በአፍራሽ ግብረ-ኃይሉ እና “ቤታችንን አናስፈርስም” ባሉ ነዋሪዎች መካከል በተነሳ ውዝግብ ቢያንስ 3 ሰዎች እንደሞቱ እና ከ50 በላይ እንደተጎዱ ተዘግቧል። ይህ በሆነ ወር ባልሞላ ጊዜ ውስጥ በሰኔ ወር አጋማሽ ላይ በአዲስ አበባ ከተማ፣ ንፋስ ስልክ ላፍቶ ክፍለ ከተማ፣ ሰኔ 22 በተመሳሳይ “ከሕገ ወጥ ቤት መፍረስ ጋር በተያያዘ” በአካባቢው ነዋሪዎችና በፖሊስ መካከል በተነሳ ግጭት የሰው ሕይወት ጠፍቶአል። በዚህ አካባቢ ይፈርሳሉ የተባሉት እስከ 20 ሺሕ ድረስ የሚገመቱ ቤቶች ናቸው። መንግሥት ቤቶቹን ለማፍረስ “ሕገ ወጥ” የሚለውን ቃል ቢጠቅስም ቤታቸው የፈረሰባቸው ነዋሪዎች ግን ከ6 እና 7 ዓመታት በፊት ቤቶቹን ሲሠሩ “ሕገ ወጥ ነው” ያላቸው የመንግሥት አካል እንደሌለ ይናገራሉ። ሕገ-ወጥ የተባሉት ቤቶች መፍረሳቸዉ ባያከራክርም፤ ቤቶቹ የፈረሱበት ወቅትና እንዲፈርስ የተደረገበት መንገድ አሁንም ማከራከሩ ቀጥሎአል። ሕገ-ወጥ የሚባሉ ቤቶች ፈረሳና እርምጃዉ ያስከተለዉ ጣጣ የእንወያይ ርእሳችን ነዉ። ሙሉ ዉይይቱን የድምፅ ማዕቀፉን በመጫን ይከታተሉ።

አዜብ ታደሰ

እሸቴ በቀለ