የናይጀርያ ትልቅ ከተማ በሆዉ በሌጎስ በነዳጅ ዘይት ማስተላለፍያ ቧንቧ ላይ በደረሰዉ ፍንዳታ የሞቱት ሰዎች ቁጥር 17 መድረሱ ተነገረ። ትናንት እሁድ ምሽት ላይ በደረሰዉ በዚህ አደጋ ከፍተኛ ጉዳት የደረሰባቸዉ ሰዎች 25 እንደሆነም ተመልክቶአል። በፍንዳታዉ «አቡሌ  አዶ » በተሰኘ መንድር የመኖርያ ቤቶችን ጨምሮ ወደ 50 የሚጠጉ ሕንጻዎች እንዲሁም አካባቢዉ ላይ የነበሩ ከባድ እና ቀላል ተሽከርካዎች መዉደማቸዉ ተመልክቶአል።  ፍንዳታዉ እንደደረሰ የሟቾች ቁጥር 15 መሆኑ ቢነገርም፤ የአደጋ ጊዜ ሰራተኞች ዛሬ ከሕንጻ ፍርስራሽ ስር ሁለት አስክሬን ማግኘታቸዉን እና ምናልባትም የሟቾች ቁጥር ሊጨምር እንደሚችል ጠቁመዋል። ንብረትነቱ የመንግሥት የሆነዉ «የናይጀርያ ብሔራዊ ነዳጅ ኮርፖሬሽን» እንደገለፀዉ ከሆነ እሳት አደጋዉ የተነሳዉ አንድ የከባድ ጭነት ተሽከርካሪ የነዳጅ መያዣዉን ከገጨ በኋላ መሆኑን የሚያመላክት መረጃ አለ ብሎአል። ፍንዳታዉ እጅግ ከባድ ስለነበር አካባቢዉ ላይ የነበሩ ሕንጻዎች ወድመዋል፤ የድርጅቱ የነዳጅ ማስተላለፍያ ቧንቧዎችም መዉደማቸዉን የናይጀርያዉ የመንግሥት የነዳጅ ድርጅት ገልፆአል።     

አዜብ ታደሰ 

ሸዋዬ ለገሰ