የቡሩንዲ ተሰናባች ፕሬዝደንት ፔሪ ንኩሩንዚዛ ሞቱ። 56 ዓመታቸዉ ነበር።የቡሩንዲ መንግስት መግለጫ እንዳስታወቀዉ ፕሬዝደንቱ ባለፈዉ ቅዳሜ ሌሊት ልባቸዉን አሟቸዉ ሆስፒታል ገብተዉ ነበር። ዕሁድ ሻል ብሏቸዉ ዋለ።ትናንት ግን ባሰባቸዉ ሞቱ። ንኩሩንዚዛ የቡሩንዲን የፕሬዝደንትነት ሥልጣን የያዙት ሐገሪቱ በቱትሲና በሁቱ ጎሳዎች ታጣቂዎች መካከል በተነሳ ጠብ በተመሰቃቀለችበት ወቅት ነበር። እንደ ጎርጎሪያኑ አቆጣጠር በ2005።ጠቡ የከፋ ደም መፋሳስ እንዳያስከትል በመከላከላቸዉ ይደነቃሉ።የዚያኑ ያሕል በ2015 የሐገሪቱን ሕገ መንግስት ጥሰዉ ለሰወስተኛ ዘመነ-ስልጣን በመወዳደራቸዉና በመመረጣቸዉ ምክንያት በተቀሰቀ ጠብና ግጭት በመቶ ለሚቆጠሩ ሰዎች መገደል፣ መሰወርና በሺ ለሚቆጠሩ የሐገሪቱ ዜጎች መሰደድ ተጠያቂ ናቸዉ የሚል ወቀሳና ትችት ይሰነዘርባቸዋል። ባለፈዉ ግንቦት በተደረገዉ ምርጫ ግን አልተወዳደሩም። ሥልጣናቸዉን በምርጫዉ ላሸነፉት ለገዢዉ ፓርቲ ዕጩ ፕሬዝደንት ኤቫሪስቴ ንዳዪሺሜ ለማስረከብ ሳምንታት ነበር የቀራቸዉ። ንኩሩንዚዛ በጡራታ ሲገለሉ የቡሩንዲ ላዕላይ መሪ የሚል ማዕረግ፣ ለዕድሜልክ የሚከፈል የ530 ሺሕ ዶላር ዓመታዊ ደሞዝ እና ልዩ ቪላ እንዲሰጣቸዉ የሐገሪቱ ምክር ቤት አፅድቆ ነበር።ሞት ቀደማቸዉ።

 

ነጋሽ መሐመድ 

አዜብ ታደሰ