የማሊን ፕሬዝደንት ከስልጣን ያስወገዱት የሐገሪቱ የጦር መኮንኖች «አመቺ» ባሉት ጊዜ ምርጫ እንደሚደረግ እስታወቁ።«ብሔራዊ ኮሚቴ ለሕዝብ ደሕንነት» በሚል ስም የተደራጁት የጦር መኮንኖች ትናንት ያሰሯቸዉ የሐገሪቱ ፕሬዝደንት ኢብራሒም ቡበከር ኬይታ፣ ትናንትናዉኑ የሐገሪቱን ምክር ቤት በትነዉ ስልጣናቸዉን ለቅቀዋል። ከመፈንቅለ መንግሥቱ በኋላ አስራ-አምስት አባል መንግስታትን የሚያስተናብረዉ የምዕራብ አፍሪቃ የምጣኔ ሐብት ማሕበረሰብ (ECOWAS በምሕፃሩ) ማሊን ከአባልነት አግዷል።የአፍሪቃ ሕብረትም «ከሕገ መንግሥት ዉጪ የተደረገ ለዉጥ» ያለዉን መፈንቅለ መንግሥት አዉግዟል።የአዉሮጳ ሕብረትና ዩናይትድ ስቴትስ የታሰሩት ፖለቲከኞች እንዲለቀቁ ጠይቀዋል።መፈንቅለ መንግስቱን ያደረገዉ ብሔራዊ ኮሚቴ ለሕዝብ ደሕንነት የተባለዉ የጦር መኮንኖች ሥብስብ ቃል አቀባይ ኮሎኔል ኢስማኢል ዋጉ ዛሬ እንዳሉት ግን ጦሩ ስልጣን ላይ የመቆየት ፍላጎት የለዉም።«ማሊያዉያን ሆይ! እኛ ስልጣን ላይ የመቆየት ፍላጎት የለንም።ፍላጎታችን በሐገሪቱ ሠላምና መረጋጋት ማስፈን ነዉ።ሐገሪቱ ከተረጋጋች፣ ማሊ የዕለት ከዕለት ኑሯችንን በቅጡ የሚመራ፣ ጠንካራ፣ በመሪና ተመሪዎች መካከል መተማመን የሚያሰፍን ተቋም መፍጠር የሚችል አጠቃላይ ምርጫ ከተወሰነ ጊዜ በኋላ ይደረጋል።ይሕን ከግብ ለማድረስ ሁሉም ማሕበራት እና የፖለቲካ ንቅናቄዎች ከሁከትና ብቀላ የፀዳ  አስተዋፅኦ እንዲያደርጉ ጥሪ እናቀርባለን።ሪፐብልኪቱ ለዘላለም ትኑር።ሐገራችን ለዘላለም ትኑር።ብሔራዊ ኮሚቴ ለሕዝብ ደሕንነት ለዘላለም ይኑር።ፈጣሪ ማሊን ይባርክ።»
የመፈንቅለ መንግስቱ መሪዎች ማሊን ከሌሎች ሐገራት ጋር የሚያገናኛ የአየርና የየብስ መስመሮችን በሙሉ ዘግተዋል።

 

ነጋሽ መሐመድ 

አዜብ ታደሰ