ነገ መደረግ የነበረበት የሶማሊያ ፕሬዝደንታዊ ምርጫ ለሌላ ጊዜ መራዘሙን የሐገሪቱ ፕሬዝደንት አስታወቁ። ፕሬዝደንት መሐመድ አብዱላሒ መሐመድ (ፎርማጆ በቅፅል ስማቸዉ) ለሐገራቸዉ ምክር ቤት አስቸኳይ ጉባኤ እንደነገሩት ተቀናቃኝ ፖለቲከኞች ባለመስማማታቸዉ ነገ ምርጫዉን ማድረግ አይቻልም። ምርጫዉ እስኪደረግ ፕሬዝደንቱ በያዙት ስልጣን እንደሚቀጥሉ አስታዉቀዋል። በፀጥታና በገንዘብ ምክንያት የሶማሊያ ሕዝብ ፕሬዝደቱን በቀጥታ አይመርጥም። የተለያዩ ጎሳ ተጠሪዎች ተወካዮቻቸዉን ይሰይማሉ። በጎሳ መሪዎቹ የሚሰየሙት ሰዎች ፕሬዝደንቱን የሚመርጠዉን ምክር ቤት አባላት ይመርጣሉ። የሶማሊያ ተቀናቃኝ ፖለቲከኞች በጎሳ ተወካዮቹ ብዛት፣ ተወካዮቹ በሚመርጡት የምክር ቤት አባል ማንነትና በምርጫዉ ሒደት ላይ በተከታታይ ቢወያዩም መግባባት አልቻሉም።ፕሬዝደንት መሐመድና ደጋፊዎቻቸዉ ለዉይይቱ መክሸፍ የጁባላንድና የፑንት ላንድ አገረ-ገዢዎችን ወቅሰዋል።የሁለቱ ግዛት መሪዎች ከሞቃዲሾ መንግስት ይልቅ ኬንያን ይደግፋሉ። ኬንያና ሶማሊያ ደግሞ  በግዛት ይገባኛል ሰበብ እየተወዛገቡ ነዉ።

ነጋሽ መሐመድ 

አዜብ ታደሰ