ከሰሜን ምዕራባዊ ናይጀሪያ  ካፂና ግዛት ከሚገኝ ትምሕርት ቤት ታግተዉ የነበሩ ወንድ አዳጊ ተማሪዎች በሙሉ ተለቀቁ።የናጄሪያ ባለስልጣናት እንዳስታወቁት አጋቾቹ 344ቱን ተማሪዎች በሙሉ ትናንት ማታ ለቀዋቸዋል።የሐገሪቱ ጦር ሠራዊት ተማሪዎቹን ከነበሩበት ሥፍራ አምጥቶ ዛሬ ለካፂና ክፍለ ግዛት ባለስልጣናት አስረክቧል።የጦሩ አዛዥ ብርጌድየር ጄኔራል ዋራሕ ኢድሪስ እንዳሉት ጦራቸዉ ተማሪዎቹን ያገኘዉ ጉሳዉ በተባለዉ አካባቢ ነዉ።«ተማሪዎቹ ጉሳዉ ወደተባለዉ አካባቢ ነበር የተወሰዱት።እንደነገሩ እንክብካቤ እየተደረገላቸዉ የሚያድሩትም እዚያዉ ነበር።ዛሬ ለፈጣሪ ምስጋና ይግባዉና ልጆቹን ለክፍለ-ግዛቱ አስተዳደር ለማስረከብ ይኸዉ እዚሕ እንገኛለን።አስተዳደሩ በፋንታዉ ለየቤተሰቦቻቸዉ ያስረክባል።»
ባለስልጣናት እንዳሉት ለአንድ ሳምንት ያሕል በአጋቾች ዕጅ የሠነበቱት ተማሪዎች ከመደካከምና መገርጣት በስተቀር ብዙም የጤና እክል አልገጠማቸዉም።ባለስልጣናቱ እንደሚሉት ተማሪዎቹን ባለፈዉ ሳምንት አርብ ከአዳሪ ትምሕርት ቤታቸዉ ያገቱትዉ ቦኮ ሐራም የተባለዉ አክራሪ ደፈጣ ተዋጊ ቡድንና ተባባሪዎቹ ናቸዉ።መንግሥት ተማሪዎቹን ለማስለቀቅ ቤዛ ሥለመክፈል አለመክፈሉ በይፋ የተነገረ ነገር የለም።አንድ ስማቸዉ እንዳይጠቀስ የጠየቁ ባለስልጣን እንዳሉት የመንግስትና ያጋቾቹ ተወካዮች ከተደራደሩ በኋላ አጋቾቹ ታጋቾቹን ጥለዉ ከአካባቢዉ ተሰዉረዋል።ቦኮ ሐራም የዛሬ 6 ዓመት ግድም 276 ልጃገረድ ተማሪዎችን አግቶ ነበር።

ነጋሽ መሐመድ

ሸዋዬ ለገሰ