የአንጎላ ፕሬዝዳንት ዦአ ሎሬንሶ  በአንጎላ ከሚካሄደው ፀረ-ሙስና ትግል ማንም እንደማያመልጥ አስታወቁ። ፕሬዝዳንት ሎሬንሶ  ከዶቼቬለ ጋር ባካሄዱት ቃል ምልልስ በተለይ ሃብት ንብረታቸውን በህገ ወጥ መንገድ ካሃገሪቱ ካሸሹ ጋር ምንም ዓይነት ድርድር እንደማይካሄድ ገልጸዋል። በአንጎላ በዚህ ወንጀል ከተከሰሱት መካከል የቀድሞው የአንጎላ ፕሬዝዳንት የሆዜ ኤድዋርዶ ዶስሳንቶስ የበኩር ልጅ ኢዛቤል ዶሳንቶስ ይገኙበታል።የአንጎላ አቃቤያነ ህግ ከ12 ቀናት በፊት ኢዛቤል ዶስ ሳንቶስን በህገ ወጥ መንገድ የተገኘን ገንዘብ ሕጋዊ በማስመሰል፣ ሰነድ በማጭበርበር እና በሌሎችም የኤኮኖሚ ወንጀሎች ከሰዋቸዋል።ከአፍሪቃ ሴቶች እጅግ ባለፀጋዋ ሴት የሚባሉት ኢዛቤል የአባታቸውን ስልጣን መከታ በማድረግ 2.1 ቢሊዮን ዶላር የሚገመት የንግድ መረብ በመመስረትም ተከሰዋል።በአንጎላ የኢዛቤል ዶሳንቶስ ሀብት እንዳይንቀሳቀስ ተደርጓል። በቀድሞ የሀገሪቱ ፕሬዝዳንት ዶስ ሳንቶስ ዘመን ባለሥልጣን ላይ የነበሩት ሎሬንሶ በሙስና ላይ ዘመቻ የከፈቱት  ትክክለኛው ጊዜ በመሆኑ ምክንያት እንደሆነ ለዶቼቬለ ተናግረዋል።
«እውነት ነው በፕሬዝዳንት ሆሴ ኤድዋርዶ ዴስ ሳንቶስ ስር አገልግያለሁ።ርሳቸው 40 ዓመታት ለሚጠጋ ጊዜ በሥልጣን ላይ ቆይተዋል።ማንም የስርዓቱ አካል አልነበርኩም ማለት አይችልም።ሁላችንም የስርዓቱ አካል ነበርን። ሆኖም ስህተቱን ለማረም እና ለማሻሻል በውስጡ የነበሩት የተሻለ ደረጃ ላይ የሚገኙ ናቸው።ነገሮቹን ሁል እንዳሉ ብንተዋቸው ለኛ ምቹ ይሆን ነበር።ሆኖም ያ ትክክል ይሆናልን? እኛ አሁን የለውጥ እድል አግኝተናል።እናም ይህን ማድረጊያ ትክክለኛ ጊዜ ነው።» 
ፕሬዝዳንት ሎሬንሶ ኢዛቤል ወህኒ እንዲውርዱ ይፈልጋሉ ወይ ተብሎ ከዶቼቬለ ለቀረበላቸው ጥያቄ «ይህ የፍትህ ጉዳይ ነው።እኔ ዳኛ አይደለሁም ሲሉ መልሰዋል።ፕሬዝዳንት ሎሬንሶ ተቃዋሚዎች የአንጎላ የፍትህ ስርዓት ነጻ አይደለም ሲሉ የሚያቀርቡትን ትችትም አስተባብለዋል። የፍትህ ስርዓቱ አሁን ፣በነጻነት መስራት ይቻላል ያሉት ሎሬንሶ ለዚህም በአሁኑ ጊዜ የሚካሄዱት ከሙስና ጋር የተያያዙ በርካታ ክሶች ማሳያ መሆናቸውን አስረድተዋል።

ኂሩት መለሰ

አዜብ ታደሰ