ትናንት ያረፉት የቀድሞው የግብጽ ፕሬዝዳንት ሆስኒ ሙባረክ ዛሬ ወታደራዊ ሽኝት ተደረገላቸው።   በካይሮው ሞሺር ታንታዊ መስጊድ ዛሬ በተካሄደው በዚሁ ስነ ስርዓት ላይ የግብጹ ፕሬዝዳንት አብዱልፈታህ አልሲሲ፣ ጀነራሎች፣ ሌሎች የጦር መኮንንኖች እና ወታደሮች ተገኝተዋል።ለቀድሞው የአየር ኃይል ጠቅላይ አዛዥ ለሙባረክ ስንብት 21 ጊዜ መድፍ ተተኩሷል። በስነ ስርዓቱ ላይ በቅርቡ የሙስና ክስ  የተነሳላቸው ልጆቻቸው አላ እና ገማል ሙባረክ ተገኝተዋል።በርካታ የሙባረክ ደጋፊዎችም በስፍራው ተገኝተው ሃዘናቸውን ገልጸዋል።የካይሮ ነዋሪዎችም ለቀድሞ መሪያቸዉ ሐዘናቸዉን እየገለጡ ነዉ። ሁለቱ እንደዚሕ ይላሉ። «ወታደር ናቸው።ለግብጽ ብዙ አድርገዋል።ድክመታቸውን ብቻ አናይም ማንም ፍጹም አይደለም።» 
«በሰላም ይረፉ።በሙባረክ እና በሌሎች ወታደራዊ መሪዎቻችን ባይሆን የ1973ቱ የአረብ እሥራኤል ጦርነት ድል አከባበር አይኖርም ነበር።» 
ሙባረክ በጎርጎሮሳዊው 1973 ግብጽ ከእስራኤል ጋር ባካሄደችው ጦርነት ወቅት የግብጽ አየር ኃይል ጠቅላይ አዛዥ ነበሩ።ለሦስት አሥርት ዓመታት ግብጽን የመሩት ሙባረክ በ2011ዱ የአረብ ሕዝብ አብዮት ወቅት በተነሳባቸው ህዝባዊ ተቃውሞ ነበር ከሥልጣን የወረዱት።ከዚያ በኋላ በመቶዎች በሚቆጠሩ ተቃዋሚዎች ግድያ ተጠያቂ ተብለው ወህኒ የወረዱት ሙባረክ ፍርዱ ተነስቶላቸው በ2017 በነጻ ለመለቀቅ በቅተዋል። የቀድሞ የአየር ኃይል አዛዥ እና ምክትል ፕሬዝዳንት ሙባረክ ፣ የቀድሞው የግብጽ ፕሬዝዳንት አንዋር ሳዳት ወታደራዊ ትርዒት በመከታተል ላይ ሳሉ ከተገደሉ በኋላ ነበር በጎርጎሮሳዊው በ1981  የግብጽ መሪ የሆኑት።
በጥንካሬያቸው የሚነሱት ሙባረክ ከእስራኤል ጋር ሰላም በማውረዳቸው ሲወደሱ ምርጫን በማጭበርበር ደግሞ ይከሰሳሉ።በሳዳት ግድያ ወቅት የቆሰሉት ሙባረክ ከዚያ በኋላም ከተለያዩ የግድያ ሙከራዎች ተርፈዋል። በጎርጎሮሳዊው 1995 የአዲስ አበባው የግድያ ሙከራ አንዱ ነበር።የግብጽ መንግሥት በሙባረክ ሞት የሦስት ቀናት ብሔራዊ ሀዘን አውጇል። ሙባረክ በሕክምና ሲረዱ በቆዩበት የካይሮ ወታደራዊ ሆስፒታል ያረፉት፣ ትናንት ነበር በ91 ዓመታቸው።

ኂሩት መለሰ

አዜብ ታደሰ