«ከመፍራቴ የተነሳ አነስ ያለ ቢላ ይዤ ነበር የምተኛው። ራሴን ስለመከላከል የሚባል ነገር አስቤ ዐላውቅም፤ ምክንያቱም እሱ ከእኔ በሦስት እጥፍ ጠንካራ ነው።»

ካሜሩናዊቷ ጋዜጠኛ ኪቲ ክሪስ ታይል ነበረች ፆታዊ ጥቃት (GBV) በተደጋጋሚ እንደሚያጋጥማት የተናገረችው። በጓደኛዋ ተደጋጋሚ ድብደባ ደርሶባታል። በየጊዜውም ያበሻቅጥ እና ያንቋሽሻት እንደነበረም ገልጣለች።

የተባበሩት መንግሥታት ድርጅት እንዲህ አይነቱን በደል «የተሸሸገ ወረርሺኝ» በማለት ይጠራዋል። በሴቶች ላይ የሚከሰት የወሲብ ጥቃት እና በደል ብሎም ግድያ ባለፉት ወራት በአፍሪቃ እንዲሁም በመላው ዓለም ቊጥሩ ጨምሯል። የዚህ ምክንያቱ ደግሞ የኮሮና ወረርሺኝ ነው ብሏል ዓለም አቀፍ ድርጅቱ።  በአፍሪቃ በኮሮና ተሐዋሲ የተነሳ የሚታመሙ ሰዎች ሲጨምሩ የጾታ ጥቃቶችም ተበራክተዋል።

ምዕራብ አፍሪቃዊቷ ላይቤሪያ ውስጥ ከጥር እስከ ሰኔ ባሉት ስድስት ወራት ብቻ ፆታዊ ጥቃቶች ከ50 በመቶ በላይ ተመዝግበል። በእነዚህ ጊዜያቶች ከ600 በላይ የፆታዊ ጥቃቶች መከሰታቸው ተመዝግቧል። ከአንድ ዓመት ቀደም ብሎ ባሉት 12 ወራት በአጠቃላይ የተመዘገበ የፆታ ጥቃት 803 ነበር።

ናይጄሪያ ውስጥም በኮሮና ወረርሺኝ እንቅስቃሴ በታገደበት ወቅት ፆታዊ ጥቃቶች ተበራክተዋል። በተለይ ሰኔ ወር ውስጥ ኹለት ወጣት ሴቶች ተደፍረው መገደላቸው በሀገሪቱ ብርቱ ቊጣ ቀስቅሶ ነበር። ኬንያ ውስጥ በኮሮና ምክንያት ትምሕርት ቤት በተዘጋበት ወቅት 4000 ተማሪዎች  ማርገዛቸውን መገናኛ አውታሮች ዘግበዋል። አብዛኛዎቹ ተማሪዎች ያረገዙት በቤተሰብ አባላት አለያም በፖሊሶች መኾኑም ተጠቅሷል። 

መካከለኛው አፍሪቃ ሪፐብሊክ  ውስጥ የተባበሩት መንግስታት ሰላም አስከባሪ ጦር (MINUSCA)እንዳወጣው ዘገባ ከኾነ ፆታዊ ጥቃቱ ካለፈው ዓመት በሩብ ግድም ጨምሯል። ለሴቶች መብት የሚከራከረው እኩልነት አኹኑኑ የተሰኘው መሥሪያ ቤት ባልደረባ ዦን ፖል፦ ችግሩ የተባበሩት መንግሥታት እንደሚለው «የተሸሸገ ወረርሺኝ» አይደለም። ቀድሞም የነበረ እንጂ።

«ወረርሺኙ ከዚህ ቀደም የማይታዩት የነበሩትን የተሸሸጉበትን ጨርቅ ነው የገፈፈው። ችግሩ ጨምሯል፤ ግን አልነበረም ማለት አይደለም። ከዚህ በፊትም ነበር፤ እናም አኹን መንግሥት እውነተኛውን ኩኔታ እንዲመለከት ዐይኑን ከፍቶለታል።»

ደቡብ አፍሪቃ ውስጥ እንደ ፖሊስ መረጃ በእየ ሦስት ሰአቱ አንዲት ሴት ትገደላለች። የሀገሪቱ ፕሬዚደንት ሲሪል ራማፎዛ ባለፈው ግንቦት ወር ላይ የችግሩ አሳሳቢነት ሲገልጡ «በሴቶች ላይ የተከፈተ ጦርነት» እስከማለትም ደርሰው ነበር።  

ፆታዊ ጥቃት ኢትዮጵያ ውስጥም በኮሮና ወረርሽኝ ወቅት ከፍተኛ መነጋገሪያ ኾኗል። በሴቶች ላይ የሚደርስ ወሲባዊ ጥቃት እንዲሁም ህጻናት ወንዶች ላይ በግብረ ሰዶም የሚፈጸም ጥቃት በርካታ ተቋማት ብሎም የመብት ተሟጋቾች ተጠናክረው እንዲወጡ አድርጓል።

ማንተጋፍቶት ስለሺ