የሱዳን የሽግግር መንግሥት እና አምስት የሱዳን ታጣቂ ቡድኖች ዛሬ የሰላም ሥምምነት ተፈራረሙ። የሱዳን የሽግግር መንግሥት ከታጣቂ ቡድኖች ጋር ለመፈራረመም እና ሃገሪቱ ካለችበት ስር የሰደደ የዓመታት ዉዝግብ ለመላቀቅ ያደረገዉ አመርቂ ርምጃ ታሪካዊ ተብሎአል። በደቡብ ሱዳን መዲና ጁባ ላይ ዛሬ በተካሄደዉ የሰላም ስምምነት ላይ የሱዳን ጠቅላይ ሚኒስትር አብደላ ሃምዶክ እና የሃገሪቱ ምክር ቤት ጀነራል አብደል ፈታህ ቡርሃን መገኘታቸዉ ታዉቋል። የፈረንሳዩ የዜና አገልግሎት አዣንስ ፍራንስ ፕሬስ ባወጣዉ ዘገባ መሰረት አምስቱ የሱዳን ታጣቂ ቡድኖች ለ 17 ዓመት ነፍጥ አንስተዉ የሱዳንን መንግሥት ሲወጉ የቆዩናቸዉ ተብሎአል። ከሱዳን የሽግግር መንግሥት ጋር የሰላም ስምምነት የደረሱት የሱዳን ታጣቂ ቡድኖች   «የእኩልነት እንቅስቃሴ «JEM» እና ሚኒ ሚናዊ ፤ በምዕራብ እና ሰሜን ዳርፉር የሚገኙ የሱዳን ነጻ አዉጪ «SLA» እንዲሁም በብሉ ናይል እና ኮርዶፋን ግዛት የሚገኙት የሱዳን ነጻ አዉጪ ንቅናቄ  የተባሉት መሆናቸዉ ተገልፆአል።  

 

አዜብ ታደሰ 

ነጋሽ መሐመድ