የአዲስ አበባ ስታዲየምን ዓለም አቀፍ መስፈርቶችን አሟልቶ ለማጠናቀቅ ቀሪ ሥራዎች ከሦስት ወራት በላይ እንደማይፈጅ በባሕል እና ስፖርት ሚንስትር የስፖርት ልማት ዘርፍ ሚንስትር ዴኤታ አምባሳደር መስፍን ቸርነት ዐስታወቁ ። ሚኒስቴር ዴኤታው በተለይ ከዶይቸ ቬለ (DW) ጋ ዛሬ ባደረጉት ቃለ መጠይቅ፦ ይህ ግምታዊ ሐሳባቸው መሆኑንም አክለዋል ። 

በአዲስ አበባ ስታዲየም አስፈላጊ የሚባሉ የማሻሻያ ሥራዎች ተጠናቀው የሜዳ ሣርን የማሻሻልን የመሳሰሉ የማሟያዎች፤ ባለሥልጣኑ እንዳሉት «ጥቃቅን» ሥራዎችን ለመፈጸም ርብርብ እየተካሄዱ መሆኑን ገልጸዋል ። በኢትዮጵያበሌሎች ከተሞችም ችግሩን ለመቅረፍ ጥረት እየተደረገም ነው ብለዋል።  አዲስ አበባ ስታዲየምን በጀት መድቦ እየሠራ የሚገኘው ፌዴራል መንግሥት መሆኑን ጠቅሰዋል ።  የድሬዳዋ ስታዲየም በድሬዳዋ ከተማ መስተዳደር ወጪ እየተሠራ በጥሩ ሁኔታ ላይ ከሚገኙት መካከል አንዱ ነው ብለዋል ። በሐዋሳ እና አሦሳ «አንዳንድ እንቅስቃሴዎች አሉ» ያሉት ባለሥልጣኑ፦ ቃሊቲ አካባቢ ያለው የቃሊቲ ስታዲየም በአዲስ አበባ መስተዳደር «ልዩ ትኩረት ተሰጥቶት» እየተሠራ፤ በጥሩ ሁኔታ ላይ እንደሚገኝ ጠቅሰዋል ። የባሕርዳር ስታዲየምን የሚሠራው የአማራ ክልል «ራሱ በጀት መድቦና አጋር አስተባብሮ» መሆኑን ገልጸዋል ።  

አደይ አበባ ስታዲየምን በተመለከተ፦ «መንግሥት ተጨማሪ ድጋፍ በማፈላለግ ላይ» እንደሚገኝ ይፋ አድርገዋል። «ከተወሰኑ ጊዜያት በኋላ በጣም ተወዳዳሪ እና  በቁጥር ከሦስት እስከ አራት የተጠናቀቁ ጥሩ ስታዲየሞች ባለቤት» መሆን እንደሚቻልም አክለዋል ። «በምንም አይነት ችግር ውስጥ ብንሆንም መንግሥት ለዘርፉ በጀት መድቦ ድጋፍ እያደረገ መሆኑን «ላረጋግጥልህ እወዳለሁ» ብለዋል ። 

ባለፉት ጊዜያት እግር ኳስን ጨምሮ ለስፖርት መሠረተ ልማት ማዘውተሪያዎች የተሠሩ ሥራዎች ዓለም አቀፍ መስፈርቶችን አለማሟላታቸው ችግር ፈጥሮ መቆየቱን ሚንስትር ዴኤታው ተናግረዋል ። በኢትዮጵያ የሚገኙ ስታዲየሞች በአጠቃላይ ዓለም አቀፍ መስፈርቶችን አያሟሉም በሚል ካፍ ጨዋታ እንዳይካሄድባቸው እገዳ ካስተላለፈ  ከሁለት ዓመታት በላይ ማለፉ ይታወቃል ። በእነዚህ ጊዜያት ብሔራዊ ቡድኑ በሀገር ውስጥ በሜዳው ሊያደርጋቸው የሚገቡ ጨዋታዎችንወደ ሌሎች ሃገራት እየተጓዘ ለማካሄድ ተገድዷል ። 

ማንተጋፍቶት ስለሺ

ነጋሽ መጐመድ