በሔቨን አወት ጉዳይ የተቀሰቀሰው በኢትዮጵያ ወሲባዊ ጥቃት ለተፈጸመባቸው ሴቶች ፍትኅ እንዲሰጥ የሚደረገው ውትወታ የመቀዛቀዝ አዝማሚያ አሳይቷል። በባሕር ዳር ከተማ በኃይል ከተደፈረች በኋላ ሕይወቷ ያለው የሰባት ዓመቷ ሔቨን ጉዳይ መነጋገሪያ የሆነው በፍርድ ቤት ጥፋተኛ የተባለው ተከሳሽ ይግባኝ መጠየቁ ከተሰማ በኋላ ነው።

በኢትዮጵያ እንደ ሔቨን ሁሉ ብርቱ ገነነ፣ ፋጡማ ኡጋስ፣ ጫልቱ አብዲ ፣ ሐና ላላንጎ እና ፀጋ በላቸውን የመሳሰሉ ሕጻናት፣ ወጣቶች እና አዋቂ ሴቶች ተመሳሳይ አሰቃቂ ጥቃት ተፈጽሞባቸዋል።

በኢትዮጵያ ዕድሜያቸው ከ15 እስከ 49 ከሚገኝ ሴቶች መካከል 10 በመቶው ጾታዊ ጥቃት እንደደረሰባቸው የተባበሩት መንግሥታት የሕጻናት መርጃ ድርጅት (UNICEF) ከጥቂት ዓመታት በፊት ይፋ ያደረገው አንድ ሰነድ ያሳያል።

የትግራይ፣ አማራ እና የአፋር ክልሎችን ያዳረሰው የሰሜን ኢትዮጵያ ጦርነትን ጨምሮ በሀገሪቱ የተለያዩ አካባቢዎች የተቀሰቀሱ ግጭቶች ወሲባዊ ጥቃት እንዲስፋፋ አድርገዋል። ግጭቶቹ አስተዳደራዊ መዋቅሮችን እና የጸጥታ ተቋማትን በማዳከማቸው አጥፊዎች ተገቢውን ቅጣት እንዳያገኙ አስተዋጽዖ እያደረጉ ነው።

ለመሆኑ ወሲባዊ ጥቃት ለተፈጸመባቸው ፍትኅ እንዲሰጥ ይደረግ የነበረው ውትወታ ምን ያህል ውጤታማ ሆነ? ችግሩስ ምን ያክል አሳሳቢ ነው? የሀገሪቱ ሕግ ለተበዳዮች ፍትኅ ማረጋገጥ ለምን ተሳነው? ወሲባዊ ጥቃትን ለማስቆም ማን ምን ማድረግ አለበት?

በኢትዮጵያ ሰብአዊ መብቶች ኮሚሽን የሴቶች፣ የሕፃናት፣ የአካል ጉዳተኞች እና የአረጋውያን መብቶች ኮሚሽነር ርግበ ገብረሐዋርያ፣ በጾታ ዕኩልነት ላይ በአማካሪነት የሚሠሩት ወይዘሮ አሻም አሳዝነው፤ የጾታ ዕኩልነት አዶቮኬት የሆኑት ርብቃ ዳዊት እና ረዳት ፕሮፌሰር ሱራፌል ወንድሙ ለውይይቱ ተሳትፈዋል።

ሙሉ ውይይቱን ለማድመጥ የድምጽ ማዕቀፉን ይጫኑ፦

እሸቴ በቀለ