተር ዮናስ አሽኔ እና የታሪክ ተመራማሪው ዶክተር ኢብራሒም ሙሉሸዋ ሐሳባቸውን አጋርተዋል።

ሙሉ መሰናዶውን ለማድመጥ የድምጽ ማዕቀፉን ይጫኑ

እሸቴ በቀለ

ነጋሽ መሐመድ