በታንዛንያ ፕሬዚዳንት ጆን ማጊፉሊ ድንገተኛ ሞት የተለያዩ መንግሥታትና የመንግሥታት ተጠሪዎች ድንጋጤና ሃዘናቸዉን እየገለፁ ነዉ ። ሃዘኑን ተከትሎ በታንዛንያ የአስራ አራት ቀናት የሃዘን ጊዜ ታዉጆአል። ሰንደቃላማም ፕሬዚዳንቱ ከዚህ ዓለም በሞት መለየታቸዉ ከተነገረበት ከትናንት ምሽት ጀምሮ ለ 14 ቀናት ዝቅ ብሎ እንዲዉለበለብ ታዉጆአል። ሁለተኛ ዘመነ ስልጣኛቸዉን ከጀመሩ አምስት ወራት የሆናቸዉ የታንዛንያዉ ፕሬዚዳንት ጆን ፖምቤ ማጉፉሊ፤ ትናንት ምሽት ምክትል ፕሬዚዳንት ሱሁሉ ሃሰን ማጊፉሊ በልብ ሕመም በዳሬሰላም ሆስፒታል ሲረዱ ቆይተዉ ከዚህ ዓለም በሞት መለየታቸዉን በብሔራዊ ቴሌቭዥን ቀርበዉ ይፋ ማድረጋቸዉ ይታወቃል። ከሁለት ሳምንት በላይ ለህዝብ ያልታዩት ፕሬዚዳንት ማጊፉሊ በኮሮና ተይዘዉ አንዴም በኬንያ ሌላ ጊዜም በሕንድ ሆስፒታል አልጋ ላይ ናቸዉ ተብሎ በታንዛንያ በሚገኙ ተቃዋሚ ፖለቲከኞች ሲወራ መሰንበቱ ሲዘገብ ቆይቶአል። ማጊፉሊ ኮሮና የሚባል ተህዋሲ አለ የሚባለውን ነገር «ሃሰት» ብለው በፀሎት እና በአገር ባህል መድሃኒት የሚድን ቀላል በሽታ ሲሉ የሚከራከሩ  ነበሩ። የቶጎ የዉጭ ጉዳይ ሚኒስትር ከዶቼ ቬሌ ጋር ባደረጉት ንግግር በታንዛንያዉ ፕሬዚዳንት ድንገተኛ ሞት የተሰማቸዉን ሃዘን ገፀዋል
«በታንዛኒያዉ ፕሬዝዳንት ሞት በጣም ደንግጠናል! ዛሬ በአፍሪቃ አህጉር እና እያንዳንዳችን አገር ኮቪድ 19ን በተመለከተ እያለፍነዉ ያለዉ ሁኔታ እና የተደቀነብን  ስጋት ነገሩን በይበልጥ እንድንገነዘብ ያደርገናል።  ለታንዛኒያ ህዝብ በዚህ አስደንጋጭ ሞት የተሰማንን ሀዘን እንገልፃለን።  የሀገር መሪ ሞት በየትኛውም ሀገራችን በጣም የሚቆጭ ነው።  እኛም በጣም አዝነናል። »
ፕሬዚዳንት ጆን ማጊፉሊ በጎርጎረሳዉያኑ 2015 ዓም ወደ ስልጣን ከመምጣታቸዉ በፊት ፤ የሥራ እና ከተማ ሚኒስቴር ሆነዉ አገልግለዋል። በመንገድ ሥራ ዝርጋታም ከፍተኛ እመርታን ስላስገኙ ቡልዶዘሩ በሚል ቅፅል ስም ተሰጥቶአቸዉ ነበር። የፕሬዚዳንትነቱን ስልጣን እንደያዙም፤ በታንዛንያ ሙስናን ለመቀነስ ባደረጉት ከፍተና ትግል ይታወቃሉ። የሟች ፕሬዚዳንት ጆን ማጊፉሊ ምክትል ሱሁሉ ሃሰን፤ የጆን ማጊፉሊን ቦታ ተክተዉ ቃለ መሃላ ይፈፅማሉ ተብሎ እየተጠበቀ ነዉ። 
 

አዜብ ታደሰ

እሸቴ በቀለ