የሱዳን የሽግግር ጠቅላይ ሚንስትር አብደላ ሐምዶክ የገንዘብ፣ የዉጪ ጉዳይ፣ የኃይል፣ የጤናና ሌሎች ሦስት ሚንስትሮችን ሽረዉ አዳዲስ ሾሙ። ጠቅላይ ሚንስትሩ የካቢኔ ሹም ሽር እንደሚያደርጉ ሰሞኑን በሰፊዉ ቢወራም ባንዴ ሰባት ሚንስትሮች ያሰናብታሉ ተብሎ አልተጠበቀም ነበር። በተለይ በቀድሞዉ ፕሬዝደንት ሐሰን አል በሽር የመጨረሻ ዘመነ-ሥልጣን የተቃወሰዉ የሐገሪቱን ምጣኔ ሐብት እንዲያንሰራራ ከፍተኛ ጥረት ማድረጋቸዉ የሚነገርላቸዉ የገንዘብ ሚንስትር ኢብራሒም አልበዳዊ ይባረራሉ ብሎ የገመተ አልነበረም። ጠቅላይ ሚንስትሩ ግን በዳዊን እዚያዉ ገንዘብ ሚንስቴር ዉስጥ በሚሰሩ ባለስልጣን ተክተዋቸዋል።ሐምዶክ ሹም ሽሩን ያደረጉት በብዙ ሺሕ የሚቆጠሩ የካርቱምና የአካባቢዉ ነዋሪዎች የተሕድሶ ለዉጡ እንዲፋጠን ባደባባይ ሰልፍ በጠየቁ በዘጠነኛዉ ቀን መሆኑ ነዉ።አምና ነሐሴ የተመሰረተዉ የሐምዶክ የባለሙያዎች መንግስት አጠቃላይ ዘመነ-ሥልጣኑ 3 ዓመት ከሦስት ወር (39 ወር ነዉ)።

 

ነጋሽ መሐመድ 

አዜብ ታደሰ