በኢትዮጵያ ሕገ መንግሥት አንቀፅ 47 መሰረት ማንኛውም ብሔር ብሔረሰብ በማንኛውም ጊዜ የክልልነት ጥያቄ ማንሳት ሕገ መንግሥታዊ መብቱ እንደሆነ ይደነግጋል ። ጥያቄው ሲነሳም መንግሥት ተገቢውን ሕገመንግሥታዊ ምላሽ እንደሚሰጥ አንቀጹ በግልጽ ይጠቅሳል ። ሕገ መንግሥቱ በሚፈቅደው መሠረት ከዚህ ቀደም የሲዳማ ነዋሪዎች በተደጋጋሚ ባቀረቡት ጥያቄ ክልል ሆነዋል ። የጉራጌ ማኅበረሰብ በክልል እንደራጅ ጥያቄ ማቅረቡን ቀጥሏል ።

ጥያቄው ካለፉት ሦስት ዐሥርተ ዓመታት በላይ መዝለቁ ይነገራል ። የጉራጌ ዞን ነዋሪዎች ከዚህ ቀደም ለአምስት ጊዜያት ከቤት ያለመውጣት አድማ አድርገው ጥያቄያቸው ምላሽ አላገኘም ። ይልቁንም አደባባይ ለተቃውሞ የወጡ ሰዎች ከፀጥታ አስከባሪዎች በተተኮሱ ጥይቶች መገደላቸው እና በርካቶች ለአካል ጉዳት መዳረጋቸውን ዶይቸ ቬለ ከዚህ ቀደም ዘግቧል ። በተጨማሪም በክላስተር መደራጀትን በተመለከተ አንቀበልም ያሉ የጉራጌ ዞን እና የደቡብ ክልል የምክር ቤት አባላት፤ ተቃዋሚ ፓርቲዎች፣ የሕግ ባለሞያዎች እንዲሁም ወጣቶች ለእስር መዳረጋቸው ተዘግቧል ። ከዚህ ጋር በተያያዘ ዞኑ በኮማንድ ፖስት ስር ከሆነ ወራት ተቆጥሯል ።

ጠቅላይ ሚንሥትር ዐቢይ አሕመድ በቅርቡ የጉራጌ ዞን ዋና ከተማ ወልቂጤ በሄዱበት ወቅት ነዋሪዎች ብርቱ ተቃውሟቸውን ከቤት ውስጥ ባለመውጣት ጭምር ገልጠዋል ።  ለመሆኑ የጉራጌ ሕዝብ ክልል ልሁን፤ ራሴን በራሴም ላስተዳድር ብሎ ያቀረበው ጥያቄ ምን ደረጃ ላይ ይገኛል?   ከመንግሥት የተገኘው ምላሽስ ምንድን ነው? «የጉራጌ የክልልነት ሕገ መንግሥታዊ ጥያቄ እና ምላሹ» ፦ የዛሬው የእንወያይ መሰናዶዋችን ርእሰ ጉዳይ ነው።

በውይይቱ 4 እንግዶች ተሳታፊ ናቸው። እንግዶቻችን 

1. አብርሃም በርታ (ዶ/ር) የኢዜማ ፓርቲን በመወከል በጉራጌ ዞን የእዣ ወረዳ ተመራጭ የሕዝብ ተወካዮች ምክር ቤት አባል
2. አቶ መላኩ ሣኅሌ፦ የጎጎት ለጉራጌ አንድነት እና ፍትሕ ፓርቲፓርቲ ምክትል ጽ/ቤት ኃላፊ
3.  ወ/ሮ ዛይዳ ግዛቸው፦ የወልቂጤ ከተማ ተወላጅ እና ነዋሪ የማኅበረሰብ አንቂ
4. አቶ አሮን ዳጎል፦ የሕግ እና አስተዳደር መምሕር ናቸው።

ማንተጋፍቶት ስለሺ

ኂሩት መለሰ