የኑክሌር ሳይንቲስቶች እና ከፍተኛ ወታደራዊ መኮንኖችን ጨምሮ ኢራን ከእስራኤል ባደረገችው ውጊያ የተገደሉ 60 ሰዎች ብሔራዊ ሥርዓተ ቀብር ተፈጸመ።

በማዕከላዊ ተሒራን በተካሔደው ሥርዓተ ቀብር ፕሬዝደንት ማሱድ ፓዤሽኪያን፣ የኢራን መንፈሳዊ መሪ አያቶላሕ አሊ ኻሚኒ ከፍተኛ አማካሪ ሬር አድሚራል አሊ ሻምክኻኒ እና በአስር ሺሕዎች የሚቆጠሩ ኢራናውያን ታድመዋል።

ሬር አድሚራል አሊ ሻምክኻኒ ቆስለው በከዘራ ሲንቀሳቀሱ መታየታቸውን የፈረንሳይ ዜና አገልግሎት ዘግቧል። ባለፈው ሐሙስ ኢራን በእስራኤል ላይ ድል መቀዳጀቷን ያወጁት አሊ ኻሚኒ ራሳቸው ግን በመርሐ-ግብሩ ላይ አልተገኙም።

በሥርዓተ-ቀብሩ የተሳተፉ ኢራናውያን የሟቾችን ፎቶግራፎች ይዘው፣ መፈክር እያሰሙ የኢራንን ሰንደቅ ዓላማ ሲያውለበልቡ ታይተዋል። ከሐዘንተኞች መካከል “ሞት ለአሜሪካ” “ሞት ለእስራኤል” የሚል መፈክር ማሰማታቸውን የኢራን ብሔራዊ ቴሌቭዥን ጣቢያ አሳይቷል።

የቀድሞው የኢራን ጦር ጠቅላይ አዛዥ ሜጀር ጄኔራል ሞሐመድ ባግሔሪ አብረዋቸው ከተገደሉት ከባለቤታቸው እና ከጋዜጠኛ ልጃቸው ጋር እንደሚቀበሩ የፈረንሳይ ዜና አገልግሎት ዘግቧል።

የኑክሌር ሳይንቲስት የነበሩት ሞሐመድ መኸዲ ቴሕራንቺ በተመሳሳይ ሥርዓተ ቀብራቸው ከባለቤታቸው ጋር ይቀበራሉ። 

በውጊያው የመጀመሪያ ቀን የተገደሉት የኢራን አብዮታዊ ዘብ አዛዥ ሑሴይን ሳሊ ሥርዓተ ቀብር ነገ እሁድ ይፈጸማል።

ለ12 ቀናት በዘለቀው ግጭት እስራኤል ከ20 በላይ ከፍተኛ የኢራን ወታደራዊ መኮንኖችን እንደገደለች የጀርመን ዜና አገልግሎት ዘግቧል። አንዳንዶቹ የተገደሉት በመኖሪያ ቤታቸው ነበር።

የኢራን እና የእስራኤል ግጭት በዚህ ሣምንት የቆመው ዩናይትድ ስቴትስቁልፍ የኑክሌር ጣቢያዎች ላይ ጥቃት በመፈጸም በቀጥታ ከተሳተፈች በኋላ ነበር።

ኢራን እና እስራኤል በየፊናቸው ግጭቱን በአሸናፊነት እንደተወጡ ይገልጻሉ። በግጭቱ የተሳተፈችው አሜሪካ የኢራን የኑክሌር ጣቢያዎች መውደማቸውን ገልጻለች።

ኢራን በግጭቱ ምክንያት ተዘግተው ከቆዩት መካከል የማዕከላዊ እና ምዕራባዊ የሀገሪቱ ክፍሎችን ሰማይ ለዓለም አቀፍ በረራዎች ዛሬ ቅዳሜ መክፈቷን የሀገሪቱ መንግሥት የሚቆጣጠረው ኑር ኒውስ ዘግቧል።