የቀድሞ የአንጎላ ፕሬዚዳንት ጆሴ ኤድዋርዶ ዶስ ሳንቶስ የቅርብ ረዳቶች የነበሩ የሁለት ሰዎችን ሃብት መውረሱን የሀገሪቱ ዓቃቤ ሕግ አስታወቀ። ዓቃቤ ህግ እንዳለው በሙስና የተፈጠሩ ሀብቶችን ለማስመለስ እንቅስቃሴ መጀመሩን ተከትሎ የሁለት ጄኔራሎች ንብረት የሆኑ ፋብሪካዎችን ጨምሮ መኖሪያ ቤቶች ተወርሰዋል። ሀብታቸው የተወረሰባቸው የቀድሞው የፕሬዚደንቱ ወታደራዊ ቢሮ ኃላፊ የነበሩት ጄኔራል ማኑኤል ኮፔሊፓ ሄልደር ቪዬራ እና ጡረታ ከወጡ በኋላ በንግድ ስራ ላይ የተሰማሩት ጄኔራል ሊኦፖልዲኖ ፍራጎሶ ናቸው። ጄኔራሎቹ የተጠቀሱትን ንብረቶች በፈቃዳቸው ማስረከባቸው ተሰምቷል። ነገር ግን ሮይተርስ የዜና ወኪል ግለሰቦቹን ለማነጋገር ያደረገው ጥረት አለመሳካቱን ገልጿል። ጄኔራሎቹ በውል የሚከናወኑ ሀገር አቀፍ ስራዎችን ለራስ ጥቅም በማዋል፣ የሃሰት ሰነድ በማዘጋጀት እና በማጭበርበር ወንጀሎች ተከሰዋል። ፕሬዚዳንት ጆአ ሎሬንኮ እጎአ ስልጣኑን ሲረከቡ በሕገወጦች ላይ እርምጃ ለመውሰድ ቃል ገብተው ነበር። ፕሬዚዳንቱ ቀደም ሲል የቀድሞው ፕሬዚዳንት ሴት ልጅ እና ቢሊየነሯን ኤልሳቤት  ዶስአንቶስን እና ወንድማቸውን ከተሰማሩበት የነዳጅ ኩባንያ ስራ እና ከግምጃ ቤት ኃላፊነት አግደው ነበር።

ታምራት ዲንሳ

ሸዋዬ ለገሠ