በድሬደዋ ሰሞኑን በተከሰተው ጎርፍ ለተጎዱ እና በጎርፍ ስጋት አካባቢ የሚገኙ ሰዎችን በመጠለያ ቆይተው ድጋፍ እንዲያገኙ የማድረግ ስራ እየሰራ መሆኑን የአስተዳደሩ አደጋ ስጋት ስራ አመራር ፅ/ቤት ገለፀ ፡፡ በቀጣይ በጎርፍ ሳቢያ የሚደርስ ጉዳትን ለመከላከል ዝግጅት ማድረጉን የመስተዳድሩ ፖሊስ አስታውቋል።የድሬደዋ አስተዳደር የአደጋ ስጋት ስራ አመራር ፅ/ቤት ሃላፊ አቶ ሀርቢ ቡህ ሰሞኑን በከተማው በተከሰተው ጎርፍ ለተጎዱ እና የጎርፍ ስጋት ባለባቸው አካባቢዎች ውስጥ የሚገኙ ሰዎችን በመጠለያ ቆይተው ድጋፍ እንዲያገኙ የማድረግ ስራ እየተሰራ መሆኑን ገልፀዋል።ኃላፊው ዝናቡ በቀጣይ ለረዥም ጊዜያት የሚቆይ በመሆኑ ነዋሪዎች እና ጉዳዩ በቀጥታ የሚመለከታቸው የመስተዳድሩ ተቋማት ተገቢውን ማድረግ አለባቸው ብለዋል።የድሬደዋ አስተዳደር ፖሊስ ኮምሽን የህዝብ ግንኙነት እና የለውጥ ስራዎች ዳይሬክቶሬት ዳይሬክተር ኮማንደር ገመቹ ካቻ በበኩላቸው ስለ ወቅቱ ዝናብ እና ጎርፍ  ህብረተሰቡን ግንዛቤ ለማስጨበጥ በተለያየ አግባብ መሰራቱን ገልፀዋል፡፡ ለድሬደዋ ስጋት የሆነው የጎርፍ ምንጭ በአንድ በኩል በደጋው ወይም በምስራቅ እና ምዕራብ ሐረርጌ አካባቢ የሚዘንበውን ዝናብን ተከትሎ የሚመጣው ድንገተኛ ጎርፍ መሆኑን የተናገሩት ኮማንደር ገመቹ በዚህ መልኩ የሚመጣ ጎርፍ ጉዳት እንዳያስከትል ፖሊስ የተለያየ ዝግጅት ማድረጉን አስረድተዋል።በድሬደዋ ሰሞኑን ከጣለው ዝናብ ጋር በተያያዘ የአስራ ሶስት ሰዎች ህይወት ሲያልፍ በሶስት ሰዎች ላይ ከባድ የአካል ጉዳት መድረሱ ይታወሳል፡፡  

መሳይ ተክሉ

ኂሩት መለሰ

አዜብ ታደሰ