የኬንያ ፖሊስ "አክራሪ" ያለውን አንድ ግለሰብ ለመያዝ ሲሞክር የተጠርጣሪውን ሁለት ሕፃናት ልጆች እና ያልተወለደ ፅንስ መግደሉን አንድ የሰብዓዊ መብት ተከራካሪ ተቋም አስታወቀ። የሕፃናቱን መገደል ያረጋገጠው ፖሊስ ከአል-ቃኢዳ ግንኙነት አለው በሚል የተጠረጠው ግለሰብ "እንደ መከለያ ተጠቅሞባቸዋል" ብሏል። 

ድርጊቱ የተከሰተው ትናንት አርብ ማምሻውን በክዋሌ ግዛት ኪቡንዳኒ በተባለ ቦታ የኬንያ ልዩ ፖሊስ አባላት መሐመድ ማፔንዚ በተባለው ተጠርጣሪ መኖሪያ ቤት የጦር መሳሪያ ፍለጋ ብርበራ ለማድረግ ባቀኑበት ወቅት ነው። 

የኬንያ ፖሊስ ስለ ኩነቱ ያዘጋጀው ሰነድ እንደሚለው ተጠርጣሪው በተባለው ቦታ እንደሚገኝ ጥቆማ የተሰጠው በሶማሊያ የሚገኝ የአል-ሸባብ አባል ሳይሆን አይቀርም ከተባለ ግለሰብ ነው።

ተጠርጣሪው መሐመድ ማፔንዚ መኖሪያ ቤቱን እንዲከፍት ቢጠየቅም አሻፈረኝ ማለቱን የኬንያ ፖሊስ ያዘጋጀው ሰነድ አትቷል። ይኸው ሰነድ "ፖሊሶች ሰብረው ለመግባት በዝግጅት ላይ ሳሉ ተጠርጣሪው የመኖሪያ ቤቱን ከፍቶ ቦምብ ወረወረባቸው። አንዱ በትንሹ ተጎዳ። ይኸ ፖሊሶች ተኩስ ከፍተው ተጠርጣሪውን እና እንደ መከለያ የተጠቀመባቸው ሁለት ሕጻናትን በጽኑ ለማቁሰል አነሳሳቸው" በማለት ትናንት ምሽት የተፈጠረውን አብራርቷል። የተጠርጣሪው ባለቤት እና ሶስት ሌሎች ሕፃናት መቁሰላቸውንም አረጋግጧል።

ሐኪ አፍሪካ የተባለው የሰብዓዊ መብት ተሟጋች ድርጅት ዋና ሥራ አስፈፃሚ ሑሴን ኻሊድ ፖሊስ በተኮሰው ጥይት የቆሰለችው የተጠርጣሪው ባለቤት እርጉዝ እንደነበረች አረጋግጠዋል። የመሐመድ ባለቤት ሕይወት ቢተርፍም ያረገዘችው ልጅ መሞቱን ዋና ሥራ አስፈፃሚው ተናግረዋል። 

ከሞቱት ሁለት ሕፃናት አንዷ የሆነችው የ3 አመት አዳጊ ጭንቅላቷ ላይ በጥይት እንደተመታች አስከሬኖቹ የሚገኙበትን ሆስፒታል ሔደው የተመለከቱት ሑሴን ኻሊድ ለአሶሼትድ ፕሬስ ተናግረዋል። ሑሴን ኻሊድ በመጀመሪያ ደረጃ ምርመራቸው "ፖሊስ ያልተመጣጠነ ኃይል ተጠቅሟል" የሚል ድምዳሜ ላይ ደርሰዋል። 

የሰብዓዊ መብት ተከራካሪዎች ለረዥም አመታት የኬንያ ፖሊስ በኃይል ገንዘብ ለመቀበል እና ጥፋቱን ለመሸፋፈን ተጠርጣሪዎችን ይገድላል ሲሉ ይወነጅሉ ነበር።  በቅርቡ የኬንያ መንግሥት የኮሮና ወረርሽኝን ለመቆጣጠር የጣለውን የሰዓት ዕላፊ ገደብ ተላልፈዋል ያላቸውን 18 ሰዎች  ፖሊስ ገድሏል የሚል ክስ ቀርቦበታል።