የመገጣጠሚያ አካላት ህመም ዕድሜ ይወስነዋል?

የመገጣጠሚያ ላይ ህመም የተለያዩ መንስኤዎች ሊኖሩት እንደሚችሉ የህክምና ባለሙያዎች ይናገራሉ። አብዛኛውን ጊዜ ግን በዋና ምክንያትነት ከሚነሱት ውስጥ በአጥንቶች መካከል የሚገኘው ከአጥንት የለሰለሰ ከሥጋ የጠጠረ ክፍል ካርቲሌጅ የሚባለው አጥንት እንዳይፋተግ የሚረዳ የተፈጥሮ መጠበቂያ ማለቅ የሚያስከትለው ህመም አንዱ ነው። ይህ ችግር ቀስ በቀስ በዕድሜ ሂደት የሚከሰት ሲሆን በተለይ ከ45 ዓመት በኋላ ሊባባስ እንደሚችል የሚመለክቱ መረጃዎች አሉ። ይህ በሚከሰትበት ጊዜም የመገጣጠሚያ አካላት ላይ ጠንካራ የህመም ስሜት ይፈጠራል። በአጥንትና መገጣጠሚያ አካል ላይ የሚያጋጥሙ የጤና ችግሮችን ለረዥም ዓመታት ሲያክሙ የኖሩት ዶክተር ውብታዬ ግን የመገጣጠሚያ አካላት ህመም እንደውም የዕድሜ ገደብ የለውም ነው የሚሉት።

የመገጣጠሚያ አካል ህመም መንስኤውዎቹ ብዙ ናቸው

ለመሆኑ የመገጣጠሚያ አካል ህመም መንስኤው ምን ይሆን? ያልናቸው ዶክተር ውብታዬ እንደነገሩን እንደየሰው እና አጋጣሚው መንስኤዎቹ የተለያዩ ናቸው። ዕድሜን ተከትሎ የሚከሰት እንዳለ ሁሉ፤ በልጆችና በወጣቶች ላይ ሳይቀር የመገጣጠሚያ ህመም ሊያጋጥምም ይችላል። ከአደጋና ከሌላ ህመም ጋር በተገናኘ የመገጣጠሚ ህመም የሚመጣበት ጊዜ አለ ያሉት ባለሙያው በተለይ ለሴቶች ከወር አበባ ዑደት መቆም ጋ በተያያዘም ህመሙ ሊከተል እንደሚችልም አስረድተዋል።

የሰውነት ክብደት መጨመር፤ የአካል እንቅስቃሴ አለማዘውተር፤ የሥራ ጫና እና ጉልበት የሚጠይቁ ከባድ እንቅስቃሴዎች፤ ያልተመጨ ጫማ፤ ወለምታ፤ መጋጨት፤ ከስፖርት እንቅስቃሴ ጋ የተገናኘ አደጋም ሆነ አጉል እንቅስቃሴ የመገጣጠሚያ አካላትን ህመም ሊያስከትሉ እንደሚችሉም ዘርዝረዋል። 

በእጅ ጣቶች መገጣጠሚያ ላይ ሳይቀር ህመም የሚኖርበት አጋጣሚ እንዳለ ያመለከቱት ባለሙያው በአብዛኛው ከሥራ ብዛት ጫና ጋር እንደሚገናኝም ነው ያስረዱት። ህመሙ አንዳንዴም የጣቶችን ቅርጽ እስከመቀየር ሊደርስ ይችላልም ባይ ናቸው። ከዚህም ሌላ የአመጋገብ ጉድለት እና አልክሆል ማዘውተርም ሌላው የችግሩ አባባሽ ምክንያቶች መሆናቸውንም ሳይገልጹ አላለፉም።

የአመጋገብ ጉድለትን ለማካካስ በሚል የሚወሰዱ ተጨማሪ ቫይታሚኖችና ማዕድናትን መውሰድን ባይነቅፉም በጥናት የተረጋገጠ ነገር ግን አንዳላገኙ ተናግረዋል። እንዲህ ያሉትን ተጨማሪ ቫይታሚን እና ማዕድናትን የሚያዘጋጁ ኩባንያዎች በበኩላቸው ጠቀሜታቸውን ደጋግመው በመዘርዘር ማስታወቂያዎችን በስፋት ያሰራጫሉ። ጥቂት የማይባሉ ደንበኞችም አሏቸው።

መፍትሄ ይኖረው ይሆን?

መነሻ ምክንያቱ በርካታ መሆኑ የተገለጸለት የመገጣጠሚያ አካል ህመም መፍትሄው ምን ይሆን የሚል ጥያቄ ማስነሳቱ አይቀርም። ወደሀኪም መሄድ ግድ የሚለው የተባባሰና ለረዥም ጊዜ የሚዘልቅ ከሆነ መሆኑን ያሳሰቡት ዶክተር ውብታዬ እንደሚሉት በአብዛኛው ዋነኛው መፍትሄው መንቀሳቀስ ነው። ክብደት መቀነስ፤ የስፖርት እንቅስቃሴዎች ላይ ጥንቃቄ ማድረግ፤ ምቹ ጫማ ማድር,ግና አመጋገብን በጥንቃቄ መከታተልንም መክረዋል።  

የዓለም የጤና ድርጅት እንደሚለው በመላው ዓለም በርካታ ሰዎች በመገጣጠሚያ ህመም ይሰቃያሉ። መነሻ ምክንያቱ የተለያየ እንደመሆኑም ህክምናውም እየደየሰው ህመምና የመንቀሳቀስ አቅም ጋ ይገናኛል። የዓለም የጤና ድርጅትም ሆነ እዚህ ጀርመን ሀገር በአጥንት እና መገጣጠሚያ ላይ የሚያጋጥሙ የጤና ችግሮችን ለረዥም ዓመታት ሲያክሙ ከቆዩት ዶክተር ውብታየ ዱሬሳ ተክሌ የጋራ ምክራቸው ለዚህ ችግር የተሻለ መፍትሄ ህመም እየተሰማም ቢሆን እንቅስቃሴ ማዘውተር የሚል ነው። ለሰጡን ሙያዊ ማብራሪያ እና ምክር የዘወትር ተባባሪያችን የሆኑትን በአጥንትና መገጣጠሚያ አካል ላይ የሚያጋጥሙ የጤና ችግሮችን ለረዥም ዓመታት ሲያክሙ የኖሩት ዶክተር ውብታዬ ዱሬሳ ተክሌን ከልብ እናመሰግናለን። 

ሸዋዬ ለገሠ

ታምራት ዲንሳ