ኢትዮጵያውያን በወንድም በሴትም በድል ስለታጀቡባቸው የማራቶን ሩጫዎች እንቃኛለን ። ነገ ስለሚጀምረው የካፍ የአዲስ አበባ ስብሰባ በተመለተከም ቃለመጠይቅ ይኖረናል ። ከተጨማሪ የስፖርት መረጃዎች ጋር ለዝግጅቱ ማንተጋፍቶት ስለሺ ።  

በቶሮንቶ እና በአምስተርዳም የማራቶን ሩጫ ፉክክሮች  ኢትዮጵያውያን  አትሌቶች በሁለቱም ጾታዎች ድል ቀንቷቸዋል ። አዲስ አበባ ውስጥ ነገ ስለሚጀምረው የአፍሪቃ እግር ኳስ ኮንፌዴሬሽን (CAF) 46ኛ መደበኛ ጠቅላላ ጉባኤን በተመለከተ ቃለ መጠይቅ አሰናድተናል ። በሳምንቱ መጨረሻ ላይ ስለ ተከናወኑ የእግር ኳስ ውጤቶች ዳሰሳ አድርገናል ። የመኪና ሽቅድምድ እና ሌሎች ዘገባዎችንም አካተናል ።

አትሌቲክስ

ኢትዮጵያውያን አትሌቶች በቶሮንቶ ማራቶን በወንድም በሴትም አሸነፉ ። ትናንት ካናዳ ውስጥ በተካሄደው የቶሮንቶ  ማራቶን ኢትዮጵያውያት አትሌቶች  አምስተኛ ብቻ ጣልቃ አስገብተው ከአንደኛ እስከ ስድስተኛ ተከታትለው አሸንፈዋል ።

ኢትዮጵያዊቷ አትሌት ዋጋዬነሽ መካሻ ከምን ጊዜውም በላይ ብርቱ ተፎካካሪ በመሆን የቦታውን ክብረወሰን አሻሽላ ለድል በቅታለች ። አትሌት ዋጋዬነሽ ርቀቱን 2:20:44 በመሮጥ ነው በአንደኛነት ያጠናቀቀችው ። ዋጋዬነሽን ተከትለውት በሁለተኛነት እና ሦስተኛነት ያጠናቀቁትም የሀገሯ ልጆች አትሌት ሮዛ ደረጀ እና አትሌት አፈራ ጎደፋይ ናቸው ። ሦስቱም ኢትዮጵያዊያት አትሌቶች ባለፈው ዓመት በቦታው ተይዞ የነበረውን የ2:22:16 ክብረወሰን ማሻሻል ችለዋል ። አራተኛ መሠረት ገብሬ እንዲሁም አምስተኛ ረድኤት ዳንኤል በመግባት ሩጫውን የኢትዮጵያውያት ብቻ አስመስለውት ነበር ። በመሃላቸው አምስተኛ ጣልቃ የገባችው ካናዳዊቷ ናታሻ ዎድካ ናት ። ኬንያዊቷ ሯጭ ሊድያ ሲሚዩ የስምንተኛ ደረጃ አግኝታለች ።

ኢትዮጵያውያን እና ኬንያውያን ብርታታቸውን ባሳዩበት በወንዶች ተመሳሳይ ርቀትም ኢትዮጵያዊው ሯጭ ሙሉጌታ አሠፋ 2:07:16 በመሮጥ አሸናፊ ሁኗል ። ኬንያውያን ሯጮች ዶሜኒክ ንጌኖ እና ኖሐ ኪምኬምቦይ የሁለተኛ እና ሦስተኛ ደረጃ አግኝተዋል ።  ኢትዮጵያዊው አትሌት ኃይሉ ዘውዱ አራተኛ ኬንያዊው ብሪያን ኪፕሳንግ አምስተኛ፤ ሌላኛው ኢትዮጵያዊ አትሌት ጊዜአለው አያና ስድስተኛ ደረጃ በማግኘት ተከታትለው ገብተዋል ።

በሌላ የአትሌቲክስ ዜና፦ ኔዘርላንድ ውስጥ ትናንት (ጥቅምት 10 ቀን፣ 2017 ዓ.ም) በተከናወነው የአምስተርዳም  ማራቶን ኢትዮጵያውያን አትሌቶች በሁለቱም ፆታ ድል አድርገዋል ። በሴቶች ፉክክር፦ አትሌት የዓለምዘርፍ የኋላው 2:16.52 በመሮጥ የቦታውን ክብረወሰን አሻሽላ በአንደኝነት አጠናቅቃለች ። በተመሳሳይ የወንዶች ፉክክር ደግሞ፦ አትሌት ጸጋዬ ጌታቸው በ2:05.38 ቀዳሚ ሆኖ በማጠናቀቅ ለድል መብቃቱን የኢትዮጵያ አትሌቲክስ ፌዴሬሽን ዘግቧል ።

የአፍሪቃ እግርኳስ ኮንፌዴሬሽን (CAF) 46ኛ መደበኛ ጠቅላላ ጉባዔ በነገው ዕለት አዲስ አበባ ውስጥ ይካሄዳል ። የስፖርት ጋዜጠኛ ዖምና ከጉባኤው ዋነኛ አጀንዳዎች መካከል ዋነኞቹ የፕሬዚደንቶች የዕድሜ ጉዳይ ከፍ እንዲል የሚለው ይገኝበታል ብሏል ። ዝርዝሩን ያብራራል ። 

ፕሬሚየር ሊግ

በእንግሊዝ ፕሬሚየር ሊግ ሊቨርፑል እስካሁን ከነበሩ 8 ግጥሚያዎች ሰባቱን በማሸነፍ ዘንድሮ ዋንጫ የማንሳት ግስጋሴውን ቀጥሏል ። ከዋነኞቹ ተፎካካሪዎቹ መካከል  በ30ኛው ደቂቃ ላይ ዊሊያም ሳሊባን በቀይ ካርድ ያጣው አርሰናል ቅዳሜ ዕለት በቦርመስ 2 ለ0 ተሸንፏል ። በ17 ነጥቡም ተወስኗል ። ቦርመስ እስካሁን ካደረጋቸው ግጥሚያዎች አርሰናልን ያሸነፈበት ሦስተኛ ድሉ ነው ። ማንቸስተር ሲቲ ትናንት ዎልቭስን በገዛ ሜዳው 2 ለ1 ድል አድርጎት ነጥቡን ወደ 20 በማድረስ ሊቨርፑልን እግር በእግር እየተከተ ለው ። ማን ሲቲ ትናንት በጨዋታው መገባደጃ፤ ማለትም መደበኛው 90 ደቂቃ ተጠናቆ በጭማሪው 5ኛ ደቂቃ ላይ ነው በጆን ስቶን ግብ ነበር ማሸነፍ የቻለው ። የማታ ማታ ከጉድ የወጣው ማንቸስተር ሲቲም እንደ አርሰናል ከሊቨርፑል ጋር ያለው የነጥብ ልዩነት ይሰፋ ነበር ።

ብርቱ ፉክክር በታየበት የትናንቱ ግጥሚያ ሊቨርፑል አንፊልድ ውስጥ ቸልሲን 2 ለ1 ሸኝቶ ነጥቡን 21 አድርሷል ። ማንቸስተር ሲቲን በ1 ነጥብ ይበልጣል ። ቸልሲ የትናንቱን ጨዋታ ቢያሸንፍ ኖሮ ከአርሰናልም ጋር ይስተካከል ምናልባትም በግብ ክፍያ ይበልጥ ነበር ። ለዚያም ይመስላል እስከ ጨዋታው ፍጻሜ ድረስ ብርቱ ፉክክር ያሳየው ። የሊቨርፑል የትናንትና ድል ከእነ ማንቸስተር ሲቲ እና አርሰናል ውጤት አንጻር የፕሬሚየር ሊጉ ላይ ከፍተኛ ተጽእኖ እንደሚኖረው የስፖርት ተንታኞች ገልጠዋል ። የጥቅምት 04 ቀን፣ 2017 ዓ.ም የስፖርት ዘገባ

በሌሎች ግጥሚያዎች፦ ላይስተር ሲቲ ሳውዝሐምፕተንን 3ለ2፤ ኤቨርተን ኢፕስዊች ታውንን 2 ለ0 አሸንፈዋል ።  ከሁለቱም በኩል ቀይ ካርዶች በታዩበት የቅዳሜ ግጥሚያ አስቶን ቪላ ፉልሀምን 3 ለ ለ1 ድል አድርጓል ። ቶትንሀም ዌስትሀምን 4 ለ1 ሸንቷል ።  በእለቱ ኒውካስትል በብራይተን የ1 ለ0 ሽንፈት አስተናግዷል ። ማንቸስተር ዩናይትድ ብሬንትፎርድን 2 ለ1 ማሸነፍ ችሏል ።

ቡንደስሊጋ

በጀርመን ቡንደስሊጋ ትናንት ሆፈንሀይም ቦሁምን እንዲሁም ፍራይቡርግ አውግስቡርግን በተመሳሳይ 3 ለ1 አሸንፈዋል ። አይንትራኅት ፍራንክፉርት በባዬርን ሌቨርኩሰን የ2 ለ1 ሽንፈት ገጥሞታል ። ቬርደር ብሬመን ቮልፍስቡርግን 4 ለ2 ሸኝቷል ። ዑኒዮን ቤርሊን ሆልሽታይን ኪይልን 2 ለ 0 አሸንፏል ።  ባዬርን ሙይንሽን ሽቱትጋርትን 4 ለ0 አደባይቷል ።  ሦስቱ ግቦች የሔሪ ኬን ናቸው ። ቡንደስሊጋውንም እንደ ላይፕትሲሽ በ17ነጥብ ግን በግብ ክፍያ ልዩነት ይመራል ። ላይፕትሲሽ ቅዳሜ ዕለት ማይንትስን 2 ለ0 ድል አድርጓል ።

ጀርመናዊው አሰልጣኝ ቶማስ ቱኸል ከጥር ወር ጀምሮ የእንግሊዝ ብሔራዊ የእግር ኳስ ቡድን አሰልጣኝ እንደሚሆኑ ታወቀ ። ቀደም ሲል የጀርመኑ ባየርን ሙይንሽን፤ የእንግሊዙ ቸልሲ እንዲሁም የፈረንሳዩ ፓሪ ሳንጃርሞ አሰልጣኝ ሆነው አገልግለዋል ።  በባዬርን ሙይንሽን ቡድን ያሰለጥኑት የነበረው እንግሊዛዊ አጥቂ ሔሪ ኬን የቀድሞ አሰልጣኙን አወድሶ ጊዜው እስኪደርስ በብሔራዊ ቡድኑም በእሳቸው ለመሰልጠን እንደጓጓ ገልጧል ። ሔሪ ኬን ይህን ያለው ቅዳሜ ዕለት ሦስት ግብ አስቆጥሮ ሔትሪክ በመሥራት ባዬርን ሙይንሽን በቡንደስ ሊጋው ሽቱትጋርትን 4 ለ0 እንዲያሸንፍ ካስቻለ በኋላ በሰጠው ቃለ መጠይቅ ነው ።

የመስከረም 27 ቀን፣ 2017 ዓ.ም የስፖርት ዘገባ ቶማስ ቱኹል ከባዬር ሙይንሽን ጋር የገቡት ውል እስከሚቀጥለው የጎርጎሪዮሱ አቆጣጠር ድረስ ነበር ። ሆኖም ውሉ ሳይጠናቀቅ የተቋረጠው ከዐሥርተ ዓመት ወዲህ ባዬርን ሙይንሽን ባለፈው የጨዋታ ዘመን ዋንጫ ማንሳት ስለተሳነው ነበር ። ጀርመናዊው ቶማስ ቱኸል በ2026 የዓለም ዋንጫ ለ60 ዓመታት ዋንጫ ማንሳት የተሳነውን የእንግሊዝ ቡድን ለድል እንዲኢበቁ ኃላፊነት ተሰጥቷቸዋል ። ሦስቱ አናብስት የዓለም ዋንጫን ማሸነፍ የቻሉት እንደ ጎርጎሪዮስ አቆጣጠር በ1966 ብቻ ነው ። የ51 ዓመቱ አሰልጣኝ የእንግሊዝ ብሔራዊ የእግር ኳስ ቡድን አሰልጣኝ እንደሚሆኑ ለስካይ ስፖርት ይፋ ያደረጉት ረቡዕ ዕለት ነው ።   የቀድሞው የእንግሊዝ አሰልጣኝ ጋሬት ሳውዝጌትን የሚተኩት ቶማስ ቱኹል ከስቬን-ጎራን ኤሪክሰን እና ፋቢዮ ካፔሎ ቀጥሎ ሦስተኛው የውጭ ሃገር አሰልጣኝ ይሆናሉ ። ጀርመናዊ አሰልጣኝ የእንግሊዝ ቡድንን ሲመራም ቶማስ ቱኹል የመጀመሪያው ናቸው ።

ማንተጋፍቶት ስለሺ

ዖምና ታደለ