የኢትዮጵያ ብሔራዊ ምርጫ ቦርድ «አስቻይ ሁኔታዎች ባሉበት» ባላቸዉ የሐገሪቱ አካባቢዎች ዘንድሮ 7ኛዉን ብሔራዊ ምርጫ ለማድረግ እየተዘጋጀ ነዉ።ቦርዱ «አስቻይ ሁኔታ» ያለባቸዉ ወይም የሌሉባቸዉ ያላቸዉን አካባቢዎች ግን እስካሁን በግልፅ አላሳወቀም።የምርጫ ዝግጅቱን ግን እንደቀጠለ ነዉ።

ቦርዱ በይፋ የማሕበራዊ መገናኛ ዘዴዎቹ በተደጋጋሚ እንዳስታወቀዉ ለፖለቲከኞች፣ ለታዛቢዎችና ለጋዜጠኞች ሥለ ምርጫ ዘመቻ፣ ሥለመታዘብና መዘገብ የተግባር ልምምዶችን ጨምሮ የተለያዩ ሥልጠና፣ ገለፃና ማብራሪያዎችን ሰጥቷል።ካለፉት ምርጫዎች የተገኙ ልምዶችን አንጥሮ ማዉጣቱን አስታዉቋል፤ ዕጩዎች የሚመዘገቡበት ሥርዓት (ሲስተም) ማበልፀጉንም ዘግቧል።

ከምርጫ በፊት ሠላምና መረጋጋት-ተቃዋሚ ፓርቲዎች

ብዙ ተቃዋሚ ፓርቲዎች ግንኢትዮጵያ ዉስጥ የቀጠሉት ግጭቶች፣ የሰብአዊ መብት ጥሰቶች፣ የፖለቲካ አለመረጋጋትና ሥርዓተ አልበኝነት  ሳይወገዱ ወይም ሳይቃላሉ ምርጫ ማድረግ ያስቸግራል እያሉ ነዉ።አምስት የፖለቲካ ፓርቲዎችን የሚያስተናብረዉ ትብብር ለኢትዮጵያ አንድነት በቅርቡ ባወጣዉ መግለጫ፣ ምርጫ ከመደረጉ በፊት በሐገሪቱ ሰላም እንዲሰፍን፣ ሕግና ሥርዓት እንዲከበር፣የታሰሩ ፖለቲከኞችና ጋዜጠኞች  እንዲለቀቁ ጠይቋል።

የኦሮሞ ፌደራሊስት ኮንግረስ (ኦፌኮ)ና የኦሮሞ ነፃነት ግንባር (ኦነግ) በተለይ በኦሮሚያ ክልል ያለዉ ግጭት ሥለሚወገድበት ሥልት ከክልሉ መሪዎች ጋር ዉይይት ለማድረግ ጠይቀዋል።ባንድ በኩል የትግራይ ክልልን እየመራ በሌላ በኩል ከሕጋዊ ፓርቲነት የታገደዉ አንጋፋዉ ህዝባዊ ወያኔ ሓርነት ትግራይ (ህወሓት)ም ገና ሕጋዊነቱን ለማስመለስየእንደራደር ጥያቄ እያቀረበ ነዉ።

እየተዋጋንም ምርጫ አድርገናል-ጠሚ ዐብይ

የኢትዮጵያ ጠቅላይ ሚንስትር ዐብይ አሕመድ ባንፃሩ በቅርቡ ከሕዝብ ተወካዮች ምክር ቤት አባላት ለቀረቡላቸዉ ጥያቄዎች በሰጡት መልስና ማብራሪያ «ምርጫ ለማድረግ መንግሥት በቂ አቅም አለዉ፤ምርጫ እንኳን ዘንድሮ ባለፈዉም ምርጫ አድርገናል እየተዋጋን።» ብለዋል።

በግጭት፣ ዉጥረት፣ ተቃርኖና  ዉዝግ መሐል ነፃና ፍትሐዊ ምርጫ ሊደረግ ይችላል? ምርጫ ማድረግ ወይም አለማድረጉስ የኢትዮጵያን ዉስብስብ ችግሮች ለማቃለል ይጠቅማል? እንዴት? በዉይይታችን የሚነሱ ጥያቄዎች ናቸዉ።

ሙሉዉን የድምፅ ዉይይት ለማድመጥ ማገናኛዉን ይጫኑ።

ነጋሽ መሐመድ