አቶ ቤኛ ዳባ የተባሉ የአዳማ ከተማ ነዋሪ ለዶቼ ቬለ እንደገለፁት ትናንት አመሻሹ ላይ የተከሰተዉ ግጭት ካለፈዉ መስከረም ወር ጀምሮ ከሶማሌ ክልል ተፈናቅለዉ በአዳማ መጠለያ ጣቢያ በሰፈሩ ሰዎችና በአካባቢዉ ነዋሪዎች  መካከል ነዉ።ግጭቱ ሲከሰት ይህ ለሶስተኛ ጊዜ ነዉ የሚሉት ነዋሪዉ፤ በግጭቱ የተፈናቃዮቹ መጠለያ ቤቶች መቃጠላቸዉንና ሰዎች መጎዳታቸዉን ገልፀዋል።የግጭቱን መነሻ እንዲህ ነዉ የገለፁት «በትናንትናዉ ግጭት መጀመሪያ እዚህ አካባቢ የድንጋይ ማዉጣት የሚባል ነገር ነበር።እዚህ አካባቢ ያለ።በመጀመሪያም በዚህ ጉዳይ ላይ ችግር ተከስቶ መንግስት እዛ አካባቢ ያለዉ ድንጋይ እንዳይወጣ አግዶ ነበር።አሁን ደግሞ ያ ድንጋይ የማዉጣት ስራ ተፈቀደ።ሰዎች ሄደዉ የማዉጣት ነገር ነበር።ግጭቱ በዚህ ምክንያት ተከሰተ»ነዉ ያሉት።
በአዳማ ሆስፒታል ሜዲካል ኮሌጅ የ3ተኛ አመት የቀዶ ጥገና ፕሬዝዳንት የሆኑት ዶክተር ዲዳ ባቱ  በግጭቱ በርካታ ሰዎች ተጎድተዉ ለህክምና ወደ ሆስፒታሉ መምጣታቸዉን ገልፀዋል። ለህክምና ከመጡ ሰዎች መካከልም የአንድ ሰዉ ህይወት መጥፋቱን አመልክተዋል።«ትንንት ተጎድተዉ የመጡ ሰዎች ነበሩ።በአጠቃላይ 36 ሰዎች ተጎድተዉ መጥተዋል።ከዚያም 26 ወንዶችና 9ኑ ሴቶች ነበሩ።አንደኛዉ ሞቶ ነዉ የደረሰዉና  አንድ ሞት ነበረ።ሌሎች  መጠነኛ ጉዳት የደረሰባቸዉ ነበሩ ።ታክመዉ በብዛት ወደ ቤት ሄደዋል።የተወሰኑት ሆስፒታል ቀርተዉ እየታከሙ ነዉ ያሉት።»ብለዋል
ወደ ሆስፒታሉ የመጡት ተጎጅዎች ሁሉም ከሶማሌ ክልል ተፈናቅለዉ የመጡና  አብዛኛዎቹም ጭንቅላታቸዉ ላይ በድንጋይ የመፈንከት አደጋ ያጋጠማቸዉ መሆናቸዉን  ዶክተሩ አብራርዋል።
እንደ አዳማ ከተማ ነዋሪዉ ገለጻ ከአንድ ወር በፊት የሰዉ ህይወት ባይጠፋም በቦታዉ ተመሳሳይ ግጭት ተከስቶ ነበር።ከዚያ ቀደም ብሎም  በአካባቢዉ በተደጋጋሚ ችግር ተከስቷል።ያምሆኖ ግን በቦታዉ የሚገኘዉ አስተዳደር በጊዜ መፍትሄ ባለመስጠቱ እዚህ ሊደርስ ችሏል ሲሉ ነዋሪዉ ተችተዋል።
ግጭቱ ከተቀሰቀ በኋላም ቢሆን የፀጥታ አካላት ሁኔታዉን ለማረጋጋት ቶሎ ወደ ቦታዉ አልደረሱምም ብለዋል። 
ስለ ጉዳዩ የአዳማ ከተማ አስተዳደርን ለማነጋገር ያደረግነዉ ጥረት አልተሳካም።

ሙሉ ቅንብሩን የድምፅ ማዕቀፉን ተጭነዉ ያድምጡ።

ፀሐይ ጫኔ

ኂሩት መለሰ