ባለፈው ሳምንት ዓርብ ዕለት በሰሜናዊ ናይጀሪያ በምትገኘው ካንካራ መንደር በሳይንስና ቴክኒዌሎጂ የወንዶች አዳሪ ትምህርት ቤት የሚማሩ ተማሪዎች ድንገት በአፋኞቻቸው መከበባቸውን ከእገታው የተረፈው አንድ ተማሪ እንዲህ ገልጿል።

«ዓርብ ዕለት ምሽት ከወደማደሪያችን ስንመለስ ድንገት ስንመለስ እና ለመተኛት ስንዘጋጅ፤ በድንገት የተኩስ ድምፅ ሰማን እና ሁሉም፤ እያንዳንዱ ተማሪ ከማደሪያው ወጥቶ መሮጥ ጀመረ። ጠብመንጃ አላቸው፤ ትላልቅ ጠብመንጃዎች፣ ስለዚህ ሰበሰቡን እና ከትምህርት ቤቱ እንድወጣ አደረጉን። ሄድን ,,, ወደጫካው ዝም ብለን ሄድን።»

ከዚያም አጋቾቹ ጫካ ውስጥ እንዲተኙ አደረጓቸው። ቆየት ብለው እንዲነሱ ትዕዛዝ ሲሰጡ ትረፍ ያለው ይህ ልጅ ዛፍ ስር ተጠግቶ ከተኛበት ሳይነሳ ዓርብ ማታ እና ቅዳሜ እዚያው ጫካ ውስጥ አሳልፎ እሁድ ዕለት ወደ መንደሩ መመለስ ቻለ። ከእሱም ሌላ አንድ ተማሪም በጫካው ጉዞ አምልጧል። 15ቱን ደግሞ የናይጀሪያ ወታደሮች ከአጋቾቹ ማስጣል ተሳክቶላቸዋል። የታገቱት ከ330 እንደሚበልጡ ነው የተነገረው። እገታው በተፈፀመበት ወቅት የመንግሥት ኃይሎች ከትምህርት ቤቱ ሲደርሱ ግቢው ውስጥ የተረፉት ስድስት ተማሪዎች ብቻ ነበሩ። ለዕገታው  «የምዕራባውያን ትምህርት የተከለከለ ነው» የሚለው ቦኮ ሀራም የተባለው ፅንፈኛ እስላማዊ ቡድን ባሰራጨው የቪዲዮ መልእክት ኃላፊነቱን ወስዷል።  የናይጀሪያ መንግሥትም ተማሪዎቹን ካገተው ቡድን ጋር ልጆቹን ለማስለቀቅ እየተነጋገረ መሆኑን የመንግሥት ቃል አቀባይ ጋርባ ሼሁ በሰጡት መግለጫ አስታውቀዋል።

የታገቱት ተማሪዎች ወላጆች በጎርጎሪዮሳዊው 2014 ዓ,ም ተማሪ ሴቶችን አስመልክቶ የታየው የአጋች ታጋች ውዝግብ እንዳይደገም ስጋት እንዳላቸውም እየተናገሩ ነው። የወላጆቹ መሠረታዊ ስጋት አንድም ተማሪዎቹ አስተሳሰባቸው ሊለወጥ ይችላል፤ አንድም ፍለጋው ዓመታት ሊፈጅ ይችላል የሚል እንደሆነም ተገልጿል።  ከታጋቾቹ የአንዱ ወላጅ መንግሥት ዲፕሎማሲ ቢጠቀም ይሻላል ይላሉ።

«መንግሥት ልጆቹን በጥሩ ሁኔታ ለማዳንና በደህና ለመመለስ ዲፕሎማሲ መጠቀም ይኖርበታል። አስቀድመን ማድረግ የሚገባን ምን እንደሆነ አውቃለሁ መጸለይ ነው፤ እየጸለይን ነው።»

በትምህርት ቤቱ አቅራቢያ መዋል ማደር የጀመሩት ወላጆች ከመንግሥት አንዳች ምላሽ ጠባቂዎች መሆናቸውን ይናገራሉ። ልጆቻቸውን በማጣታቸው የሚያለቅሱት እናቶች ለታገቱት ልጆች ብቻ ሳይሆን ለመላ ናይጀሪያ እንደሚያለቅሱም በምሬት ነው የገለጹት። ወታደራዊ ተሽከርካሪዎች በቅራቢያቸው ባለፉ ቁጥር ካሁን አሁን ልጆቻቸውን ይዘው የመጡ እየመሰላቸውም በጉጉት ይመለከቷቸዋል። መላው ናይጀሪያ የእነዚህን ልጆች ዕጣ ፈንታ ለመስማት በትኩረት ይከታተላል። በናይጀሪያ ተጠናክሮ የቀጠለውን ጥቃት ማስቆም አልቻለም በሚልም በመንግሥት ላይ ትችቱን ያወርዳል። አቡጃ ላይ ጋዜጣ በመሰጥ የሚተዳደሩት የ58 ዓመቱ ሳቪስተር አንችኬ በናይጀሪያ የፀጥታ ይዞታ እንኳን አዋቂው ልጆችም ደስተኛ አይደሉም ነው ያሉት። አምነስቲ ኢንተርናሽናል የፀጥታ ይዞታዋ ባልተረጋጋው ሰሜናዊ ናይጀሪያ ትምህርት ስጋት ላይ መውደቁን አመልክቷል። ከጎርጎሪዮሳዊው 2012 ዓ,ም ጀምሮ በመቶዎች የሚቆጠሩ መምህራንና ተማሪዎች በቦኮ ሀራም መታገታቸውን በማመልከትም ድርጊቱን አጥብቆ እንደሚያወግዝ አስታውቋል። የናይጀሪያ መንግሥትም የሀገሪቱ የትምህርት ዘርፍ በዚህጽንፈኛ ቡድንም ሆነ በሌሎች ታጣቂዎች ስጋት ስር እንዳይቀድ የማድረግ ኃላፊነት እንዳለበትም አሳስቧል። ናይጀሪያውን ከስድስት ዓመታት በፊት ሴት ልጆቻችንን መልሱ፤ ቢሪንግ ባክ አወር ገርልስ፤ የሚለውን መሪ ቃል ከሁለት መቶ በላይ ለሚሆኑት ያኔ ከቺቦክ አዳሪ ትምህርት ቤት ለታገቱት ሴት ተማሪዎች ባደረጉት ዘመቻና ቅስቀሳ ለዓለም አስተጋቡ። ዘንድሮ ደግሞ ወንድ ልጆቻችንን መልሱ፤ ብሪንግ ባክ አወር ቦይስ እያሉ ነው። አጋቾችም ሆኑ የመንግሥት ኃይሎች ይህን አቤቱታ ሰምተዋል።

ሸዋዬ ለገሠ 

እሸቴ በቀለ