تاجیکستان از پیامد مالی تحریم‌های اروپا علیه روسیه نگران است
۱۴۰۴ آبان ۱۰, شنبه
وزارت خارجه تاجیکستان روز شنبه اعلام کرد که از شامل‌شدن بانک‌های این کشور در تازه‌ترین دور تحریم‌های اتحادیه اروپا علیه روسیه «به‌شدت نگران» است و گفت که برای کاهش پیامدهای آن روز دوشنبه، تدابیری اتخاذ خواهد کرد.
صفحه اینستاگرام ما را دنبال کنید!
در بسته نوزدهم تحریم‌های اتحادیه اروپا که در ۲۳ اکتوبر تصویب شد، سه بانک تاجیکستان از جمله اسپیتامن، بانک شهر دوشنبه و بانک تجارتی تاجیکستان، شامل گردیده‌اند.
اقتصاد تاجیکستان، کشوری محصور در خشکه با جمعیتی حدود ۱۰ میلیون نفر که میان افغانستان، ازبکستان، قرغزستان و چین موقعیت دارد، به‌شدت به پول‌های ارسالی کارگران مهاجر در روسیه وابسته است.
بیشتر بخوانید: واشنگتن تحریم‌های شدیدی بر دو شرکت بزرگ نفتی روسیه وضع کرد
وزارت خارجه تاجیکستان در اعلامیه‌ای گفته است: «جمهوری تاجیکستان به تعهدات بین‌المللی خود پابند است و همواره آماده همکاری با شرکای بین‌المللی برای جلوگیری مشترک از خطرات احتمالی ناشی از دورزدن تحریم‌ها می‌باشد.»
اتحادیه اروپا از زمان آغاز جنگ روسیه علیه اوکرایین در ماه فبروری سال ۲۰۲۲، چندین بسته تحریمی را علیه مسکو وضع کرده است.
این تحریم‌ها بانک‌ها، شرکت‌ها و افرادی را هدف قرار می‌دهند که به گفته بروکسل، در حمایت مالی یا نظامی از روسیه نقش دارند.
مطالب ویدیویی را در صفحه یوتیوب ما ببینید!
بسته نوزدهم، که در ماه اکتوبر سال ۲۰۲۵ تصویب شد، برای جلوگیری از دورزدن تحریم‌ها، نهادهایی در کشورهای ثالث از جمله تاجیکستان را نیز شامل می‌شود.