ከኪር እና ማቻር ውይይት ምን ይጠበቃል?

የደቡብ ሱዳን ፕሬዝዳንት ሳልቫ ኪር እና ተቀናቃኛቸው ሪየክ ማቻር ከአንድ አመት ገደማ በኋላ ለመጀመሪያ ጊዜ በዛሬው ዕለት በጁባ ከተማ ተገናኝተዋል። ሁለቱ የቀድሞ የትግል አጋሮች እና የዛሬ ባላንጦች ፊት ለፊት የተገናኙት ሪየክ ማቻር በስደት ከኖሩባት ሱዳን ወደ ጁባ አቅንተው ነው። ሁለቱ ፖለቲከኞች ለደቡብ ሱዳንን ፖለቲካዊ ውጥንቅጥ መፍትሔ ለማበጀት የሰላም ስምምነት ቢፈራረሙም እስካሁን ገቢራዊ የሆነ ነገር የለም። ኪር እና ማቻር በተፈራረሙት ስምምነት መሠረት እስከ መጪው ኅዳር የአንድነት መንግሥት መመስረት ይበቅባቸዋል። መሪዎቹ ከሚመክሩባቸው ጉዳዮች አንዱ ይኸው መሆኑን የደቡብ ፕሬዝዳንት ፅህፈት ቤት አስታውቋል።

ከዚህ በፊት ሪየክ ማቻር እና ሳልቫ ኪርን ለማሸማገል የተደረጉ ጥረቶች «ይኸ ነው የሚባል ትልቅ ውጤት ሲያመጡ አልታየም» የሚሉት የምሥራቅ አፍሪካ የፖለቲካ ጉዳዮች አጥኚው አቶ አቤል አባተ ሁለቱ ፖለቲከኞች ፊት ለፊት ሲገናኙ ለደቡብ ሱዳን ቀውስ መፍትሔ የማበጀታቸው ነገር «አጠያያቂ»  እንደሆነ ይናገራሉ።

«በሳልቫ ኪር በኩል የቀረቡ ጥያቄዎች በአይነትም በይዘትም እየተለዋወጡ እስካሁን ደርሰዋል። ሪየክ ማቻር ደግሞ የፖለቲካ ካፒታላቸው ባነሰ እና በፈረጠመ ቁጥር የሚያነሷቸው ጥያቄዎች እንዲሁ ከፍ እና ዝቅ የማለት አዝማሚያ አላቸው» ሲሉ አቶ አቤል ያብራራሉ።

«ሥልጣን በደቡብ ሱዳን በመንግሥት ሥልጣንነቱ ብቻ ሳይሆን የሀብት ማፍሪያ መንገድ የልዕልና መገለጫ» ሆኖ ያገልግላል የሚሉት አቶ አቤል በአንድ በኩል ሥልጣንን የማስጠበቅ፤ በሌላ በኩል ደግሞ ሥልጣን የመጋራት ፍላጎት በርትቶ ይታያል ብለዋል።

 

እሸቴ በቀለ

አዜብ ታደሰ