እንደተለመደው  ኢትዮጵያውያን አትሌቶች በዓለም የውድድር መድረኮች ድል ቀንቷቸዋል።  ጃፓን ውስጥ ከአንድ ወር በኋላ ለሚደረገው የቶኪዮ ማራቶን የሩጫ ፉክክር ተሳታፊዎች በተመለከተ ቃላ መጠይቅ አድርገናል ። በእንግሊዝ ፕሬሚየር ሊግ ፉክክር አርሰናል ወሳኝ የሆነ ድሉን በአንዲት ብቸኛ ግብ አግኝቷል ። ሊቨርፑል በመሪነቱ እንደገሰገሰ ነው ። በሜዳ ቴኒስ ፍጻሜ ጀርመናዊው ተፎካካሪ በጣሊያናዊው ድል ተነስቷል ።

አትሌቲክስ

የቶኪዮ ማራቶን ውድድር ሊካሄድ አንድ ወር ግድም በቀረበት በአሁኑ ወቅት እዛው ጃፓን ውስጥ በተከናወነ የኦሳካ ማራቶን ውድድር ኢትዮጵያዊቷ አትሌት ወርቅነሽ ኢዴሳ አሸናፊ ሁናለች። አትሌት ወርቅነሽ ትናንት አንደኛ በመውጣት ያሸነፈችው 2:21.00 በመሮጥ ነው ። ጃፓናውያቱ ካና ኮባያሽ እና ዩካ ሱዙኪ የሁለተኛ እና ሦስተኛ ደረጃ አግኝተዋል ። በውድድሩ ሦስት ኬኒያዊት፣ አንዲት የባህሬንና ሌላ የእሥራኤል አትሌት እንዲሁም፤ አራት የሌላ አገራት ተፎካካሪዎች ሲታደሙ የቀሩት በአጠቃላይ ጃፓናውያን አትሌቶች ናቸው ።

በሌላ የግማሽ ማራቶን ፉክክር፦ በስፔን ሚጃ ቴራሳ ኢትዮጵያውያን አትሌቶች በሁለቱም ፆታዎች አሸናፊ ሁነዋል ። በሴቶች ፉክክር፦ ኢትዮጵያውያቱ አትሌቶች ኪሮስ ሙዓዝ እና ገነት ሣኅሌ አንደኛ እና ሁለተኛ በመውጣት የወርቅ እና የብር ሜዳሊያ አስገኝተዋል ።  ኪሮስ ውድድሯን ለማጠናቀቅ (1:14:06) ሲፈጅባት፤ ገነት ከ42 ሰከንዶች በኋላ ተከትላት አጠናቃለች ። ስፔናዊቷ ባርባራ ራሞን ሳላማንያ የሦስተኛ ደረጃ አግኝታለች ። የጥር 12 ቀን፣ 2017 ዓ.ም የስፖርት ዘገባ

በወንዶች ፉክክር የአትሌት ሰለሞን ባረጋ ወንድም ሚኪያስ ባረጋ የቦታውን ክብረወሰን በመስበር (1:02:18) አሸንፎ ወርቁን አጥልቋል ።  ኬንያውያኑ ጊልበርት ኪቤት (1:02:40) እና ቲሞቲ ኪፕቹምባ (1:03:185)ሁለተኛ እና ሦስተኛ ደረጃ ይዘው አጠናቀዋል ። 

ከ33 ቀናት በኋላ ጃፓን ውስጥ ለሚካሄደው የቶኪዮ ማራቶን ተሳታፊ አትሌቶች ዝርዝር ከሰሞኑ ይፋ ሁኗል ። ከኢትዮጵያ በወንድም በሴትም 15 አትሌቶች ተሳታፊ እንደሚሆኑ ታውቋል ። በኢትዮ ኤፍ ኤም 107.8 የኢትዮ ስፖርት ዋና አዘጋጅ እና አቅራቢ ምሥጋናው ታደሰ ስለ አትሌቶቹ ማንነትና ወቅታዊ ብቃት በማብራራት ይጀምራል ።

ፕሬሚየር ሊግ

የማንቸስተር ዩናይትድ ግብ ጠባቂ አንድሬ ዖናና ፉልሀምን 1 ለ0 ማሸነፋቸው ለቡድኑ በጨዋታ ዘመኑ ከፍተኛ መነቃቃትን የሚፈጥር አጋጣሚ ነው ብሏል ። ሊሳንድሮ ማርቲኔዝ በ78ኛ ደቂቃ ላይ ትናንት ባስቆጠራት ብቸኛ ግብ ማንቸስተር ዩናይትድን ወደ 12ኛ ደረጃ ከፍ አድርጓታል ። ባለፈው ግጥሚያ በገዛ ሜዳው ኦልድ ትራፎርድ በብራይተን የ3 ለ1 ሽንፈት ላስተናገደው ማንቸስተር ዩናይትድ በእርግጥም የትናንቱ በተቃራኒ ሜዳ ያገኘው ድል ወሳኝ ነበር ። አስቶን ቪላ ከዌስት ሐም ጋር አንድ እኩል ሲለያይ፤ ብሬንትፎርድ እና ላይስተርሲቲ ተጋጣሚዎቻቸው ክሪስታል ፓላስን እና ቶትንሀም ሆትስፐርን በገዛ ሜዳቸው 2 ለ1 ድል አድርገዋል ።

ቅዳሜ ከነበሩ ሌሎች ግጥሚያዎች፦ በተለይ የዋንጫ ተፎካካሪው እና በደረጃ ሰንጠረዡ 3ኛ ላይ የሚገኘው ኖቲንግሀም ፎረስት በቦርመስ የደረሰበት የ5 ለ0 ብርቱ ቅጣት በርካቶችን አስደምሟል ። ኒውካስልን 4 ለ1 ድል አድርጎ የነበረው ቦርመስ ከትናንት በስትያም መሰል ድሉን ኖቲንግሀም ፎረስት ላይ ደግሞታል ። በቅዳሜው ድል የምዕራብ አፍሪቃዊቷ ቡርኪናፋሶ ምርጥ አጥቂ ዳንጎ ዋታራ ለቦርመስ ሦስት ኳሶችን ከመረብ በማሳረፍ ሔትትሪክ ሠርቷል ። ቅዳሜ ዕለት ኤቨርተን ብራይተንን 1 ለ0 አሸንፏል ።

በሌሎች ግጥሚያዎች፦ አርሰናል ወሳኝ በሆነ አንድ ብቸኛ ግብ በፕሬሚየር ሊጉ የዋንጫ ተፎካካሪነት እድሉን እጅግ አስፍቷል ። ሁለት ቀይ ካርዶች ለሁለቱም ቡድኖች ተጨዋቾች በተሰጠበት የቅዳሜው ግጥሚያ አርሰናል ዎልቭስን በገዛ ሜዳው 1 ለ0 አሸንፏል ። የማሸነፊያዋne ግብ 74ኛ ደቂቃ ላይ ያስቆጠረው ሪካርዶ ካላፎሪ ነው ። አርሰናል 47 ነጥብ ሰብስቦ ሁለተኛ ደረጃ ላይ ይገኛል ። አንድ ተስተካካይ ጨዋታ ከሚቀረው መሪው ሊቨርፑልም በስድስት ነጥብ ይበለጣል ። የጥር 5 ቀን፣ 2017 ዓ.ም የስፖርት ዘገባ

ቅዳሜ ዕለት በሜዳው ኢትሀድ ስታዲየም እና ደጋፊው ፊት ቸልሲን 3 ለ1 ድል ያደረገው ማንቸስተር ሲቲ በ41 ነጥብ አራተኛ ደረጃውን እንዳስጠበቀ ነው ። ለማንቸስተር ሲቲ ሶስኮ ግቫርዲዮል፤ ፊል ፎደን እና ኧርሊንግ ኦላንድ አንድ አንድ ግቦችን ከመረብ አሳርፈዋል ። ኧርሊንግ ኦላንድ ቅዳሜ ዕለት 68ኛ ደቂቃ ላይ ከመረብ ባሳረፋት ግብ አሌክሳንደር ይሳቅን በአንድ የግብ ልዩነት መብለጥ ችሏል ። የኒውካስሉ አጥቂ አሌክሳንደር ቡድኑ ሳውዝሐምፕተንን በሜዳው 3 ለ1 ድል ሲያደርግ ሁለት ግቦችን በማስቆጠር አጠቃላይ ግቦቹን 17 አድርሷል ። የሊቨርፑል አጥቂ ሙሐመድ ሣላኅ 19 በኮከብ ግብ አግቢነት ይመራል ።

ሊቨርፑል ወራጅ ቀጣናው ግርጌ በ16 ነጥብ የሚዳክረው ኢፕስዊች ታወንን 4 ለ1 ድል ባደረገበት የቅዳሜው ግጥሚያ ሁለተኛዋን ግብ 35ኛው ደቂቃ ላይ ከመረብ ያሳረፈው ሞሐመድ ሣላኅ ነው ። ቀሪዎቹ ግቦች የዶሚኒክ ሶቦዝላይ እና ኮዲ ጋክፖ ናቸው ። 90ኛው ደቂቃ ላይ የኢፕስዊች ታወን ደጋፊዎችን ያስፈነጠዘችውን የማስተዛዘኛ ግብ ጄኮብ ግሬቪስ አስቆጥሯል ።

ቡንደስሊጋ

የሞሐመድ ሳላኅ የአገር ልጅ ግብጻዊው ዖማር ማርሙሽ ከጀርመን ቡንደስሊጋ ኮከብነት ወደ እንግሊዝ ፕሬሚየር ሊግ መሸጋገሩ የሰሞኑ መነጋገሪኢ ሁኗል ። ዖማር ማርሙሽ ቁልፍ ተጨዋች ከነበረበት የጀርመኑ ፍራንክፉርት ቡድን የዋንጫ ተፎካካሪ ለመሆን ዘንድሮ ብርቱ ፈተና ወደ ገጠመው ማንቸስተር ሲቲ ያቀናው በ79 ሚሊዮን ዶላር የዝውውር ክፍያ ነው ። በቡንደስሊጋው የነበረውን ኳስ ተቆጣጥሮ ተከላካዮችን የማርበትበት ብቃት በእንግሊዝ ፕሬሚየር ሊግ ለማንቸስተር ሲቲም ይደግማል ተብሏል ። የታኅሣሥ 28 ቀን፣ 2017 ዓ.ም የስፖርት ዘገባ

በጀርመን ቡንደስሊጋ፦ በ48 ነጥብ የሚመራው ባዬርን ሙይንሽን ፍራይቡርግን 2 ለ1 አሸንፏል ። በ42 ነጥብ ተከታዩ ተከታዩ ባዬርን ሌቨርኩሰን ከላይፕትሲሽ ጋር ሁለት እኩል ተለያይቷል ። በሆፈንሀይም ሜዳ ትናንት ሁለት እኩል በመውጣት ነጥብ የተጋራው አይንትራኅት ፍራንክፉርት በ37 ነጥብ ሦስተኛ ደረጃ ላይ እንደሰፈረ ነው ።

ከቬርደር ብሬመን ጋር ቅዳሜ ዕለት ሁለት እኩል የወጣው ቦሩስያ ዶርትሙንድ 11ኛ ደረጃ ላይ ይዳክራል ። ማይንትስ ሽቱትጋርትን 2 ለ0 እንዲሁም አውግስቡርግ ሐይደንሀይምን 2 ለ1 ማሸነፍ ችለዋል ። ቮልፍስቡርግ እና ሆልሽታይን ኪየል ሁለት እኩል ተለያይተዋል ። ሐይደንሀይም እና ሆልሽታይን ኪየል በ14 እና 12 ነጥብ 16ኛ እና 17ኛ ወራጅ ቀጣና ውስጥ ይገኛሉ ። ከስራቸው 10 ነጥብ ብቻ ያለው ቦሁም የመጨረሻ ደረጃው ላይ ሰፍሯል ።

የሜዳ ቴኒስ

በአውስትራሊያ የሜዳ ቴኒስ ፉክክር ፍጻሜ  የጀርመን ተፎካካሪ አሌክሳንደር  ዜቬሬቭ ትናንት በጣሊያናዊው ጃኒክ ዚነር የ6 ለ3 ሽንፈት ደርሶበታል ። ሽንፈቱ በአጠቃላይ የሜዳ ቴኒስ ፉክክር ድል በመንሳት ዋንጫ ለማንሳት ጫፍ ደርሶ ለነበረው አሌክሳንደር እጅግ አስቆጭ ነው ። 

ማንተጋፍቶት ስለሺ

ፀሐይ ጫኔ