تاجیکستان در مرز با افغانستان ۲۰ هزار سرباز مستقر می‌کند
۱۴۰۰ تیر ۱۵, سه‌شنبه
رئیس جمهور تاجیکستان دوشنبه شب گفت که این سربازان باید مسئولیت حفاظت قوی‌تر مرز میان تاجیکستان و افغانستان را به عهده بگیرند.
قبل از آن کمیته امور امنیت ملی تاجیکستان گزارش داد که ۱۰۳۷ سرباز افغان بعد از نبردهای شدید با جنگجویان طالبان، شب دوشنبه از مرز وارد تاجیکستان شدند «تا جان شان را نجات دهند.»
در این گزارش افزوده شده است که «با توجه به حسن همجواری و عدم مداخله در امور داخلی افغانستان»، به این سربازان اجازه ورود به خاک تاجیکستان داده شد.
براساس این گزارش، طالبان در این درگیری «کنترول کامل» شش ولسوالی ولایت بدخشان در شمال شرق افغانستان را به دست گرفته اند.
در این میان روسیه قونسلگری‌اش را در شهر مزار شریف به دلیل بدتر شدن وضعیت امنیتی بسته است. ضمیر کابلوف، فرستاده روسیه برای افغانستان به خبرگزاری دولتی «تاس» گفت که وضعیت «به سرعت» در حال تغییر است.
کابلوف توضیح داده است: «سربازان افغان ولسوالی‌های زیادی را از دست داده‌اند. طبعاً که این امر آشفتگی ایجاد می‌کند.» او گفت که «بسیاری» قونسلگری‌ها در مزار شریف «تا روشن شدن اوضاع، موقتاً فعالیت‌های شان را متوقف کرده اند.»
در آخر ماه جون، آخرین سربازان اردوی آلمان فدرال، از مزار شریف خارج شدند.
سخنگوی سفارت روسیه در کابل گفت که مسکو در نظر ندارد که نمایندگی دیپلوماتیک‌اش را از این شهر بیرون کند. نیکیتا اشچینکو به خبرگزاری «ریا نووستی» گفت که «از قونسلگری به خوبی دفاع می‌شود.»
طالبان در آخر هفته در شمال افغانستان مناطقی مهم را تصرف کردند. بسیاری بخش‌های ولایت‌های بدخشان و تخار به دست طالبان افتاده است. نیروهای نظامی افغان مراکز این ولایت‌ها را تحت کنترول دارند.
براساس گزارش‌ها، طالبان ولسوالی‌های مهم استراتژیک را در نزدیکی شهر قندهار و همچنین در ولایت هلمند نیز تصرف کرده اند.
hm/af (AFP)