የጀርመን ሕዝብ አዳዲስ ነገሮችን ለማወቅ፣ለመቀበል እና እራሱን ለመለወጥ በፅናት እንዲጥር የሐገሪቱ መራኂተ-መንግሥት አንጌላ ሜርክል መከሩ። ሜርክል ዛሬ እኩለ ሌት የሚብተዉን የጎርጎሪያዉያኑን አዲስ ዓመት ምክንያት በማድረግ ባስተላለፉት መልዕክት እንዳሉት ጀርመኖች ከጣሩ አዲሱ ዓመት ጥሩ የማይሆንበት ምክንያት የለም። ጀርመን በሠላማዊ መንገድ ዳግም ከተዋሐደች ነገ በሚብተዉ 2020፣ 30ኛ ዓመቷን እንደምትደፍን ሜርክል አስታዉሰዉ፣ የጀርመን ሕዝብ በአዲሱ ዘመንም እስካሁን ከጣረዉና ከሰራዉ በላይ መጣር አለበት ብለዋል።«ከጥቂት ሰዓታት በኋላ የሚብተዉ የ21ኛዉ ክፍለ-ዘመን 20ኛ ዓመት ጥሩ ዘመን ሊሆን ይችላል።ጥሩ የሚሆነዉ ግን ጥንካሬያችንን ከተጠቀምን፣ አንድ የሚያደርገን ነገር ላይ ከተረባረብን እና ባለፉት አስርተ-ዓመታት በጋራ ያስመዘገብናቸዉን ድሎች ካስታወስን ነዉ። ጀርመን በሰላምና በነፃነት ዳግም ከተዋሐደች በሚቀጥለዉ ዓመት 30 ዓመት ይሆናታል።በነዚሕ 30 ዓመታት በርካታ በጎ ምግባሮችን ማከናወኑ ተሳክቶልናል።ለምሳሌ፣  እንዳሁኑ ዘመን ያክል ሥራ-ያለዉ ሕዝብ ቁጥር አልነበረም።በሚቀጥሉት አስርተ-ዓመታት ደግሞ ከ30 ዓመታት በፊት ካሰብናቸዉ የበለጡ ምግባራት ይጠብቁናል።»
ሜርክል የአየርንብረት ለዉጥን፣ ዲጂታላዊነት እና የስደተኞች ቁጥር ማየልን የመጪዉ ዘመን «ፈተናዎች» ብለዋቸዋል።የዉጪ መርሕን በተመለከተም አዉሮጳ ይበልጥ ተሰሚና ተቀባይነት እንዲኖራት መንግሥታቸዉ የሕብረቱን የሊቀመንበርነት ስልጣን ሲይዝ አበክሮ እንደሚጥር አስታዉቀዋል።ጀርመንም ሆነች አዉሮጳ  ከአፍሪቃ ጋር ያላቸዉን ግንኙነት ቢያጠናክሩ ጥቅሙ ለራሳቸዉ ነዉ-እንደ ሜርክል።
«ከአፍሪቃ ጋር የሚደረገዉ ትብብር ለራሳችን ጠቃሚ ነዉ።ሰዎች በሰላምና ደሕንነት መኖር ከቻሉ ስደትና ፍልሰት ይቀንሳል። ዘላቂ ፀጥታ የሚሰፍነዉ፣ ጦርነትን በፖለቲካዊ ድርድር ማስቆም ስንችል ብቻ ነዉ።የኛ ፀጥታና ብልፅግና የሚፀናዉ ጎረቤቶቻችን ፀጥታና ምጣኔ ሐብታዊ ብልፅግና ሲረጋገጥ ነዉ።»
ላለፉት 14 ዓመታት ጀርመንን የመሩት አንጌላ ሜርክል በ2021 በሚደረገዉ ምርጫ አይወዳደሩም።የ65 ዓመቷ ፖለቲከኛ የመሐል ቀኙን የክርስቲያን ዴሞክራሲያዊ ሕብረት (CDU በጀርመንኛ ምሕፃረ ቃሉ) ሊቀመንበርነትን ባገባደድነዉ ዓመት ለቅቀዋል።

ነጋሽ መሐመድ

ማንተጋፍቶት ስለሺ