የሱዳኑ ጠቅላይ ሚንስትር አብደላ ሀምዶክ ከተቃጣባቸው የግድያ ሙከራ አመለጡ። ጠቅላይ ሚንስሩ ከግድያ ሙከራው ያመለጡት ዛሬ ጠዋት በካርቱም ወደ ጽሕፈት ቤታቸው በማምራት ላይ ሳሉ እርሳቸውን ያጅቡ በነበሩ ተሽከርካሪዎች ላይ ጥቃት ከተፈጸመ በኋላ ነው። ጥቃቱን ተከትሎ በጠቅላይ ሚንስትሩ ላይ የደረሰ ጉዳት እንደሌለ ቤተሰባቸው ማሳወቃቸውን የሀገሪቱ ቴሌቪዥን ዋቢ በማድረግ አሶሺየትድ ፕሬስ የዜና ምንጭ ዘግቧል። አብደላ ሃምዶክ በሀገሪቱ የተቀጣጠለውን የለውጥ እንቅስቃሴ ተከትሎ  የቀድሞው የሱዳን ፕሬዚፈንት ዖማር ሀሰን አልበሽርን ከስልጣናቸው በማስወገድ ስልጣኑን የተቆጣጠረው የሀገሪቱ ጦር ከለውጥ አራማጅ ኃይሎች ጋር በጥምረት የመሰረቱት መንግሥት ጠቅላይ ሚንስትር እንዲሆኑ ባለፈው ነሐሴ ወር ነበር የተሾሙት። የሀገሪቱ ጦር እና የዲሞክራሲ አራማጅ ኃይሎች ወራት ከፈጀ ድርድር በኋላ 11 አባላት ያሉት የላዕላይ ምክር ቤትን በማቋቋም ሱዳንን ለቀጣይ ሦስት ዓመታት እንዲመራ ስልጣኑን መረከቡ ይታወሳል። በወቅቱ የጦሩ ጄነራሎች ስልጣን ለማስረከብ አንገራግረው እንደነበረም የአሶሺየትድ ፕሬስ ዘገባ ያመለክታል።
ጠቅላይ ሚንስትር አብደላ ሃምዶክ እንደጎርጎሪዮሱ አቆጣጠር በ2000ዎቹ በዳርፉር ተፈጽሞ በነበረው የዘር ማጥፋት እና የሰብዓዊ መብት ጥሰት እጃቸው እንዳለበት የሚጠረጠሩትን የቀድሞውን ፕሬዚዳንት አልበሽርን ጨምሮ ሌሎች ከፍተኛ ባለስልጣናትን ለዓለም አቀፉ የጦር ወንጀለኞች ፍርድ ቤት አሳልፈው ለመስጠት እንደሚተባበሩ ዐስታውቀው ነበር። 
ሀምዶክ የሚመሩት የብሔራዊ ሽግግር መንግሥቱ ከተፋላሚ ኃይሎች ጋር ደም አፋሳሽ ግጭቶች መቋጫ እንዲያበጅላቸው፣ የተንኮታኮተውን ኢኮኖሚ እንዲያነቃቁት እና ዴሞክራሲውን እንዲያጎለብቱ  ከባድ ኃላፊነት ተጦሎባቸዋል። የፕሬዚዳንት አልበሽር ከስልጣን መወገድ ተከትሎ ኢኮኖሚዋ ከድጡ ወደማጡ የሆነባት ሱዳን የዋጋ ግሽበቷ 60 በመቶ የደረሰ ሲሆን፤ የሥራ አጡ ቁጥር ደግሞ 22.1 በመቶ ደርሷል።

ታምራት ዲንሳ 

አዜብ ታደሰ