የዓለም የጤና ድርጅት በምህፃሩ WHO ኮቪድ 19 የሚል መጠሪያ የሰጠው የኮሮና ተሐዋሲ እስካሁን ከ140 ሃገራትን በላይ አዳርሷል። በተሐዋሲው በርከት ያሉ ሰዎች የተያዙባቸው ሃገራትም የስርጭቱን ፍጥነት እና ስፋት ለመከላከል የሰዎችን እንቅስቃሴዎች ሙሉ በሙሉ በቤት ውስጥ ከመወሰን አንስቶ የተለያዩ የጥንቃቄ ርምጃዎችን እየወሰዱ ነው። በዚህ መሃልም እያንዳንዱ ሰው በየግሉ ሊያደርገው የሚገባው ጥንቃቄ ይመከራል። ተሐዋሲው የሚያስከትለው ጉዳት ከሰውነት የበሽታ የመከላከል አቅም ጋር እንደሚገናኝ ይነገራል።

ሰዎች በተፈጥሮ በሰውነታቸው ውስጥ በሽታን መቋቋም የሚያስችል አቅም አላቸው። የበሽታ መከላከል አቅሙ ድንገት ስለፈለጉት ወዲያው የሚገኝ ሳይሆን በሂደት በአመጋገብ እና በአኗኗር ዘይቤ እየዳበረ የሚበለፅግ የተፈጥሮ ፀጋ መሆኑን የህክምና ባለሙያዎች ያሳስባሉ። ከሰሞኑ በመላው ዓለም ስጋት ያስከተለው የኮሮና ተሐዋሲ የተሻለ በሽታ የመቋቋም አቅም ያላቸውን ሰዎች ሕይወት እስከመቅጠፍ ሊያሰጋ እንደማይችል ሳይንቲስቶች ተናግረዋል። በእነሱ ስሌትም አንድ ሰው በተሐዋሲው ቢያዝም በሽታውን የመቋቋም አቅሙ ጠንካራ ከሆነ የመሞት ዕድሉ አንድ በመቶ ነው።  በጀርመኗ ሙኒክ ከተማ በግል ክኒሊካቸው የህክምና አገልግሎት የሚሰጡ አጠቃላይ እና የውስጥ ደዌ ሀኪም ዶክተር ሊበን በሽር አልክሆል መጠጦች እና ትንባሆ ማጨስ የተፈጥሮ በሽታ የመከላከል አቅምን እንደሚያሳጡ አመልክተዋል። ስለሰውነት የበሽታ መከላከል አቅም የህክምና ባለሙያዎች ምን ይላሉ?

ሸዋዬ ለገሠ

እሸቴ በቀለ