የጥር 13 ቀን፣ 2016 ዓ.ም የስፖርት ዘገባ
ሰኞ፣ ጥር 13 2016![የአፍሪቃ እግር ኳስ ግጥሚያ በአይቮሪኮስት](https://static.dw.com/image/67983052_800.webp)
በአይቮሪኮስት አስተናጋጅነት የሚከናወነው የአፍሪቃ እግር ኳስ ዋንጫ ግጥሚያ ያልተጠበቁ ውጤቶችን እያስተናገደ 3ኛ ዙር ላይ ደርሷል ። ከ24ቱ ቡድኖች 3ኛ ዙር ግጥሚያ ሳያደርጉ ወደ ቀጣዩ የጥሎ ማለፍ ግጥሚያ ማለፋቸውን ያረጋገጡት ሁለት ቡድኖች ኬፕ ቬርዴ እና ሴኔጋል ናቸው ። በቡንደስሊጋው ባዬርን ሙይንሽን ሽንፈት ሲገጥመው በፕሬሚየር ሊጉ ደግሞ ሊቨርፑል በአስተማማኝ መልኩ ድል አድርጓል ። ኢትዮጵያውያን በአትሌቲክስ ድል ተቀዳጅተዋል ።
የአፍሪቃ የእግር ኳስ ዋንጫ
በአፍሪቃ እግር ኳስ ዋንጫ የምድብ ግጥሚያ ትናንት ደቡብ አፍሪቃ ናሚቢያን 4 ለ0 ድል አድርጋለች ። ደጋፊዎች ደቡብ አፍሪቃ አምስተኛ ግብ እንድታስቆጥር በእጅ ምልክት እየሰጡ ሲያበረታቱ ነበር ። በእርግጥም በአራት ግብ ብቻ የረኩ ያልመሰሉት ደቡብ አፍሪቃ ተጨዋቾች አምስተኛ ሊሆን የሚችል ኳስ መክኖባቸዋል ። ከምሥራቅ አፍሪቃ ዘንድሮ ብቸኛ ሆና ያለፈችው ታንዛኒያ የማሸነፍ እድሏን በባከነ ሰአት ከእጇ አስወጥታለች ። ዛምቢያ በ88ኛው ደቂቃ ላይ ባስቆጠረው ግብ ሁለቱ ቡድኖች ነጥብ ተጋርተው ወጥተዋል ።
ማሸነፍ ሲገባት የማታ ማታ ድሏን አሳልፋ የሰጠችው ታንዛኒያ በ1 ነጥብ ብቻ ተወስናለች ። ከኮንጎ ዴሞክራሲያዊ ሪፐብሊክ ጋ ረቡዕ የመጨረሻ ግጥሚያዋን ታከናውናለች ። በምድቧ ዛምቢያ በ2 ነጥብ ይከተላል ። የኮንጎ ዴሞክራሲያዊ ሪፐብሊክ ተመሳሳይ 2 ነጥብ ይዞ 2ኛ ደረጃ ላይ ሰፍሯል ። ሞሮኮ በ4 ነጥብ 1ኛ ነች ።
ከዛሬ ግጥሚያዎች መካከል፦ ጊኒ ቢሳዎ ከናይጄሪያ እንዲሁም አሰተናጋጇ አይቮሪኮስት ከኢኳቶሪያል ጊኒ የሚያደርጓቸው ይገኙበታል ። ሞዛምቢክ ከጋና እንዲሁም ኬፕቬርዴ ከግብጽ ጋ የሚያደርጓቸው ጨዋታዎችም ዛሬ የሚጠበቁ ናቸው ። በነገው እለት ደግሞ፦ ጋምቢያ ከካሜሩን፤ ጊኒ ከሴኔጋል፤ ሞሪታንያ ከአልጄሪያ እንዲሁም አንጎላ ከቡርኪናፋሶ ጋ ይጋጠማሉ ። ረቡዕ ዕለት ናሚቢያ ከማሊ፤ ደቡብ አፍሪቃ ከቱኒዝያ፤ ዛምቢያ ከሞሮኮ እንዲሁም ታንዛኒያ ከኮንጎ ዴሞክራሲያዊ ሪፐብሊክ ጋ ተጋጥመው የምድብ ግጥሚያዎች ይጠናቀቃሉ ። ከቅዳሜ ጀምሮም የጥሎ ማለፍ ግጥሚያዎች ይኖራሉ ።
ዝክረ-ቤከንባወር
በጀርመን እግር ኳስ ታሪክ ገናና ከነበሩ ጥቂት ተጫዋቾች መካከል፦ «ንጉሠ ነገሥት» የሚል ስያሜን የተቀዳጀው የ78 ዓመቱ ፍራንስ ቤከን ባወር ዝክር ባለፈው ሳምንት ተከናውኗል ። ፍራንስ ቤከን ባወር በወጣትነት ዘመኑ ለ18 ዓመታት ተሰልፎ በተጫወተበት ባዬርን ሙይንሽን አሬና ስታዲዬም ነበር ዝክሩ ዐርብ እለት የተከናወነለት ። በዝክር ስነስርዓቱ ላይ ከፍራንስ ቤከን ባወር ቤተሰቦች በተጨማሪ ታዋቂ ስፖርተኞች እና ፖለቲከኞችም ተገኝተዋል ። የጀርመን ርእሰ-ብሔር ፍራንክ-ቫልተር ሽታየንማየር በዝክሩ ላይ ስለ ቤከንባወር ሲናገሩ፦ «ታላቁ ጀርመን» ሲሉ አወድሰውታል ። «የሀገራችን ተወዳጁ መልእክተኛ» ሲሉም አክለዋል ።
«የተከበራችሁ ሐዘንተኞች፤ እኔ በዓለም ዙሪያ የምር ብዙ ተጉዣለሁ እናም በደረስኩበት ሁሉ በየትኛውም ክፍለ-ዓለም ፍራንስ ቤከንባወር ታዋቂ ነው ። በተፈጥሮ ከታደለው የዲፕሎማሲ ችሎታ የሀገራችን ተወዳጁ መልእክተኛ ሆኗል ። ቤከንባወር ለሀገራችን በቀና መንገድ ያበረከተውን፤ በዓለም ዙሪያ ተቀባይነት እንዲኖረን ያደረገውን ማንም ቢሆን በትክክል መገመት አይችልም ። ለሀገራችን የሚገባውን አበርክቷል ። »
ሙይንሽን ከተማ ውስጥ በሚገኘው ግዙፉ ስታዲየም ቁጥራቸው 30.000 የሚደርስ የፍራንስ ቤከንባወር አድናቂዎች መታደማቸውም ታውቋል ። በዝክር ሥነ ስርዓቱ ላይ የባዬር ሙይንሽን እግር ኳስ ቡድን ፕሬዚደንት ሔርበርት ሐይነር ፍራንስ ምን ያህል ተወዳጅ እንደነበር ተናግረዋል ።
«ፍራንስ ለሁሉም ከልቡ ወዳጅ ነበር ። ያ ሁኔታም ከእግር ኳሱ ጎን ለጎን ለየት ያለ ሰብእና አላብሶታል ። ዛሬ እዚህ በርካታ ሰዎች በመሰባሰባቸው ደስ ሊለው እንደሚችል እርግጠኛ ነኝ ። ትንሽም ቢሆን ሳይደንቀው የሚቀርም አይመስለኝም ። ‘ምን?‘ ብሎ ሊጠይቅም ይችል ይሆናል ። ‘ብቻ ሁላችሁም እዚህ በእኔ ምክንያት እንዳይሆን የተሰባሰባችሁት? ግን እኮ ያ አስፈላጊ አልነበረም‘ ሊልም ይችላል ። ስለራሱ ብዙ ማለት የሚመቸው አይነት አይደለም ።»
የፍራንስ ቤከንባወር ወዳጅ እና ለረዥም ጊዜ አብሮ የተጫወተው የባዬር ሙይንሽን የክብር ፕሬዚደንት ዑሊ ሆኔስ ስለታታሪነቱ መስክሯል ።
«ምንም ነገር ይሥራ ምን ሁሌም የሚላት ነገር አለች፦ ‘አይሆንም የማይሆን ነገርማ አላደርግም‘ይል ነበር ። የባዬርን ሙይንሽን ምክትል ፕሬዚዳንት ሳለ ይሁን ፕሬዚደንት፤ የብሔራዊ ቡድኑ ይሁን የባዬርን ሙይንሽን አሰልጣኝ የነበረ ጊዜ ሁሌም የሚላት ነገር ነበረች፦ ‘በፍጹም፤ ይህንእማ አላደርግም ። ‘ግን ደግሞ ካደረገ፤ በርካታ ልዩ ችሎታዎች እንደነበረው ሰው በሚደንቅ ሁኔታ ጥንቅቅ ባለ መልኩ፤ በትጋት ነበር የሚከውነው። »
በዝክር ሥነ ስርዓቱ ላይ ከታደሙ ታዋቂ ፖለቲከኞች መካከል የጀርመን መራኄ-መንግሥት ዖላፍ ሾልትስ፤ የነጻ ባዬርን ግዛት ጠቅላይ ሚንሥትር ማርኩስ ዞይደር ይገኙበታል ። የጀርመን ብሔራዊ የእግር ኳስ ቡድን አሰልጣኝ ዩሊያን ናገልስማን፤ ጀርመንን እንደ ጎርጎሪዮስ አቆጣጠር በ2014 ለዓለም ዋንጫ ያበቁት አሰልጣኝ ዮአሒም ሎይቭ፤ የጀርመን እግር ኳስ ፌዴሬሽን እግር ኳስ ኃላፊ ሩዲ ፎይለርም ታድመዋል ። የአውሮጳ እግር ኳስ ማኅበራት ኅብረት (UEFA) ፕሬዚደንት አሌክሳንደር ሴፌሪንም በዝክሩ ላይ ለመታደም ሙይንሽን ድረስ ተጉዘዋል ።
የጥር 6 ቀን፣ 2016 ዓ.ም የስፖርት ዘገባ እሁድ ዕለት ከቬርደር ብሬመን ጋ ለነበረው የቡንደስሊጋ ግጥሚያ ልምምድ ሲያደርጉ የነበሩት የባዬርን ሙይንሽን ግብ ጠባቂ ማኑዌል ኖዬር እንዲሁም አጥቂዎቹ ሔሪ ኬን እና ቶማስ ሙይለርም በስነስርዓቱ ላይ ተገኝተዋል ።
ቡንደስሊጋ
በቡንደስሊጋው ግጥሚያ ባዬር ሙይንሽን ትናንት በሜዳው አሊያንስ አሬና ከቬርደር ብሬመን ጋ በነበረው ግጥሚያም ለፍራንስ ቤከንባወር የመታሰቢያ አበባ ጉንጉን በስታዲየሙ መግቢያ ላይ በረዥም ምንጣፍ አኑሯል ። መሀል ሜዳ ላይም የፍራንስ ቤከንባወርን 5 ቁጥር መለያ ለብሶ የተነሳውን ቆየት ያለ ፎቶግራፍ በማድረግ ዙሪያውን በርካታ የአበባ ጉንጉኖች አኑሯል ።
በቡንደስሊጋው የእግር ኳስ ግጥሚያ ግን ባዬርን ሙይንሽን በሜዳው በቬርደር ብሬመን የ1 ለ0 ሽንፈት ደርሶበታል ። ቦሩስያ ሞይንሽንግላድባኅም በሜዳው አውግስቡርግን አስተናግዶ 2 ለ1 እጅ ሰጥቷል ። ቅዳሜ ዕለት በነበሩ ግጥሚያዎች፦ ላይፕትሲሽ በሜዳው ተጫውቶ በባዬርን ሌቨርኩሰን የ3 ለ2 ሽንፈት ደርሶበታል ። በዚህ ድሉም ባዬርን ሌቨርኩሰን በቡንደስሊጋው ነጥቡን 48 አድርሶ በመሪነቱ ገስግሷል ። ባዬርን ሙይንሽን አንድ ተስተካካይ ጨዋታ እየቀረው በ41 ነጥብ ይከተላል ። ቅዳሜ ዕለት ወደ ቦሁም አቅንቶ 1 ለ0 የተሸነፈው ሽቱትጋርት 34 ነጥብ ይዞ 3ኛ ደረጃ ላይ ይገኛል ። ላይፕትሲሽ እና ቦሩስያ ዶርትሙንድም ተመሳሳይይ 33 ነጥብ ሰብስበው በግብ ክፍያ ልዩነት 4ኛ እና 5ኛ ደረጃ ላይ ሰፍረዋል ። ኮሎኝ ከትናንት በስትያ በቦሩስያ ዶርትሙንድ የ4 ለ0 ብርቱ ሽንፈት ገጠሞታል ። ኮሎኝ ተመሳሳይ 11 ነጥብ ባላቸው ማይንትስ እና ዳርምሽታድታ መሀል 17ኛ ደረጃ ላይ ሆኖ በወራጅ ቃጣናው ይቃትታል ።
ፕሬሚየር ሊግ
በእንግሊዝ ፕሬሚየር ሊግ ትናንት በርመስን በገዛ ሜዳው 4 ለ0 ያንኮታኮተው ሊቨርፑል 48 ነጥብ ይዞ በመሪነት ግስጋሴው ቀጥሏል ። አንድ ተስተካካይ ጨዋታ የሚቀረው ማንቸስተር ሲቲ እንዲሁም ቅዳሜ ዕለት ክሪስታል ፓላስን 5 ለ0 ድባቅ የመታው አርሰናል እና አስቶን ቪላ በግብ ክፍያ ተለያይተው በ43 ነጥብ ይከተላሉ ።
የታኅሣሥ 29 ቀን፣ 2016 ዓ.ም የስፖርት ዘገባ ዐርብ እለት አንድ እኩል የተለያዩት ሉቶን ታወን እና በርንሌይ እንዲሁም ትናንት ከዌስትሀም ጋ ሁለት እኩል በመውጣት ነጥብ የተጋራው ሼፊልድ ዩናይትድ ከ18ኛ እስከ 20ኛ ወራጅ ቀጣና ውስጥ ይገኛሉ ። ዛሬ ማታ ብራይተን ዎልቭስን ያስተናግዳል ።
ዕድሜያቸው ከ20 ዓመት በታች ሴቶች የኢትዮጵያ ብሔራዊ የእግር ኳስ ቡድን ለዓለም ዋንጫ ለጥቂት ሳያልፍ ቀርቷል ። በዓለም ዋንጫ ማጣርያ የመጨረሺያ ዙር የመልሱን ጨዋታ ትናንት (እሁድ ጥር 12 ቀን፣ 2016 ዓ.ም) በአበበ ቢቂላ ስታዲየም አከናውኖ ሞሮኮን 1 ለ0 ቢያሸንፍም፤ በደርሶ መልስ የ2 ለ1 የሞሮኮ ድል ግን ለዓለም ዋንጫ ጫፍ ደርሶ ሳያልፍ ቀርቷል ።
አትሌቲክስ
የታኅሣሥ 15 ቀን፣ 2016 ዓ.ም የስፖርት ዘገባ በስፔን ሳንታ ፖሎ በተከናወነ የግማሽ ማራቶን የሩጫ ፉክክር ኢትዮጵያዊያኑ በሁለቱም ፆታዎች አሸናፊ በመሆን ሜዳሊያ አግኝተዋል። ። በወንዶች አንድአምላክ በልሁ (59:59) አንደኛ በውጣት የወርቅ ሜዳሊያ ሲያጠልቅ፤ ብረሃኑ ወንድሙ (1:01:12) የሁለተኛ ደረጃ ይዞ የብር ሜዳሊያ ተሸልሟል ። በሴቶች ተመሳሳይ ፉክክር፦ ዘውዲቱ አደራው አንደኛ (1:07:59) በመውጣት የወርቅ ሜዳሊያ ስታጠልቅ፤ ትዕግስት አያሌው (1:09:17) በሦስተኛ ደረጃ የነሐስ ሜዳሊያ ተሸልማለች ። በሙምባይ ታታ ማራቶንም ኢትዮጵያውያን አትሌቶች በሁለቱም ፆታዎች አሸንፊ መሆናቸውን የኢትዮጵያ አትሌቲክስ ፌፌሬሽን ዘግቧል ። በወንዶች ውድድር ለሚ ብርሃኑ (2:07:50)፣ ሐይማኖት አለው (2:09:03)እና ምትኩ ጣፋ (2:09:58) ከ1ኛ እስከ 3ኝ በውጣት አሸናፊ ሆነዋል ። በሴቶች ፉክክር ከ1ኛ እስከ 8ኛ ድረስ ኢትዮጵያውያቱ ተከታትለው በመግባት አሸንፈዋል ። በዚህ ውድድር አበራሽ ምንሰው (2:26:06) 1ኛ ወጥታለች ። ሙሉ ሐብት ጽጌ (2:26:51) 2ኛ፤ መድኂን ደጀኔ(2:27:34) 3ኛ ደረጃ አግኝተዋል ።
ማንተጋፍቶት ስለሺ
ነጋሽ መሐመድ