ኢትዮጵያ እና የቻይናው አሊባባ ግሩፕ በኢትዮጵያ ዲጂታል የግብይት ማዕከል ለመገንባት ባለፈው ሰኞ ህዳር 15 ቀን 2012 የመግባቢያ ሰነድ ተፈራረመዋል። ስምምነቱ ሲፈረም ጠቅላይ ሚኒስትር አቢይ አሕመድ፣ የአሊባባ ግሩፕ ተባባሪ መሥራች ጃክ ማ እና የኩባንያው ዋና ሥራ አስፈፃሚ ኤሪክ ጂንግ ተገኝተዋል።

"ዓለም አቀፍ ኤሌክትሮኒክ ትሬድ ፕላትፎርም" የሚል ስያሜ የተሰጠው ይህ ማዕከል የድንበር ተሻጋሪ ንግድን ለማጠናከር፣ የአገልግሎት አሰጣጥን ለማቀላጠፍ፣ የኢትዮጵያ አነስተኛ እና መካከለኛ ተቋማት የቻይናንና ሌሎች ገበያዎችን እንዲደርሱ ለማገዝ ያለመ መሆኑን አሊባባ ግሩፕ ባወጣው መግለጫ አስታውቋል። ከዚህ በተጨማሪም ማዕከሉ "የክኅሎት ሥልጠና ለማቅረብ ያስችላል" ብሏል ኩባንያው።

ጠቅላይ ሚኒስትር አቢይ የዲጂታል የግብይት እና ስልጠና ማዕከሉ ወደ ኢትዮጵያ መምጣት «ኢትዮጵያን በመጪው አስር ዓመት ውስጥ በአፍሪካ የኢኮኖሚ ቀዳሚነትን ከያዙ አምስት ሀገራት ተርታ ለማሰለፍ ዓይነተኛ እርምጃ ነው» ብለውታል። ጠቅላይ ሚኒስትሩ የማዕከሉ በኢትዮጵያ መቋቋም ለአነስተኛና መካከለኛ የንግድ ሥራዎች የንግድ ምህዳርን ለማስፋት እንደሚያግዝም አክለው ገልጸዋል።

"ዓለም አቀፍ የኤሌክትሮኒክ ትሬድ ፕላትፎርም" አሊባባ ግሩፕ ቴክኖሎጂ እና ፖሊሲን በማጣመር ለጥቃቅናን እና አነስተኛ ተቋማት፣ ሴቶች እና ወጣቶች የተሻለ ዕድል የሚሰጥ አካታች ዓለም አቀፍ የንግድ ሥርዓት ለመፍጠር የሚያቀነቅነው ዓለም አቀፍ ጥረት ነው። ኢትዮጵያ ከሩዋንዳ ቀጥሎ በአፍሪካ ይህንን ተቋም በማቋቋም ሁለተኛ አገር ትሆናለች። በመንግሥት እና በግሉ ዘርፍ ውይይት ላይ የተመሰረተ እንደሆነ የሚነገርለት "ዓለም አቀፍ የኤሌክትሮኒክ ትሬድ ፕላትፎርም" ባለፉት ሁለት አመታት በቻይና፣ ማሌዥያ እና ቤልጅየም ሥራ ጀምሯል። 

የዲጂታል ግብይት እና ስልጠና ማዕከሉን ወደ ኢትዮጵያ ያመጣው የአሊባባ ግሩፕ ተባባሪ መስራች ጃክ ማ እየተገባደደ ባለው የጎርጎሮሳዊው 2019 ዓመት በቻይና በሐብት መጠን አንደኛ ደረጃ ላይ ተቀምጠዋል። የ55 ዓመቱ ቱጃር 39·7 ቢሊዮን ዶላር የሚገመት ጥሪት እንዳላቸው ፎርብስ መጽሔት አስታውቋል። ይህም በዓለም የቱጃሮች ዝርዝር 21ኛ ደረጃ ላይ እንዲቀመጡ እንዳደረጋቸው የፎርብስ መረጃ ይጠቁማል። ጃክ ማ ባለፈው መስከረም ከአሊባባ ዋና ሊቀመንበርነታቸው መልቀቃቸው ይታወሳል።

የዓለም አቀፍ የኤሌክትሮኒክስ የግብይት ማዕከል በኢትዮጵያ ስለሚያስገኘው ጥቅም እና ሊያጋጥመው ስለሚችለው ተግዳሮት ባለሙያዎች የሰጡትን ትንታኔ ለማድመጥ የድምጽ ማዕቀፉን ይጫኑ። 

ዮሃንስ ገብረእግዚያብሔር

ተስፋለም ወልደየስ