ዓለም በጉጉት ሲጠብቀዉ የነበረዉ የቀድሞው የሱዳን ፕሬዝዳንት ኦማር ኧል-በሽር የዛሬ የፍርድ ቤት ዉሎ ለኮሮና ጥንቃቄ በቂ ዝግጅት አልተደረገም በሚል  ለሌላ ቀጠሮ ተዘዋወረ። ኦማር ኧል-በሽር  ከሦስት አስርት ዓመታት በፊት ሥልጣን በያዙበት መፈንቅለ-መንግሥት ተከሰው ዛሬ ፍርድ ቤት ሊቆሙ ቀጠሮ ተይዞ ነበር። በጀርመኑ የዜና አገልግሎት « dpa » መሰረት መዲና ካርቱም በሚገኘዉ ከፍተኛ ፍርድ ቤት ፤ በርካታ ሕዝብ የፍርድ ሂደቱን ለመከታተል ተሰብስቦ ነበር፤ ኧል-በሽር  ፍርድ ቤት ሲደርሱ ጤናማ ቁመና ይታይባቸዋል ፤ ፈግግታም ፊታቸዉ ላይ ይታይ ነበር ዘግቦአል። ይሁንና የፍርድ ሂደቱ ሊካሄድበት በታቀደዉ ክፍል የኮሮና ስርጭትን ለመከላከል የማኅበራዊ ርቀትን መጠበቅ የማይቻልበት እና ሌሎች የኮረና ስርጭት መከላከያ ደንቦችን ያላሟላ ባለመሆኑ የፍርድ ሂደቱ ለ ነሐሴ 5 መቀጠሩ ታዉቋል። ዛሬ ፍርድ ቤት ከተገኙት ጠበቆች መካከል እንደተናገሩት ኧል-በሽር ሕገ-መንግሥቱን በመጣስ እና የታጠቀ የጦር ኃይልን ይዞ በማመጽ ይከሰሳሉ ሲል ለጀርመኑ የዜና ወኪል « dpa » ተናግሮአል። የ 76 ዓመቱ የቀድሞ የሱዳን ፕሬዚዳንት 1989 ዓመቱ መፈንቅለ መንግሥት ክስ ለፍርድ የሚቀርቡት ከበርካታ ተባባሪዎቻቸዉ ጋርም ነዉ። ከተከሳሾቹ መካከል የቀድሞ ምክትል ፕሬዚዳንት ፤ ሚኒስትሮች እና አገረ ገዥዎች ይገኙበታል።  የቀድሞው የሱዳን ፕሬዝዳንት ኦማር ኧል-በሽር የዛሬ 31 ዓመት በመንግሥት ግልበጣ ስልጣን የተቆናጠጡት በዴሞክራሲያዊ መንገድ ተመርጠው ሥልጣን የያዙትን ጠቅላይ ምኒስትር ሳዲቅ አል-መሐዲን አስወግደዉ ነበር። 

አዜብ ታደሰ 

ነጋሽ መሐመድ