የኢትዮጵያ ብሔራዊ የምርጫ ቦርድ ፣ የመላው ኢትዮጵያ አንድነት ድርጅት መኢአድ ጠቅላላ ጉባኤ በድጋሚ ጠርቶ የሥራ አስፈጻሚ ኮሚቴ አባላቱን በድጋሚ እንዲመርጥ ውሳኔ አስተላለፈ። ቦርዱ ይህን ውሳኔ ያስተላለፈው መኢአድ ያካሄደው ምርጫ ሚስጥራዊነት ያልጠበቀና ከህገ ደንቡ ጋር የሚጣረስ ነው በሚል ምክንያት መሆኑን ገልጿል።
የመላ ኢትዮጵያ አንድነት ድርጅት በበኩሉ ምርጫው የቦርዱ ታዛቢዎች ባሉበት በህገ ደንቡ መሠረት የተካሄደ ነው ሲል ወቀሳውን አጣጥሎታል። 
የኢትዮጲጵያ ምርጫ ቦርድ በመግለጫው መኢአድ ባካሄደው ጉባኤ የኦዲትና ቁጥጥር ኮሚቴ፣ የስራ አስፈጻሚ ኮሚቴ፣ እንዲሁም የጎደሉ የማዕከላዊ ኮሚቴ አባላት ምርጫ በምስጢር በሚካሄድ የድምጽ አሰጣጥ መሆን ሲገባው የምርጫ አዋጅ አንቀጽ 74ን በጣሰ መልኩ መከናወኑን ጠቅሷል። በመሆኑም ፓርቲው እስከ ሚያዝያ 25 ቀን 2015 ዓም ባሉት አራት ወራት በድጋሚ ጠቅላላ ጉባኤ እንዲያካሂድ አሳስቧል።
የፓርቲው ፕሬዚደንት አቶ ማሙሸት አማረን በጉዳዩ ላይ አነጋግረናቸዋል። እሳቸው ከ9 ወራት በፊት በፓርቲው ሕገ-ደንብ መሠረት የቦርዱ ተወካዮች ባሉበት ጉባኤው መካሄዱን ተዋካዮቹም ጉባኤው በትክክል መካሄዱን በመድረኩ ቃላቸውን ሰጥተውን ነበረ በማለት ገልጸዋል።
`` ቪድዮ ቀራጮች ነበሩ እንደውም ከስከዛሬው በተለየ። ሁለት ሰዎች ደግሞ ቁጭ ብለው የሚታዘቡ ነበሩ። እንደውም እነሱ ናቸው እስካሁን ካየናቸው የጠቅላላ ጉባኤ ሂደቶች መኢአድን ያህል የለም። ብለው በግልጽ ምስክርነት የሰጡ ነበሩ። ግን እነሱ የሰጡት ሪፖርት ወደጎን ተትቶ ከ9 ወራት በኋላ የተጻፈበት ሁኔታና ከሌሎች ፓርቲዎች የተሰጣቸው ጥሩ መንፈስና የእኛን መንፈስ አነጻጽረን የኛ ምን ስህተት ኖሮት ነው? እኛ ጉባኤ እንድንጠራ ሌሎች እንድታስተካክሉ ተብሎ የታለፈው የሚለውን አውጥተን ለሕዝብ የምናጋልጠው ነው የሚሆነው።``አቶ ማሙሸት ውሳኔው ትክክል አለመሆኑ ብቻ ሳይሆን አድሎም እንዳለበት ገልጸውልናል። በተመሳሳይ ሁኔታ የአመራር አባላቶቻቸውን ምርጫ ያካሄዱ ሌሎች ፓርቲዎች ቦርዱ የሰጠው ውሳኔና  በፓርቲያችን ላይ የወሰነውን ውሳኔ ይለያያል፣ በመሆኑም አንቀበለውም ብለዋል።
`` ይሄ ለምን መጣ ብለን ስናስብ  በዛሬው ዕለት ለምን ደብዳቤው ተጻፈልን የሚለውን ስናይ ፓርቲዎች ተሰባብበን ወደአንዱ የመንምጣት ጠንከር ሲሉ  እንደዚህ አይነት አገዛዙ ከድሮ ጀምሮ መምቻው ምርጫ ቦርድ መሆኑን እናውቃለን እንገነዘባለን። ጠቅላላ ጉባኤ ጥሩ ሲል አንደኛ ጠቅላላ ጉባኤ ከጠራን ገና 9 ወራችን ነው። ስለዚህ ጠቅላላ ጉባኤ የምንጠራበት ምንም ምክንያት አይኖረንም። ውሳኔውም በራሱ ትክክል አይደለም። አድሎም አለበት። ሌሎቹ ለምሳሌ አመራሮቹን የመረጡበት ሂደት በእጅ የመረጡበት ለወደፊቱ እንድታስተካክሉ ብሏል። እኛን ግን ጉባኤ ጥሩ ብሏል ይሄ አድሎኝነት አለበት። በኛ በኩል አቤቱታ የምናቀርብበት ነው። ንግግርም ጀምረናል። እኛን በኢኮኖሚ ለማዳከም የተሄደበት ነው ብለን አቤቱታችንን እያቀረብን ነው። እና ቦርዱ ስህተት ነው የወሰነው። ጊዜውም ከዘጠኝ ወር ቦኋላ ማድረጉ ደግሞ የራሱን ሃላፊነትን ያልተወጣ  ቢያንስ በአጭር ጊዜ ችግር አለባችሁ ማለት ይችል ነበር።`` 
አቶ ማሙሸት አያይዘውም ቦርዱ ከ9 ወራት ቦኋላ ጠብቆ ይህን ውሳኔ ማስተላለፉ ከሌሎች ፓርቲዎች ጋር በጥምረት ለመስራት በመፈራረማችን እንዳንጠናከር ሆን ተብሎ የተደረገ ነው በማለት ይገልጻሉ።
`` ከሌሎች ፓርቲዎች ጥምረት ስንፈጥር ደግሞ የሚገርመው እኛ ራስ ሆቴል የትብብር ፊርማ ስንፈራረም ያን ዕለት ነው ደብዳቤው የጻፉልን። ይህ የሚያሳየው ቀና ስንል፣ ስንጠናከር፣ ወደ ፊት ስንሄድ ልክ እንደድሮው ለመኮርኮም የሚኬድበት ሁኔታ አለ። ይሄ እንግዲህ በትግል ሂደት የሚመጣ ነገር ነው፣ ለኛ አዲስ አይደለም ለብዙ ዘመናት በእንደዚህ ዓይነት ችግርና መከራ ያለፍንበት ነው።``
መኢአድ ባነሳቸው ነጥቦች ላይ የኢትዮጵያ ምርጫ ቦርድ ምክትል ሃላፊ አቶ ውብሸት አየለን ለማነጋገር ጥረት አድርገናል። በጉዳዮ ላይ ቦርዱ ካወጣው መግለጫ ውጭ ዝርዝር ነገር መናገር እንደማይችሉ ነግረውናል።

ዮሐንስ ገብረእግዚአብሔር
ኂሩት መለሰ