መፈንቅለ መንግሥት በተካሄደባት ማሊ ኮሎኔል አሲሚ ጎኢታ አዲሱ የማሊ ጠንካራ ወታደራዊ መኮንን መሆናቸውን በመግለጽ ራሳቸውን ይፋ አደረጉ። የማሊን ፕሬዝደንት ከስልጣን ያስወገዱት የሐገሪቱ የጦር መኮንኖች ከዓለም መንግሥታት ከፍተኛ ተቃዉሞና ዉግዘት እየደረሰባቸዉ ነዉ። የአፍሪቃ ሕብረት በማሊ የተካሄደውን ወታደራዊ መፈንቅለ መንግሥት በማውገዝ ሀገሪቱን ከሕብረቱ አግዶአል። መፈንቅለ መንግሥቱን ባካሄዱት አካላት የታሰሩ የሀገሪቱ ፕሬዝደንት የነበሩት ኢብራሂም ባቡከር ኬይታን ጨምሮ ሌሎች ከፍተኛ የሀገሪቱ ባለሥልጣናትንም ባስቸኳይ እንዲለቁ ጠይቋል። በተመሳሳይ በማሊ የተካሄደዉን የመንግሥት ግልበጣ ተከትሎ የአዉሮጳ መንግሥታትና የመንግሥታት ተጠሪዎች ጉባዔ ካካሄዱ በኋላ ባወጡት መግለጫ የማሊ ቀዉስ ለአካባቢዉ ቀጠና አሳሳቢ እንደሆን ገልፀዋል።  የአውሮጳ ሕብረትም ሆነ ዩናይትድ ስቴትስ መፈንቅለ መንግሥት ያካሄዱት የማሊ ኃይሎች በቁጥጥር ሥር ያዋሏቸውን ባለሥልናት እንዲፈቱ አሳስበዋል። የአሜሪካን የውጭ ጉዳይ ሚኒስትር ማይክ ፖምፔዮ አመፅና መፈንቅለ መንግሥቱን አውግዘው፤ በኃይል የሚደረግ ሥልጣን የመያዝ ርምጃን ሀገራቸው እንደማትቀበል አስታውቀዋል። 15 አባል መንግሥታትን የሚያስተናብረዉ የምዕራብ አፍሪቃ የምጣኔ ሐብት ማሕበረሰብ (ECOWAS ) ማሊን ከአባልነት አግዷል።  55 አባላት ያሉት የአፍሪቃ ሕብረት ርምጃ ማሊን ከማንኛውም የሕብረቱ ጉባኤዎች የሚያግድ ነው።

 

አዜብ ታደሰ 

ነጋሽ መሐመድ